ທ່ານ ເຈເຣມີ ຟາຣຣາຣ ຜູ້ຊ່ວຍຜູ້ອໍານວຍການໃຫຍ່ຂອງອົງການສົ່ງເສີມສຸຂະພາບ, ການປ້ອງກັນພະຍາດ ແລະ ການດູແລຂອງ WHO ກ່າວວ່າ: ຄວາມກົດດັນຈາກຄື້ນຄວາມຮ້ອນກຳລັງສົ່ງຜົນກະທົບທາງລົບຕໍ່ສຸຂະພາບ ແລະ ການດໍາລົງຊີວິດຂອງຄົນງານຫຼາຍຕື້ຄົນ, ໂດຍສະເພາະໃນຊຸມຊົນທີ່ມີຄວາມສ່ຽງທີ່ສຸດ ຊຶ່ງຄວາມສ່ຽງດ້ານສຸຂະພາບເຊັ່ນ: ໂຣກລົມແດດ, ການຂາດນໍ້າ, ໝາກໄຂ່ຫຼັງເຮັດວຽກຜິດປົກກະຕິ ແລະ ຄວາມຜິດປົກກະຕິທາງລະບົບປະສາດ ກໍາລັງທໍາລາຍສຸຂະພາບ ແລະ ສະຖຽນລະພາບທາງດ້ານເສດຖະກິດໃນໄລຍະຍາວຂອງຄົນງານໃນທົ່ວໂລກ ແລະປະມານເຄິ່ງໜຶ່ງຂອງປະຊາກອນທົ່ວໂລກແມ່ນປະສົບກັບຜົນກະທົບທາງລົບຈາກອຸນຫະພູມສູງ.
ທ່ານ ໂຄ ບາຣເຣັດ ຮອງເລຂາທິການຂອງອົງການອຸຕຸນິຍົມວິທະຍາໂລກ ກ່າວວ່າ: ຄວາມກົດດັນຂອງຄື້ນຄວາມຮ້ອນທີ່ເກີດຈາກການປະກອບອາຊີບກາຍເປັນສິ່ງທ້າທາຍລະດັບໂລກ ຊຶ່ງບໍ່ໄດ້ຈໍາກັດພຽງແຕ່ປະເທດທີ່ຢູ່ໃກ້ກັບເສັ້ນສູນສູດເທົ່ານັ້ນ, ເຫັນໄດ້ຢ່າງຊັດເຈນຈາກຄື້ນຄວາມຮ້ອນທີ່ເກີດຂຶ້ນໃນເອີຣົບເມື່ອບໍ່ດົນມານີ້ ແລະ ການປົກປ້ອງຄົນງານຈາກຄື້ນຄວາມຮ້ອນທີ່ຮຸນແຮງແມ່ນບໍ່ພຽງແຕ່ຈໍາເປັນສໍາລັບສຸຂະພາບເທົ່ານັ້ນ ແຕ່ຍັງເປັນສິ່ງຈໍາເປັນຕໍ່ເສດຖະກິດ ອີກດ້ວຍ.
ນອກຈາກນັ້ນ, ຄໍາແນະນໍາທາງດ້ານເຕັກນິກໄດ້ລະບຸວິທີການຂອງຫຼາຍພາກສ່ວນໃນການຫຼຸດຜ່ອນຄວາມສ່ຽງ, ລວມທັງການພັດທະນານະໂຍບາຍແຫ່ງຊາດ, ການຈັດລໍາດັບຄວາມສໍາຄັນຂອງກຸ່ມທີ່ມີຄວາມສ່ຽງ ແລະ ຊຸກຍູ້ການຮ່ວມມືລະຫວ່າງລັດຖະບານ, ນາຍຈ້າງ, ສະຫະພັນການຄ້າ ແລະ ຜູ້ຊ່ຽວຊານດ້ານສຸຂະພາບ.
ຄໍາເຫັນ