 |
ອີງຕາມບົດລາຍງານຈາກຄະນະກຳມະການປົກຄອງຕາແສງນາເສ ເມືອງທ່າແຂກ ໃຫ້ຮູ້ວ່າ: ຫຼັງຈາກໄດ້ຮັບແຈ້ງຄວາມຈາກການຈັດຕັ້ງບ້ານຖໍ້າ, ທາງ ປກສ ກຸ່ມ ແລະ ອຳນາດການປົກຄອງທ້ອງຖິ່ນ ໄດ້ຮີບຮ້ອນລົງກວດກາສະຖານທີ່ເກີດເຫດຕົວຈິງ ແລະ ພົບເຫັນຄວາມເສຍຫາຍດັ່ງນີ້: ຕົ້ນໄມ້ໃຫຍ່ທີ່ຕັ້ງຢູ່ຫ່າງຈາກເຮືອນປະມານ 20 ແມັດ ໄດ້ລົ້ມທັບເຮືອນປະຊາຊົນເສຍຫາຍ 3 ຫຼັງຄື: ເຮືອນໄມ້ 1 ຫຼັງ ຖືກຫັກເພໝົດ ແລະ ເຮືອນກໍ່ອີກ 2 ຫຼັງ ກະເບື້ອງມຸງຫຼັງຄາແຕກເສຍຫາຍ ແລະ ເຫດການດັ່ງກ່າວໄດ້ສົ່ງຜົນໃຫ້ ແມ່ເຖົ້າ ຜຸຍ ອາຍຸ 89 ປີ ຖືກຕົ້ນໄມ້ທັບເສຍຊີວິດຄາທີ່. ສ່ວນລູກສາວ ແລະ ຫຼານທີ່ນອນຢູ່ພາຍໃນຫ້ອງນອນແມ່ນປອດໄພ ບໍ່ໄດ້ຮັບອັນຕະລາຍໃດໆ.
ຫຼັງເກີດເຫດ ທາງຍາດຕິພີ່ນ້ອງ ແລະ ປະຊາຊົນຊາວບ້ານໄດ້ຮ່ວມມືກັນຊ່ວຍເຫຼືອນຳເອົາຮ່າງ (ສົບ) ຂອງຜູ້ເສຍຊີວິດອອກຈາກຈຸດເກີດເຫດ ມາປະກອບພິທີທາງສາດສະໜາຢູ່ເຮືອນຂອງລູກສາວທີ່ຢູ່ໃກ້ກັນ.
 |
ທັງນີ້, ທາງອຳນາດການປົກຄອງເມືອງທ່າແຂກ ໄດ້ສະແດງຄວາມເສຍໃຈຕໍ່ເຫດການດັ່ງກ່າວ ພ້ອມທັງແຈ້ງເຕືອນໃຫ້ປະຊາຊົນລະມັດລະວັງ ຕໍ່ໄພທຳມະຊາດ ແລະ ຕົ້ນໄມ້ໃຫຍ່ ທີ່ອາດຈະເກີດຂຶ້ນໃນໄລຍະທີ່ມີສະພາບອາກາດແປປ່ວນ.
ໃນວັນທີ 3 ສິງຫາ ທ່ານ ສົມສະອາດ ອຸ່ນສີດາ ປະທານຄະນະກຳມະການປົກຄອງແຂວງຄໍາມ່ວນ, ທ່ານ ຄໍາໝັ້ນ ສໍປະເສີດ ເລຂາພັກເມືອງທ່າແຂກ ພ້ອມດ້ວຍຄະນະ ໄດ້ລົງຢ້ຽມຢາມ ພ້ອມທັງມອບປັດໄຈຈໍານວນໜຶ່ງ ໃຫ້ແກ່ຄອບຄົວທີ່ໄດ້ຮັບຜົນກະທົບ ເພື່ອສະແດງເຖິງຄວາມເປັນຫ່ວງເປັນໃຍ ແລະ ໃຫ້ກຳລັງໃຈ ເພື່ອພ້ອມກັນຜ່ານຜ່າວິດກິດການຄັ້ງນີ້ໄປໄດ້ດ້ວຍດີ.
ຂ່າວ: ກອງຄໍາ
ຄໍາເຫັນ