(ໂດຍ: ຕະວິນຍານ)
ເພື່ອສືບຕໍ່ຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງ ສະໄໝທີ VII ໂດຍສະເພາະວຽກງານປ້ອງກັນຊາດ-ປ້ອງກັນຄວາມສະຫງົບຮອບດ້ານຂອງທົ່ວປວງຊົນ ທັງຮັບປະກັນສະຖຽນລະພາບທາງດ້ານການເມືອງຢ່າງໜັກແໜ້ນ, ພາຍໃນກໍມີຄວາມສະຫງົບປອດໄພໂດຍພື້ນຖານ, ປ້ອງກັນ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ດ້ານຕ່າງໆ ໃຫ້ເປັນຮູບປະທໍາຢ່າງແທ້ຈິງ.
ປີ 2024 ເປັນປີມ້ວນທ້າຍຂອງການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງ ສະໄໝທີ VII;ປະເທດເຮົາເປັນເຈົ້າພາບຈັດກອງປະຊຸມສຸດຍອດອາຊຽນ ຮັບປະກັນບໍ່ໃຫ້ມີເຫດການອັນບໍ່ດີເກີດຂຶ້ນ; ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ກ່າວຕໍ່ກອງປະຊຸມອົງການປົກຄອງແຂວງໄຊຍະບູລີເປີດກວ້າງ ຄັ້ງທີ II ປະຈໍາປີ 2023 ແລະ ວາງທິດທາງແຜນວຽກຈຸດສຸມໃນປີ 2024 ນີ້ວ່າ:ຈະສູ້ຊົນເຮັດໃຫ້ເສດຖະກິດເຕີບໂຕ ໃນລະດັບ 5,5% ຂຶ້ນໄປ, ລວມຍອດຜະລິດຕະພັນພາຍໃນ 15.700 ຕື້ກວ່າກີບ, ສະເລ່ຍຕໍ່ຫົວຄົນໃຫ້ໄດ້ 36 ລ້ານກີບຂຶ້ນໄປ ແລະ ເອົາໃຈໃສ່ແກ້ໄຂຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.ສຸມໃສ່ແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດຢ່າງແຂງແຮງ ເຮັດໃຫ້ບັນຫາຫຍຸ້ງຍາກຜ່ານມາໄດ້ຮັບການແກ້ໄຂເປັນຮູບປະທໍາ ແລະ ມີການຫັນປ່ຽນທີ່ຕັ້ງໜ້າ. ສືບຕໍ່ນໍາໃຊ້ເຄື່ອງມືທີ່ທັນສະໄໝ ເຂົ້າໃນການຄຸ້ມຄອງຈັດເກັບລາຍຮັບ-ລາຍຈ່າຍ ໃຫ້ມີປະສິດທິພາບສູງຂຶ້ນ. ສົ່ງເສີມການຜະລິດພາຍໃນໃຫ້ແຂງແຮງກວ່າເກົ່າ ເພື່ອທົດແທນການນໍາເຂົ້າ ໄປພ້ອມກັບການສຸມໃສ່ກໍ່ສ້າງ-ປັບປຸງໂຄງລ່າງພື້ນຖານຮັບໃຊ້ການຜະລິດ ແລະ ການບໍລິການທີ່ຈໍາເປັນ, ສົ່ງເສີມການເຂົ້າເຖິງການບໍລິການ, ແຫຼ່ງທຶນ, ເຕັກນິກ, ຕະຫຼາດ ຕາມທ່າແຮງບົ່ມຊ້ອນຂອງຂະແໜງການ ແລະ ທ້ອງຖິ່ນ ຄຽງຄູ່ກັບການປົກປັກຮັກສາ, ຟື້ນຟູຊັບພະຍາກອນທໍາມະຊາດ, ນໍ້າ, ດິນ ແລະ ປ່າໄມ້ ໃຫ້ມີຄວາມອຸດົມສົມບູນ ແລະ ເກີດປະໂຫຍດສູງສຸດແກ່ປະຊາຊົນ.ສ້າງຊັບພະຍາກອນມະນຸດຕ້ອງຮັບປະກັນປະລິມານ ແລະ ຄຸນນະພາບ ເພື່ອສະໜອງໃຫ້ແກ່ການພັດທະນາເສດຖະກິດ-ສັງຄົມ, ພ້ອມທັງສຸມໃສ່ຈັດຕັ້ງປະຕິບັດເປົ້າໝາຍ SDG ດ້ານການສຶກສາ ໃນການພັດທະນາແບບຍືນຍົງໃຫ້ບັນລຸຕາມຄາດໝາຍ.ສຸມໃສ່ພັດທະນາຂະແໜງສາທາລະນະສຸກ, ຂະແໜງແຮງງານ ແລະ ສະຫວັດດີການສັງຄົມ, ພັດທະນາວຽກງານຖະແຫຼງຂ່າວ ແລະ ວັດທະນະທໍາ, ກະກຽມຄວາມພ້ອມຈັດງານມະຫະກໍາບຸນຊ້າງ ແລະ ເປີດປີທ່ອງທ່ຽວລາວ 2024 ຢູ່ແຂວງໄຊຍະບູລີ. ສືບຕໍ່ການຮ່ວມມືກັບບັນດາປະເທດເພື່ອນມິດ ແລະ ຄູ່ຮ່ວມພັດທະນາ ໃຫ້ກວ້າງຂວາງ ເພື່ອຍາດແຍ່ງທຶນຮອນ, ເຕັກໂນໂລຊີເຂົ້າໃນການພັດທະນາເສດຖະກິດ-ສັງຄົມ ໃຫ້ຫຼາຍຂຶ້ນ ແລະ ແຂງແຮງກວ່າເກົ່າ.
ຄໍາເຫັນ