ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ແຂວງຫຼວງນໍ້າທາ ໄດ້ຈັດກອງປະຊຸມປະເມີນຜົນການປະຕິບັດວຽກງານຂອງຄະນະນໍາພະແນກປະຈໍາປີ2023 ຂຶ້ນເມື່ອບໍ່ດົນມານີ້ ທີ່ສູນຝືກອົບຮົມໂດຍການເຂົ້າຮ່ວມຂອງທ່ານ ຈັນທອງ ແກ້ວປະເສີດ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ຜູ້ຊີ້ນໍາວຽກງານພັກ-ພະນັກງານ, ມີທ່ານ ສີສຸພັນ ທໍາປັນຍາ ກໍາມະການພັກແຂວງ ຫົວໜ້າພະແນກຖວທ ແຂວງ,ມີຮອງຫົວໜ້າພະແນກ, ຂະແໜງການກ່ຽວຂ້ອງເຂົ້າຮ່ວມ.
ທ່ານ ວັນໄຊ ປັນຍາສັກ ຫົວໜ້າຂະແໜງບໍລິຫານພະແນກ ຖວທ ແຂວງໄດ້ຜ່ານດໍາລັດເລກທີ 300 ວ່າດ້ວຍການປະເມີນຜົນການປະຕິບັດໜ້າທີ່ວຽກງານຂອງພະນັກງານ-ລັດຖະກອນຊຶ່ງປະກອບມີ: 7 ໝວດ, 29 ມາດຕາ ແລະ ຜ່ານມາດຖານຂັ້ນຜູ້ມີຕໍາແໜ່ງບໍລິຫານ ຊຶ່ງໄດ້ແບ່ງອອກເປັນສາມພາກຄື: ດ້ານຄຸນທາດການເມືອງ,ຄຸນສົມບັດ-ສິນທໍາປະຕິວັດມີ 10 ມາດຖານ, ດ້ານຄວາມຮູ້, ຄວາມສາມາດ ແລະ ປະສົບການມີ 9 ມາດຖານ, ດ້ານຜົນສໍາເລັດໃນການປະຕິບັດວຽກງານມີ 4 ມາດຖານ.ພ້ອມດຽວກັນຄະນະນໍາຂອງພະແນກຖວທ ແຂວງທັງ3 ທ່ານໄດ້ຜ່ານໃບເກັບກ່ຽວຜົນງານໃນໄລຍະໜຶ່ງປີຜ່ານມາໃນການຈັດຕັ້ງປະຕິບັດໜ້າທີ່ວຽກງານ. ພ້ອມນັ້ນຜູ້ເຂົ້າຮ່ວມໄດ້ລົງຄະແນນໃຫ້ຄະນະນໍາທັງ3ທ່ານຕາມເງື່ອນໄຂທີ່ວາງໄວ້ເພື່ອເຮັດໃຫ້ວຽກງານດັ່ງກ່າວດໍາເນີນຢ່າງເປັນລະບົບ, ຖືກຕ້ອງ, ສອດຄ່ອງກັບແນວທາງນະໂຍບາຍຂອງພັກ ແລະ ກົດໝາຍຂອງລັດເພື່ອຮັບປະກັນຄວາມເປັນເອກະພາບ, ໂປ່ງໃສ່, ຖືກຕ້ອງກັບສະພາບຄວາມເປັນຈິງ, ແນໃສ່ເຮັດໃຫ້ວຽກງານການປະເມີນຜົນ ແລະ ຄຸ້ມຄອງຜົນການປະຕິບັດວຽກງານຂອງພະນັກງານ-ລັດຖະກອນທີ່ສັງກັດຢູ່ອົງການຈັດຕັ້ງພັກ-ລັດຂັ້ນສູນກາງ ແລະ ອົງການປົກຄອງທ້ອງຖິ່ນໃນຂອບເຂດທົ່ວປະເທດໃຫ້ມີປະສິດທິພາບ ແລະ ປະສິດທິຜົນ, ຕີລາຄາປະເມີນຜົນຕາມມາດຕະຖານວັດແທກການປະເມີນຜົນ ແລະ ຜົນສໍາເລັດໃນການປະຕິບັດໜ້າທີ່ວຽກງານຂອງພະນັກງານ-ລັດຖະກອນຢ່າງເປັນລະບົບ ແລະ ຕໍ່ເນື່ອງ, ຖືກຕ້ອງຕາມແຕ່ລະມາດຖານຢ່າງຄົບຖ້ວນ.
ຂ່າວ-ພາບ: ສົມພອນ
ຄໍາເຫັນ