ວາລະສານອະລຸນໃໝ່ເຂົ້າຢ້ຽມຢາມ ແລະ ພົບປະຮອງເລຂາຄະນະພັກນະຄອນໂຮ່ຈິມິນ

ໃນພິທີ, ສະຫາຍ ວໍ ວັນ ມິງ ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໄດ້ກ່າວວ່າ: ການເດີນທາງມາຢ້ຽມຢາມ ແລະ ເຮັດວຽກຄັ້ງນີ້ແມ່ນຢູ່ໃນທາມກາງທົ່ວພັກທົ່ວລັດກຳລັງປັບປຸງກົງຈັກການຈັດຕັ້ງ ເວົ້າລວມ ເວົ້າສະເພາະແມ່ນ ນະຄອນ ໂຮ່ຈິມິນ ກໍໄດ້ສຳເລັດການໂຮມເອົາສອງແຂວງມາຂຶ້ນກັບນະຄອນໂຮ່ຈິມິນກໍຄືແຂວງບິງເຢືອງ ແລະ ບາເຊຍ - ວຸງເຕົາ; ລາຍໄດ້ສະເລ່ຍຕໍ່ຫົວຄົນແມ່ນເພີ່ນຂຶ້ນສະເລຍ 1 ສ່ວນ 4 ຂອງປະເທດຫວຽດນາມ; ສະຫາຍໄດ້ກ່າວຕື່ມວ່າ ນະຄອນໂຮ່ຈິມິນຕີລາຄາສູງຕໍ່ສາຍພົວພັນສອງຊາດລາວ-ຫວຽດນາມ ແລະ ຍັງຮັດແໜ້ນສາມັກຄີພິເສດກັບແຂວງໃກ້ຄຽງຂອງ ສປປ ລາວ ເຊັ່ນ: ນະຄອນຫຼວງວຽງຈັນ, ຈຳປາສັກ ແລະ ແຂວງອື່ນໆ; ພ້ອມທັງພົວພັນຮ່ວມມືຮອບດ້ານຜ່ານຫຼາຍໂຄງການເຊັ່ນ: ດ້ານການສຶກສາ, ສາທາລະນະສຸກ, ວັດທະນະທຳ ແລະ ການລົງທຶນ.

ໃນໂອກາດມາຢ້ຽມຢາມ ແລະ ເຮັດວຽກຄັ້ງນີ້, ສະຫາຍ ວັນລະຕີ ຄຳວັນວົງສາ ໄດ້ລາຍງານການມາເຮັດວຽກຄັ້ງນີ້ໂດຍສະເພາະກໍແມ່ນສອງວາລສານລາວ-ຫວຽດນາມ, ສະຫາຍໄດ້ກ່າວວ່າຈະສືບຕໍ່ເສີມຂະຫຍາຍການພົວພັນແລກປ່ຽນບົດຮຽນຕ່າງໆໂດຍສະເພາະແມ່ນວາລະສານເອເລັກໂຕຣນິກ ແລະ ການຕອບສະໜອງຂໍ້ມູນ-ຂ່າວສານທາງດ້ານວິທະຍາສາດ, ທາງດ້ານທິດສະດີ ແລະ ພຶດຕິກຳ ຂອງສອງພັກ, ສອງລັດ ໃຫ້ເປັນປົກກະຕິ ໂດຍສະເພາະບັນດາບັນຫາໃໝ່ທີ່ພົ້ນເດັ່ນໃນປັດຈຸບັນ;

ເພີ່ມທະວີປະກອບສ່ວນເຂົ້າໃນການຮັດແໜ້ນ ແລະ ເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ກ້າວເຂົ້າສູ່ລວງເລິກ.

ໃນການຢ້ຽມຢາມ ແລະ ເຮັດວຽກໃນຄັ້ງນີ້ຄະນະຍັງໄດ້ໄປຢ້ຽມຢາມວາລະສານກົ້ງສານຂອງພັກກອມມູນິດຫວຽດນາມສາຂາພາກໃຕ້, ໜັງສືພິມໄຊງ່ອນປົດປ່ອຍ, ເຂດອຸດສາຫະກຳດົງນາຍ, ເຂດເຕັກໂນໂລຊີຂັ້ນສູງນະຄອນໂຮ່ຈິມິນ ແລະ ສະຖາບັນການເມືອງເຂດ II ນະຄອນໂຮ່ຈິມິນ.

ຂ່າວ: ວາລະສານອະລຸນໃໝ່