ພາຍໃຕ້ການເປັນປະທານຂອງ ທ່ານໄຊສົມພອນ ພົມວິຫານ ກຳມະການກົມການເມືອງສູນກາງພັກປະທານສະພາແຫ່ງຊາດປະທານຄະນະກຳມະການລະດັບຊາດປັບປຸງລັດຖະທຳມະນູນ, ມີບັນດາທ່ານຮອງປະທານ ແລະ ກຳມະການ ຄລຊ, ອະນຸກຳມະການຕ່າງໆ ແລະ ກອງເລຂາ ເຂົ້າຮ່ວມ ເພື່ອສະຫຼຸບຕີລາຄາຜົນການປະເມີນ ການຈັດຕັ້ງປະຕິບັດລັດຖະທຳມະນູນ ສະບັບປີ 2015 ຢູ່ 5 ຈຸດອ້ອມຂ້າງສູນກາງ ແລະ 18 ແຂວງ-ນະຄອນຫຼວງວຽງຈັນ ຕິດພັນກັບກອງປະຊຸມສະໄໝສາມັນຂອງສະພາປະຊາຊົນຂັ້ນແຂວງ ຊຶ່ງເລີ່ມຈັດຕັ້ງປະເມີນແຕ່ວັນທີ 20 ມິຖຸນາ ຫາ ວັນທີ 30 ກໍລະກົດ 2024 ເປັນຕົ້ນມາ ແລະ ຮັບຟັງການລາຍງານການເຄື່ອນໄຫວຂອງອະນຸກໍາມະການຕ່າງໆ ແລະ ກອງເລຂາ. ນອກຈາກນັ້ນ, ກອງປະຊຸມຍັງໄດ້ປຶກສາຫາລືວຽກງານສຳຄັນຈຳນວນໜຶ່ງ ກ່ຽວກັບການປັບປຸງລັດຖະທຳມະນູນ ແລະ ການຈັດກອງປະຊຸມວິທະຍາສາດ.
ທ່ານ ໄຊສົມພອນ ພົມວິຫານ ໄດ້ສະເໜີໃຫ້ບັນດາທ່ານທີ່ເຂົ້າຮ່ວມ ຈົ່ງຍົກສູງຄວາມຮັບຜິດຊອບໃນການຄົ້ນຄວ້າ, ປະກອບຄວາມເຫັນໃຫ້ເລິກເຊິ່ງ ແລະ ຕົກລົງບັນຫາຕ່າງໆຢ່າງມີປະສິດທິພາບ, ປະສິດທິຜົນ. ໃນນັ້ນ, ໃຫ້ຕີລາຄາບົດສະຫຼຸບຜົນການປະເມີນ ການຈັດຕັ້ງປະຕິບັດລັດຖະທຳມະນູນ ສະບັບປີ 2015 ຢູ່ 5 ຈຸດ ອ້ອມຂ້າງສູນກາງ ແລະ 18 ແຂວງ-ນະຄອນຫຼວງ; ບັນດາຂໍ້ສະດວກ ແລະ ຫຍຸ້ງຍາກໃນການເຄື່ອນໄຫວຂອງອະນຸກໍາມະການຕ່າງໆ; ເອົາໃຈໃສ່ຄົ້ນຄວ້າ, ວິເຄາະ-ວິໄຈບັນດາຄໍາເຫັນທີ່ໄດ້ຈາກການທາບທາມຢູ່ແຕ່ລະຈຸດ ເພື່ອສັງລວມເອົາຄໍາເຫັນໃສ່ຮ່າງລັດຖະທໍາມະນູນສະບັບປັບປຸງ ໃຫ້ມີເນື້ອໃນຄົບຖ້ວນສົມບູນຍິ່ງໆຂຶ້ນ. ຈາກນັ້ນ, ຈຶ່ງລາຍງານຕໍ່ກອງປະຊຸມກົມການເມືອງສູນກາງພັກ ມີທິດຊີ້ນໍາ ເພື່ອເປັນບ່ອນອີງໃນການຈັດຕັ້ງປະຕິບັດໃນຕໍ່ໜ້າ.
ແຫຼ່ງຂ່າວ: ຂປລ
ຄໍາເຫັນ