ວຽກງານສະຖິຕິປະກອບສ່ວນສໍາຄັນຕໍ່ເສດຖະກິດມະຫາພາກ

ໂດຍ: ຕະວິນຍານ
ກະຊວງແຜນການ ແລະ ການລົງທຶນໄດ້ນໍາພາຄຸ້ມຄອງວຽກງານສະຖິຕິໃນຂອບເຂດທົ່ວປະເທດມີຜົນສໍາເລັດເປັນກ້າວໆມາ. ໃນໄລຍະປີ 2023 ຜ່ານມາ, ສາມາດ ຍົກລະດັບການພັດທະນາພັດທະນາລະບົບສະຖິຕິແຫ່ງຊາດທີ່ນໍາໃຊ້ເຄື່ອງມື ICT ເຂົ້າໃນລະບົບການເກັບກໍາຂໍ້ມູນ, ການສໍາຫລວດແລະການຜະລິດຂໍ້ມູນສະຖິຕິທາງການທີ່ມີມາດຕະຖານສາກົນ;ໄດ້ປັບປຸງລະບອບວິທີການການຄິດໄລ່ ອັດຕາການເຕີບໂຕເສດຖະກິດ, ລວມຍອດຜະລິດຕະພັນພາຍໃນ, ດັດຊະນີລາຄາຜູ້ຊົມໃຊ້ຂອງ ສປປ ລາວ. ສູນສະຖິຕິແຫ່ງຊາດໄດ້ປະສານສົມທົບກັບບັນດາຂະແໜງການ ແລະທ້ອງຖິ່ນ ປັບປຸງລະບອບການລາຍງານ ສະຖິຕິເສຖະກິດ, ສະຖິຕິສັງຄົມລວມທັງ ບົດບາດຍິງຊາຍ, ສະຖິຕິສິ່ງແວດລ້ອມ ແລະ ຄວາມໝັ້ນຄົງຮ່ວມເພື່ອລາຍງານປະຈໍາເດືອນ, ໄຕມາດ, ປະຈໍາປີວ່ອງໄວແລະເປັນລະບົບດີຂຶ້ນ; ນອກນັ້ນຍັງໄດ້ລົງຕິດຕາມຊຸກຍູ້ ເກັບກໍາ ສະພາບການ ເຄື່ອນໄຫວການຈັດຕັ້ງປະຕິບັດວຽກສະຖິຕິຂັ້ນທ້ອງຖິ່ນ ແລະຕິດຕາມທ່າອ່ຽງເສດຖະກິດ ເພື່ອປະເມີນສະພາບການເໜັງຕີງຂອງລາຄາ ແລະຄິດໄລ່ອັດຕາເງິນເຟີ້ປະຈໍາເດືອນຢ່າງເປັນປົກະຕິ ແລະຕີລາຄາການເຕີບໂຕ ຂອງເສດຖະກິດຂອງ ສປປ ລາວ. ພ້ອມນີ້ໄດ້ສ້າງຄວາມອາສາມາດໃຫ້ທ້ອງຖິ່ນໂດຍລົງໄປຝຶກອົບຮົມ ແລະ ຊ່ວຍປັບປຸງການສ້າງຖານໃໝ່ ໃນການຄາດຄະເນ GDP ຂອງແຂວງ (ໄດ້ 2 ແຂວງ). ໄດ້ສໍາເລັດການຈັດຕັ້ງປະຕິບັດການສໍາຫລວດດັດສະນີໝາຍທາງສັງຄົມຄັ້ງທີ 3 ປີ 2023; ສໍາເລັດການສໍາຫຼວດວິສາຫະກິດປະຈໍາງວດ ປີ 2023 ແລະ ສຳເລັດການກະກຽມເອກະສານໂຄງການສໍາຫລວດພົນລະເມືອງ ແລະທີ່ຢູ່ອາໃສທົ່ວປະເທດ ຄັ້ງທີ V ແລະໄດ້ຈັດກອງປະຊຸມຄະນະຊີ້ນາລະດັບຊາດຄັ້ງປະຖົມະລຶກໃນເດືອນ ມິຖຸນາ 2023 ຜ່ານມາ, ສໍາເລັດການກະກຽມ ການສໍາຫລວດການຊົມໃຊ້ ແລະ ໃຊ້ຈ່າຍຄົວເຮືອນຄັ້ງທີ VII ຊຶ່ງຈະເລີ່ມລົງເກັບກາຂໍ້ມູນພາກສະໜາມໃນຕົ້ນປີ 2024, ປັດຈຸບັນ,ກໍາລັງດຳເນີນການຝຶກອົບຮົມ ນັກເດີນສໍາຫລວດໃນຂອບເຂດທົ່ວປະເທດ. 
ນອກຈາກນັ້ນ,ສູນສະຖິຕິແຫ່ງຊາດ ຍັງເພີ່ມທະວີຄວາມຮັບຮູ້ ແລະ ຄວາມຕ້ອງການຂໍ້ມູນສະຖິຕິຂອງການນໍາ ທັງເປັນການຍົກສູງ ຄວາມສາມາມາດໃນການຄຸ້ມຄອງ, ຕິດຕາມ ແລະ ຊຸກຍູ້ວຽກງານສະຖິຕິຢູ່ທ້ອງຖິ່ນໃຫ້ດີຂຶ້ນ, ສູນສະຖິຕິ ໄດ້ຈັດ ກອງປະຊຸມເຜີຍແຜ່ ແລະ ປຶກສາຫາລືກ່ຽວກັບວຽກງານສະຖິຕິສ້າງຄວາມເຂົ້າໃຈ ໃນການນໍາໃຊ້ ແລະ ເຊື່ອໝັ້ນ ຕໍ່ວຽກງານສະຖິຕິ ໃຫ້ແກ່ສະມາຊິກສະພາປະຊາຊົນຂັ້ນແຂວງ 18 ແຂວງ ແລະ ການນໍາເມືອງ (ທ່ານເຈົ້າເມືອງ) 148 ເມືອງໃນຂອບເຂດທົ່ວປະເທດ.
ສໍາລັບວຽກຄົ້ນຄວ້າວິໄຈການພັດທະນາ ແລະ ຝຶກອົບຮົມ ສູນສະຖິຕິແຫ່ງຊາດໄດ້ສ້າງບົດລາຍງານເສດຖະກິດມະຫາພາກປະຈຳໄຕມາດ ແລະ ປີ 2022, ສ້າງບົດລາຍງານຕິດຕາມ ແລະ ປະເມີນຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດການແກ້ໄຂ້ຄວາມຫຍຸ້ງຍາກດ້ານເສດຖະກິດ-ການເງິນ 2021-2023; ສ້າງບົດລາຍງານກ່ຽວກັບທິດທາງ ແລະ ມາດຕະການເສີມຂະຫຍາຍທ່າແຮງ ແລະຄວາມສາມາດບົ່ມຊ້ອນຂອງປະເທດເພື່ອໃຫ້ກາຍເປັນເສດຖະກິດປາຍແຫຼມ; ສ້າງບົດຄົ້ນຄວ້າທ່າແຮງດ້ານການຜະລິດສິນຄ້າ, ການບໍລິການ ແລະ ການຄ້າໃນການນໍາໃຊ້ແລວທາງ ເສດຖະກິດລົດໄຟ ລາວ-ຈີນ; ສ້າງບົດຄົ້ນຄວ້າການພັດທະນາເສດຖະກິດເຂດແຄວ້ນຕິດພັນກັບການແກ້ໄຂ ຄວາມທຸກຍາກ”; ສ້າງບົດຄົ້ນຄວ້າຜົນກະທົບຂອງການຮ່ວມມືທາງດ້ານເສດຖະກິດໃນພາກພື້ນ, ການເຊື່ອມໂຍງ ກັບພາກພື້ນ ແລະ ການຫັນປ່ຽນໂຄງປະກອບເສດຖະກິດຂອງ ສປປ ລາວ; ສ້າງບົດລາຍງານການສຳຫຼວດ ແລະ ການຕິດຕາມທາງດ້ານໂພຊະນາການ ຂອງແຜນງານໜຶ່ງດຽວທີ່ມີສ່ວນຮ່ວມຫຼາຍຂະແຫນງການ ໄລຍະທີ II; ສ້າງບົດ ລາຍງານຖານຂໍ້ມູນການເຄື່ອນຍ້າຍຖິ່ນຖານ ຂອງ ສປປ ລາວ; ການສະເໜີຜົນການສໍາຫລວດໂພຊະນາການໄລຍະກາງຂອງໂຄງການຫລຸດຜ່ອນຄວາມທຸກຍາກ ແລະ ການຂາດໂພຊະນາການໃນເຂດຊົນນະບົດ; ສໍາເລັດການສ້າງຄວາມອາດສາມາດ ແລະ ເຜີຍແຜ່ການຄົ້ນຄວ້າກ່ຽວກັບການຈັດຕັ້ງປະຕິບັດວຽກງານການປະເມີນສະພາບໂພຊະນາການໃນ ສປປ ລາວ; ສໍາເລັດການລົງເກັບກໍາຂໍ້ມູນ ເພື່ອພັດທະນາຫຼັກສູດ ແລະ ຈັດຝຶກອົບຮົມ ເພື່ອສ້າງຄວາມເຂັ້ມແຂງທາງດ້ານວິຊາການໃນການຕິດຕາມ ແລະ ປະເມີນໂຄງການລົງທຶນຂອງລັດ; ການຄົ້ນຄວ້າຂອບການຟື້ນຟູ ເສດຖະກິດຂອງ ສປປ ລາວ ແລະ ການຝຶກອົບຮົມດ້ານການຄົ້ນຄວ້າ ແລະ ສ້າງແຜນພັດທະນາເສດຖະກິດ-ສັງຄົມ ແລະ ການກໍານົດຕົວຊີ້ວັດສີຂຽວຂອງ ສປປ ລາວໃຫ້ພະນັກງານ ຈໍານວນ 11 ຫົວຂໍ້; ນອກຈາກນັ້ນ, ຍັງກໍາລັງ ຄົ້ນຄວ້າຢູ່ 3 ຫົວຂໍ້. ພ້ອມດຽວກັນນັ້ນ ຍັງໄດ້ເພີ່ມທະວີການສ້າງຄວາມເຂັ້ມແຂງດ້ານຄວາມຮູ້ຄວາມສາມາດໃຫ້ ແກ່ພະນັກງານວິຊາການດ້ານການຄົ້ນຄວ້າ, ແລກປ່ຽນທາງດ້ານວິຊາການຮ່ວມກັບອົງການຈັດຕັ້ງສາກົນ, ຄູ່ຮ່ວມພັດທະນາ ແລະ ສະຖາບັນອື່ນໆ ຢູ່ພາຍໃນ ແລະ ຕ່າງປະເທດຈໍານວນ 10 ອົງການ.