ວັນຊາດທີ 02ທັນວາ ແມ່ນວັນປະຫວັດສາດ ແຫ່ງໄຊຊະນະອັນຍິ່ງໃຫຍ່ ຂອງປວງຊົນລາວບັນດາເຜົ່າທັງຊາດ ທີ່ໄດ້ຮ່ວມກັນຕໍ່ສູ້ເພື່ອອິດສະຫຼະພາບ, ເອກະລາດ ແລະ ຮັກສາໄດ້ຜືນແຜ່ນດິນອັນຄົບຖ້ວນ ຈາກສັດຕູພວກລ່າເມືອງຂຶ້ນແບບເກົ່າ ແລະ ໃໝ່ ທີ່ມາຮຸກຮານ ປະເທດຊາດ.
ວັນທີ 2 ທັນວາ ເປັນວັນທີ່ມີຄວາມໝາຍສຳຄັນຂອງຊາດລາວເຮົາ ສະແດງໃຫ້ເຫັນເຖິງມູນເຊື້ອນໍ້າໃຈຮັກຊາດ ຂອງປະຊາຊົນລາວບັນດາເຜົ່າ ທີ່ມີຄວາມສາມັກຄີອັນເດັດດ່ຽວໜຽວແໜ້ນ, ອົງອາດ, ກ້າຫານ ພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ ກໍຄືປະທານ ໄກສອນ ພົມວິຫານ ທີ່ແສນເຄົາລົບຮັກ, ກອງທັບປະຊາຊົນປະຕິວັດລາວ ໄດ້ພ້ອມກັນຄຽງບ່າຄຽງໄຫຼ່ໃນພະລະກິດ ຕໍ່ສູ້ກູ້ຊາດ ຕ້ານສັດຕູ ຢ່າງດຸເດືອດ, ຂ້ຽວຂາດ ທີ່ເຕັມໄປດ້ວຍຄວາມເສຍສະຫຼະເລຶອດເນື້ອ ແລະ ຊີວິດ ຂອງກອງທັບ ແລະ ປະຊາຊົນລາວບັນດາເຜົ່າ ຈົນສາມາດປົດປ່ອຍປະເທດຊາດ ໄດ້ຢ່າງມີໄຊ ແລະ ໄດ້ປະກາດສ້າງຕັ້ງ ສປປ ລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.ເປັນວັນທີ່ປະຊາຊົນລາວບັນດາເຜົ່າ ໄດ້ຮັບອິດສະຫຼະພາບ ແລະ ເປັນເຈົ້າຂອງປະເທດຊາດຢ່າງແທ້ຈິງ,ເຮັດໃຫ້ປະຊາຄົມໂລກ ໄດ້ຮັບຮູ້ ວັນທີ 2ທັນວາ ແມ່ນວັນແຫ່ງສັນຕິພາບ.
ໃນໄລຍະແຫ່ງການປົກປັກຮັກສາ ບູລະນະສ້າງສາພັດທະນາປະເທດຊາດ ພາຍໃຕ້ການຊີ້ນຳ-ນຳພາ ຂອງພັກປະຊາຊົນປະຕິວັດລາວ ກໍຄືການບູລະນະລະບອບປະຊາທິປະໄຕ ປະຊາຊົນລາວ ເຮັດໃຫ້ປະຊາຊົນລາວມີສິດສະເໜີພາບເທົ່າທຽມກັນໃນສັງຄົມ ລະບົບການເມືອງ-ການປົກຄອງ ມີສະຖຽນລະພາບ ຢ່າງໜັກແໜ້ນ, ເສດຖະກິດມີການຂະຫຍາຍຕົວ, ພື້ນຖານໂຄງລ່າງໄດ້ຮັບການພັດທະນະຢ່າງຕໍ່ເນື່ອງ, ສັງຄົມມີຄວາມສະຫງົບໂດຍພື້ນຖານ, ປະຊາຊົນລາວບັນດາເຜົ່າ ມີຄວາມສາມັກຄີ ເປັນປຶກແຜ່ນ ແໜ້ນໜາ, ນະໂຍບາຍການພົວພັນຮ່ວມມືກັບບັນດາປະເທດເພື່ອນມິດ ຍຸດທະສາດກໍຄືປະເທດຕ່າງໆໃນໂລກ ລ້ວນແຕ່ຖືກຕ້ອງສອດຄ່ອງກັບຍຸກສະໄໝອັນໄດ້ກາຍເປັນພື້ນຖານອັນແຂງແຮງ ແລະ ເຂັ້ມແຂງ ໃຫ້ ສປປ ລາວ ມີເງື່ອນໄຂ ພັດທະນາໄປສູ່ຄວາມຈະເລີນ ຮຸ່ງເຮືອງ ແລະ ສີວິໄລ ເທື່ອລະກ້າວ.
ໃນໂອກາດວັນຊາດທີ 02 ທັນວາຄົບຮອບ 50 ປີນີ້ ຂ້າພະເຈົ້າ ຂໍຕາງໜ້າໃຫ້ ພະນັກງານ,ສະມາຊິກພັກ ສະຖາບັນ ວິທະຍາສາດ ເສດຖະກິດ ແລະ ສັງຄົມແຫ່ງຊາດ ຂໍອວຍພອນອັນປະເສິດແດ່ບັນດາທ່ານການນຳພັກລັດ, ປະຊາຊົນລາວບັນດາເຜົ່າ ຈົ່ງມີພາລານາໄມສົມບູນປະສົບຜົນສຳເລັດ ໃນໜ້າທີ່ວຽກງານທຸກປະການ ສືບຕໍ່ຊີ້ນໍາ-ນໍາພາປະເທດຊາດໃຫ້ນັບມືເຕີບໃຫ່ຍເຂັ້ມແຂງ ກ້າວຂື້ນຢ່າງບໍ່ຢຸດຢັ້ງ.
ນ້ຳໃຈ ວັນຊາດທີ 02 ທັນວາ ໝັ້ນຍືນ!
ຄໍາເຫັນ