ໄຊຍະບູລີ ຕີລາຄາການຈັດຕັ້ງປະຕິບັດ ດ້ານການຄ້າ ແລະ ການຂົນສົ່ງ

ຄະນະກໍາມະການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງແຂວງໄຊຍະບູລີ ໄດ້ຈັດກອງປະຊຸມຕີລາຄາຄືນການຈັດຕັ້ງປະຕິບັດວຽກງານອໍານວຍຄວາມສະດວກທາງດ້ານການຄ້າ ແລະ ການຂົນສົ່ງປີ 2023 ແລະ ແຜນການ ປີ 2024 ຂຶ້ນທີ່ຫ້ອງປະຊຸມໂຮງແຮມພອນໄພລິນ ແຂວງໄຊຍະບູລີ ໃນວັນທີ 14 ມີນານຜ່ານມາ ໂດຍການເປັນປະທານຂອງທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ ຫົວໜ້າຊີ້ນໍາລວມຄະນະກໍາມະການອໍານວຍຄວາມສະດວກທາງດ້ານການຄ້າ ແລະ ຂົນສົ່ງແຂວງ, ມີບັນດາຫົວໜ້າ, ຮອງຫົວໜ້າພະແນກການ, ເຈົ້າເມືອງ, ຮອງເຈົ້າເມືອງ, ສະພາການຄ້າ ແລະ ອຸດສາຫະກໍາແຂວງ, ເມືອງເຂົ້າຮ່ວມ.
    ທ່ານ ຄໍາໄຊ ເລົາລືເຕຊາ ຫົວໜ້າພະແນກອຸດສາຫະກໍາ ແລະ ການຄ້າແຂວງໄດ້ໃຫ້ຮູ້ວ່າ: ໃນໄລຍະປີ 2023 ຜ່ານມາແຂວງໄຊຍະບູລີສົ່ງອອກສິນຄ້າໄປຕ່າງປະເທດມີມູນຄ່າທັງໝົດ 89,04 ລ້ານໂດລາເທົ່າກັບ 73,59%, ສິນຄ້າທີ່ສົ່ງອອກສ່ວນໃຫຍ່ແມ່ນຜົນຜະລິດກະສິກໍາເປັນຕົ້ນແມ່ນມັນຕົ້ນ, ສາລີ, ໝາກເດືອຍ, ໝາກກ້ວຍ, ໝາກໂມ, ຖົ່ວເຫຼືອງ, ຢາງພາລາ ແລະ ການນໍາເຂົ້າສິນຄ້າຈາກຕ່າງປະເທດມີມູນຄ່າ 53,09 ລ້ານໂດລາ ເທົ່າກັບ 44,58% ມີນໍ້າມັນເຊື້ອໄຟ, ເຄື່ອງອຸປະໂພກບໍ່ລິໂພກ, ແນວພັນ, ສັດ ແລະ ອຸປະກອນຮັບໃຊ້ການຜະລິດ. ທ່ານຍັງໄດ້ກ່າວຕື່ມວ່າ: ໃນປີຜ່ານມາ ພວກເຮົາຍັງໄດ້ຕັ້ງຈຸດກວດກາລົດຂົນສົ່ງສິນຄ້າຕາມເສັ້ນທາງຫຼວງແຫ່ງຊາດມາຮອດປັດຈຸບັນແມ່ນຮັກສາໄວ້ຄືຈຸດສົ້ນຂົວນໍ້າຂອງບ້ານທ່າເດືອເມືອງໄຊຍະບູລີ, ຈຸດສົ້ນຂົວນໍ້າຂອງເມືອງປາກລາຍ, ຈຸດສົ້ນຂົວນໍ້າຂອງບ້ານປາກແຄນເມືອງເງິນ ແລະ ຢູ່ປ້ອມຈຸດຕ່າງໆຂອງບັນດາເມືອງຕື່ມອີກ. ພ້ອມນີ້ ຜູ້ເຂົ້າຮ່ວມໄດ້ພ້ອມກັນປະກອບຄໍາຄິດຄໍາເຫັນຢ່າງກົງໄປກົງມາໃສ່ເນື້ອໃນບົດສະຫຼູບ ແລະ ທິດທາງແຜນການໃນຕໍ່ໜ້າ.
    (ຂ່າວ+ພາບ: ບຸນທີ)