ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 8 ພຶດສະພາ ຜ່ານມາໃນຂອບເຂດກອງປະຊຸມຄົບຄະນະຄັ້ງທີ 10 ຂອງຄະນະກຳມະການລາຍການຄວາມຊົງຈຳໂລກພາກພື້ນ ອາຊີ - ປາຊີຟິກ ຂອງ UNESCO ໄດ້ຈັດຂຶ້ນຢູ່ ມົງໂກນ, UNESCO ໄດ້ຈົດຊື່ລວດລາຍຢູ່ໂຖປັກທູບໃຫຍ່ 9 ອັນທີ່ຫຼໍ່ດ້ວຍທອງຢູ່ພະລາຊະວັງ ເຫວ້ ຂອງ ຫວຽດນາມ ເຂົ້າບັນຊີລາຍຊື່ມໍລະດົກເອກະສານພາກພື້ນ ອາຊີ - ປາຊີຟິກ.
ສະນັ້ນ, ມາຮອດປັດຈຸບັນ, UNESCO ໄດ້ຈົດຊື່ 10 ມໍລະດົກ (ລວມມີ 3 ມໍລະດົກເອກະສານໂລກ ແລະ 7 ມໍລະດົກເອກະສານພາກພື້ນ ອາຊີ - ປາຊີຟິກ) ຂອງ ຫວຽດນາມ ແລ້ວ.
ຂ່າວລະບຸວ່າ: ກົມມໍລະດົກວັດທະນະທຳ ຫວຽດນາມ ໃຫ້ຮູ້ວ່າ, ລວດລາຍຢູ່ໂຖປັກທູບໃຫຍ່ 9 ອັນທີ່ຫຼໍ່ດ້ວຍທອງຢູ່ພະລາຊະວັງ ເຫວ້, ລວມມີ 162 ຮູບພາບ ແລະ ຕົວອັກສອນ ຫ໊ານ ຊຶ່ງເຈົ້າຊີວິດ ມິງມ້າງ ສັ່ງໃຫ້ຫຼໍ່ຢູ່ ເຫວ້ ໃນປີ 1835 ແລະ ສຳເລັດໃນປີ 1837. ນີ້ແມ່ນແຫຼ່ງເອກະສານທີ່ເປັນເອກະລັກສະເພາະ ແລະລ້ຳຄ່າ ຊຶ່ງວົງການນັກຄົ້ນຄວ້າຢູ່ພາຍໃນ ແລະ ຕ່າງປະເທດໃຫ້ຄວາມສົນໃຈທີ່ສຸດ ຍ້ອນບັນດາຄຸນຄ່າທາງດ້ານເນື້ອໃນປະຫວັດສາດ, ວັດທະນະທຳ - ການສຶກສາ, ພູມສາດ, ການແພດ - ການຢາ.
ລວດລາຍຢູ່ໂຖປັກທູບໃຫຍ່ 9 ອັນທີ່ຫຼໍ່ດ້ວຍທອງຢູ່ພະລາຊະວັງເຫວ້ ຍັງຮັກສາບັນດາຄຸນຄ່າກ່ຽວກັບການປະສົມປະສານ ແລະ ພົວພັນດ້ານວັດທະນະທຳສັງຄົມຂອງປະເທດ ຫວຽດນາມ ກັບບັນດາປະເທດຢູ່ພາກພື້ນ ອາຊີຕາເວັນອອກໄວ້ໄດ້.
ຄໍາເຫັນ