ຕິດຕາມກວດກາການຈັດຕັ້ງປະຕິບັດມະຕິຂອງ ສພຊ

ໃນລະຫວ່າງວັນທີ 13-14 ຕຸລາ ຜ່ານມາ ທີ່ເມືອງວຽງຄໍາ ແຂວງວຽງຈັນ ກໍາມາທິການແຜນການ, ການເງິນ ແລະ ການກວດສອບ ໄດ້ຈັດກອງປະຊຸມສໍາມະນາກ່ຽວກັບການຕິດຕາມກວດກາ ການຈັດຕັ້ງປະຕິບັດມະຕິຂອງສະພາແຫ່ງຊາດ (ສພຊ) ໃນຂົງເຂດກໍາມາທິການແຜນການ, ການເງິນ ແລະ ການກວດສອບ ໂດຍການເປັນປະທານຂອງ ທ່ານ ບຸນຕາ ເທບພະວົງ ຮອງປະທານກໍາມາທິການແຜນການ, ການເງິນ ແລະ ການກວດສອບ ໂດຍການເຂົ້າຮ່ວມຂອງທ່ານ ນາງ ຂັນແກ້ວ ຫຼ້າມະນີເງົາ ຮອງຜູ້ວ່າການທະນາຄານ ແຫ່ງ ສປປ ລາວ, ບັນດາທ່ານສະມາຊິກສະພາແຫ່ງຊາດທີ່ເປັນຄະນະກໍາມະການຂອງກໍາມາທິການແຜນການ, ການເງິນ ແລະ ການກວດສອບ ຈາກ 18 ແຂວງທົ່ວປະເທດ (ຜ່ານທາງອອນລາຍ) ແລະ ບັນດາທ່ານຊ່ຽວຊານ-ນັກຄົ້ນຄວ້າ, ບັນດາທ່ານຫົວໜ້າ-ຮອງຫົວໜ້າກົມ ພ້ອມດ້ວຍວິຊາການທີ່ກ່ຽວຂ້ອງເຂົ້າຮ່ວມ.
ກອງປະຊຸມໄດ້ຮັບຟັງການສະເໜີແຜນການຕິດຕາມກວດກາ ການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນການພັດທະນາຖານຂໍ້ມູນ 5 ປີ ຄັ້ງທີ IX (2021-2025); ແຜນການຕິດຕາມກວດກາ ການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ກ່ຽວກັບ ແຜນງົບປະມານແຫ່ງລັດ, ແຜນເງິນຕາ, ກວດສອບ ແລະ ກວດກາ 5 ປີ ຄັ້ງທີ IX (2021-2025); ແຜນການເຄື່ອນໄຫວການສ້າງ ແລະ ເຊື່ອມໂຍງຖານຂໍ້ມູນ ຂອງກໍາມາທິການແຜນການ, ການເງິນ ແລະ ການກວດສອບ ໃນການປະເມີນຜົນກາງສະໄໝ ການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ 5 ປີ ຄັ້ງທີ IX (2021-2025); ແຜນການເຄື່ອນໄຫວ, ສ້າງ ແລະ ເຊື່ອມໂຍງຖານຂໍ້ມູນຂອງກໍາມາທິການແຜນການ, ການເງິນ ແລະ ການກວດສອບໃນການປະເມີນຜົນກາງສະໄໝ ການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານ ແລະ ແຜນເງິນຕາ 5 ປີ ຄັ້ງທີ IX (2021-2025); ການປະກອບຄໍາເຫັນໃສ່ແຜນການຕິດຕາມກວດກາ, ວິທີວິທະຍາການປະເມີນຜົນ ແລະ ການພັດທະນາຖານຂໍ້ມູນ ແຜນການພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານ, ແຜນເງິນຕາ, ກວດສອບ ແລະ ກວດກາກັບພາກສ່ວນກ່ຽວຂ້ອງ ຈາກຕາງໜ້າ ກະຊວງແຜນການ ແລະ ການລົງທຶນ, ກະຊວງການເງິນ, ທະນາຄານ ແຫ່ງ ສປປ ລາວ, ອົງການກວດສອບແຫ່ງລັດ, ອົງການກວດກາແຫ່ງລັດ, ສູນສະຖິຕິແຫ່ງຊາດ ແລະ ບັນດາແຂວງ; ການສະເໜີບົດລາຍງານການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດ ກາງສະໄໝ 5 ປີ ຄັ້ງທີ IX (2021-2025), ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ (2021-2023) ແລະ ແຜນພັດທະນາເສດຖະກິດ-ສັງຄົມແຫ່ງຊາດ 9 ເດືອນ ແລະ ຄາດຄະເນໝົດປີ 2023; ບົດລາຍງານແຜນການຈັດຕັ້ງປະຕິບັດມະຕິກອງປະຊຸມ ສພຊ ກ່ຽວກັບແຜນງົບປະມານແຫ່ງລັດ ກາງສະໄໝ 5 ປີ ຄັ້ງທີ IX (2021-2025) ແລະ ແຜນງົບປະມານແຫ່ງລັດ 9 ເດືອນ ແລະ ຄາດຄະເນປີ 2023 ຈາກຕາງໜ້າກະຊວງການເງິນ; ບົດລາຍງານຜົນການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດກ່ຽວກັບແຜນເງິນຕາກາງສະ           ໄໝ 5 ປີ ຄັ້ງທີ IX (2021-2025), ແຜນເງິນຕາ 9 ເດືອນ ແລະ ຄາດຄະເນໝົດປີ 2023 ຈາກຮອງຜູ້ວ່າການທະນາຄານແຫ່ງ ສປປ ລາວ; ລາຍງານຜົນການກວດກາຕາມຜົນການກວດສອບ ການຈັດຕັ້ງປະຕິບັດມະຕິກອງປະຊຸມ ສພຊ ກ່ຽວກັບແຜນງົບປະມານແຫ່ງລັດ ປະຈໍາປີ 2022, ການກວດສອບມະຕິກອງປະຊຸມສະພາແຫ່ງຊາດ ກ່ຽວກັບແຜນງົບປະມານແຫ່ງລັດ ປະຈໍາປີ 2023 ແລະ ການແກ້ໄຂຜົນການກວດສອບ ຕາມມະຕິກອງປະຊຸມ ສພຊ ຈາກຕາງໜ້າອົງການກວດສອບແຫ່ງລັດ ແລະ ການສະເໜີລາຍງານຜົນການກວດກາຕາມຜົນການກວດສອບການຈັດຕັ້ງປະຕິບັດມະຕິກອງປະຊຸມ ສພຊ ກ່ຽວກັບແຜນ ການກວດກາ ປະຈໍາປີ 2023 ແລະ ການແກ້ໄຂຜົນການກວດກາ ຕາມມະຕິກອງປະຊຸມ ສພຊ ຈາກນັ້ນ, ຜູ້ແທນກອງປະຊຸມ ໄດ້ຜັດປ່ຽນກັນປະກອບຄໍາຄິດຄໍາເຫັນໃສ່ບັນດາຫົວຂໍ້ຕ່າງໆທີ່ນໍາມາສະເໜີ ແລະ ຕາມຄໍາເຫັນເຈາະຈີ້ມຂອງປະທານກອງປະຊຸມໃນກອງປະຊຸມຄັ້ງນີ້; ໂອກາດດັ່ງກ່າວ ທ່ານ ບຸນຕາ ເທບພະວົງ ໄດ້ມີຄໍາເຫັນກ່າວເປີດກອງປະຊຸມວ່າ: ກອງປະຊຸມຄັ້ງນີ້ ແມ່ນດໍາເນີນເປັນເວລາ 2 ວັນ ແຕ່ເນື້ອໃນທີ່ຈະນໍາມາສະເໜີໃນກອງປະຊຸມຄັ້ງນີ້ ແມ່ນມີຈໍານວນຫຼາຍ. ດັ່ງນັ້ນ, ຈຶ່ງຮຽກຮ້ອງໃຫ້ບັນດາທ່ານຄະນະຮັບຜິດຊອບ, ນັກຄົ້ນຄວ້າ, ຊ່ຽວຊານ ແລະ ບັນດາທ່ານທີ່ເຂົ້າຮ່ວມກອງປະຊຸມ ຈົ່ງຍາດເວລາປະກອບຄໍາເຫັນ ເພື່ອເຮັດໃຫ້ການຝຶກອົບຮົມໃນຄັ້ງນີ້ ມີເນື້ອໃນຄົບຖ້ວນ ແລະ ສົມບູນຂຶ້ນ. ກອງປະຊຸມຄັ້ງນີ້ ໄດ້ຮັບການສະໜັບສະໜູນທຶນຈາກ ໂຄງການ STEPS. 
(ຂ່າວ-ພາບ: ສອນສັກ ວັນວິໄຊ)