ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ອົງການອະນາໄມໂລກ (WHO) ໄດ້ເປີດເຜີຍບົດລາຍງານໂດຍລະບຸວ່າ: ປັນຍາປະດິດ (AI) ມີສັກກະຍະພາບໃນການປ່ຽນແປງການຮັກສາສຸຂະພາບ ແຕ່ຖ້າຫາກຮີບນຳມາໃຊ້ໂດຍບໍ່ເຮັດຄວາມເຂົ້າໃຈຢ່າງຊັດເຈນ ຄວາມສາມາດຂອງ AI ອາດຈະທຳລາຍຄົນເຈັບໄດ້.
WHO ກ່າວວ່າ: AI ມີຄວາມສາມາດຢ່າງຫຼວງຫຼາຍສຳລັບການເບິ່ງແຍງສຸຂະພາບ ແຕ່ມັນກໍມີຄວາມທ້າທາຍເຊັ່ນກັນ ໂດຍສະເພາະຢ່າງຍິ່ງໃນດ້ານຄວາມເປັນສ່ວນຕົວ ແລະ ສັກກະຍະພາບໃນການແກ້ໄຂບັນຫາທີ່ມີຢູ່. ອີກຢ່າງໜຶ່ງ, WHO ໄດ້ເຜີຍແຜ່ສື່ສິ່ງພິມໃໝ່ທີ່ມີລາຍລະອຽດຂໍ້ພິຈາລະນາດ້ານກົດລະບຽບບາງປະການກ່ຽວກັບ AI ເພື່ອສຸຂະພາບ ເພື່ອໃຫ້ເຈົ້າໜ້າທີ່ສາມາດສ້າງ ຫຼື ປັບໃຊ້ຄຳແນະນຳໃນການໃຊ້ງານໄດ້ ຊຶ່ງຄວາມພ້ອມໃຊ້ງານທີ່ເພີ່ມຂຶ້ນຂອງຂໍ້ມູນການເບິ່ງແຍງສຸຂະພາບ ແລະ ຄວາມກ້າວໜ້າຢ່າງວ່ອງໄວໃນເຕັກນິກການວິເຄາະຈະສົ່ງຜົນໃຫ້ເຄື່ອງມື AI ສາມາດປ່ຽນພາກສ່ວນສຸຂະພາບໄດ້. WHO ລະບຸຕື່ມວ່າ: AI ສາມາດເສີມສ້າງການທົດລອງທາງຄຣີນິກ ປັບປຸງການບົ່ງມະຕິ ແລະ ການປິ່ນປົວທາງການແພດ ຕະຫຼອດຈົນຮອດສົ່ງເສີມຄວາມຮູ້ ແລະ ທັກສະທາງການແພດ. ເຖິງຢ່າງໃດກໍຕາມ, ການຮີບນຳເອົາ AI ມາໃຊ້ໄວ ຊຶ່ງບາງຄັ້ງຜູ້ໃຊ້ບໍ່ມີຄວາມເຂົ້າໃຈທີ່ຖືກຕ້ອງກ່ຽວກັບການເຮັດວຽກຂອງເຕັກໂນໂລຊີນີ້ອາດຈະເປັນຜົນປະໂຫຍດ ຫຼື ເປັນອັນຕະລາຍຕໍ່ຄົນເຈັບ ແລະ ຜູ້ຊ່ຽວຊານໃນວິຊາຊີບ. ຂະນະທີ່ ທ່ານ ດຣ ເທໂດຣສ ອາດຮານອມ ເກເບຣເຢຊຸສ ຜູ້ອຳນວຍການ WHO ກ່າວເຕືອນເຖິງຄວາມທ້າທາຍທີ່ມາພ້ອມກັບການໃຊ້ຂໍ້ມູນດ້ານສຸຂະພາບ ເນື່ອງຈາກລະບົບ AI ສາມາດເຂົ້າເຖິງຂໍ້ມູນສ່ວນບຸກຄົນທີ່ລະອຽດອ່ອນ. ດັ່ງນັ້ນ, ມັນຈຶ່ງຈຳເປັນຕ້ອງມີຂອບກົດໝາຍທີ່ໝັ້ນຄົງ ເພື່ອຄຸ້ມຄອງຄວາມເປັນສ່ວນຕົວ ແລະ ຄວາມສົມບູນຂອງຂໍ້ມູນ.
ທັງນີ້, WHO ໄດ້ສະຫຼຸບບັນຫາສຳຄັນ 6 ປະການໃນການຄວບຄຸມ AI ເພື່ອສຸຂະພາບເຊັ່ນ: ການກວດສອບຂໍ້ມູນຈາກພາຍນອກ, ການປະເມີນລະບົບກ່ອນດຳເນີນການເຜີຍແຜ່, ການເບິ່ງຂໍ້ກຳນົດໃນການຍິນຍອມກ່ຽວກັບຄວາມເປັນສ່ວນຕົວຂອງຂໍ້ມູນ ລວມເຖິງການສົ່ງເສີມການຮ່ວມມືລະຫວ່າງໜ່ວຍງານເບິ່ງແຍງຄົນເຈັບ ແລະ ຜູ້ຊ່ຽວຊານດ້ານການເບິ່ງແຍງສຸຂະພາບ.
ຄໍາເຫັນ