ສະຫະລັດ ອາເມຣິກາ ໄດ້ວາງອັດຕາພາສີທີ່ສູງຂຶ້ນໃນວັນທີ 7 ສິງຫາ ຜ່ານມາ ຊຶ່ງຄາດວ່າຈະສົ່ງຜົນກະທົບຕໍ່ການນຳເຂົ້າ ແລະ ສົ່ງອອກຂອງ ສະຫະລັດ ອາເມຣິກາ ຈາກຄູ່ຮ່ວມມືການຄ້າໃນເຄິ່ງທີ່ສອງ (ເດືອນກໍລະກົດ ຫາ ເດືອນທັນວາ) ຂອງປີ 2025 ແລະ ໃນປີ 2026.
WTO ຄາດຄະເນວ່າ: ການຄ້າສິນຄ້າທົ່ວໂລກຈະເຕີບໂຕໃນລະດັບ 0.9% ໃນປີ 2025, ປ່ຽນຈາກໂຕເລກທີ່ຄາດຄະເນໄວ້ກ່ອນໜ້ານີ້ໃນກາງເດືອນເມສາວ່າຈະຫຼຸດລົງ 0.2%, ພາຍຫຼັງ ສະຫະລັດ ອາເມຣິກາ ປະກາດການເກັບພາສີ ແລະ ໄດ້ໂຈະອັດຕາພາສີບາງລາຍການຊົ່ວຄາວເປັນເວລາ 90 ວັນ.
WTO ລະບຸວ່າ: ທ່າອ່ຽງການເຕີບໂຕທີ່ປັບປຸງໃໝ່ນີ້ສ່ວນໃຫຍ່ແມ່ນມີປັດໄຈມາຈາກການເລັ່ງນຳເຂົ້າສິນຄ້າຂອງ ສະຫະລັດ ອາເມຣິກາ ກ່ອນກໍານົດເວລາ, ແຕ່ເນັ້ນໜັກວ່າການຄາດຄະເນດັ່ງກ່າວຍັງຕໍ່າກວ່າໂຕເລກການຄາດຄະເນກ່ອນບັງຄັບໃຊ້ອັດຕາພາສີ 2.7% ຢ່າງຫຼວງຫຼາຍ.
ຫາກພິຈາລະນາຕາມພາກພື້ນ, ເສດຖະກິດຂອງອາຊີຈະຍັງຄົງເປັນປັດໄຈຂັບເຄື່ອນທາງບວກສໍາຄັນທີ່ສຸດຂອງການເຕີບໂຕຂອງການຄ້າສິນຄ້າທົ່ວໂລກໃນປີ 2025, ໃນຂະນະທີ່ ອາເມຣິກາເໜືອ ມີທ່າທີ່ຈະເຮັດໃຫ້ການເຕີບໂຕດ້ານການຄ້າທົ່ວໂລກຊ້າລົງໃນປີ 2025 ແລະ 2026.
ທ່ານ ເອັນໂກຊີ ໂອຄອນໂຈ - ອີເວຍລາ ຜູ້ອຳນວຍການໃຫຍ່ WTO ກ່າວວ່າ: ຄວາມບໍ່ແນ່ນອນດ້ານພາສີຍັງສືບຕໍ່ສົ່ງຜົນກະທົບຢ່າງໜັກໜ່ວງຕໍ່ຄວາມເຊື່ອໝັ້ນທາງທຸລະກິດ, ການລົງທຶນ ແລະຕ່ອງໂສ້ການສະໜອງ ແລະ ເປັນໜຶ່ງໃນບັນດາປັດໄຈທີ່ສ້າງຄວາມປັ່ນປ່ວນຫຼາຍທີ່ສຸດໃນສະພາບແວດລ້ອມການຄ້າທົ່ວໂລກ.
ຄໍາເຫັນ