ເຊກອງ ເອົາໃຈໃສ່ປັບປຸງ ແລະ ສະໜອງນໍ້າປະປາໃຫ້ພຽງພໍກັບຄວາມຕ້ອງການຂອງສັງຄົມ

ຕາມການລາຍງານຂອງທ່ານ ສຸລະພົນ ໝື່ນວິເສດ ຜູ້ອໍານວຍການລັດວິສາຫະກິດນໍ້າປະປາແຂວງເຊກອງ ກ່າວຕໍ່ກອງປະຊຸມສະຫຼຸບການຈັດຕັ້ງປະຕິບັດວຽກງານໂຍທາທິການ ແລະ ຂົນສົ່ງທົ່ວແຂວງເຊກອງປະຈໍາປີ 2023 ເມື່ອບໍ່ດົນມານີ້ວ່າ: ໃນປີ 2023 ຜ່ານມາ ລັດວິສາຫະກິດນໍ້າປະປາແຂວງເຊກອງ ໄດ້ເອົາໃຈໃສ່ປັບປຸງ-ກໍ່ສ້າງ ແລະ ສ້ອມແປງລະບົບນໍ້າປະປາ ເພື່ອສະໜອງນໍ້າໃຫ້ສັງຄົມໄດ້ຊົມໃຊ້ຢ່າງພຽງພໍ. ໃນນີ້, ໄດ້ປ່ຽນຖ່າຍທໍ່ທາງຂຶ້ນຕາດເຮ້ຍ, ຫົວງານບ້ານແບ່ງ, ແກ້ໄຂລະບົບໃສ່ໝໍ້ແທກນໍ້າໃຫຍ່, ໃສ່ປະຕູບີດັງ, ສ້ອມແປງປ່ຽນຖ່າຍລະບົບທໍ່ນໍ້າ, ປ່ຽນຖ່າຍໝໍ້ແທກນໍ້າ, ຕິດຕາມກວດກາ ແລະ ສ້ອມແປງເອົາແຫຼ່ງນໍ້າເຂົ້າສູ່ອ່າງເກັບນໍ້າ ເພື່ອເພີ່ມກຳລັງການຜະລິດຂອງໂຮງງານນໍ້າປະປາບ້ານແບ່ງໃຫ້ຫຼາຍຂຶ້ນ.
    ພ້ອມນີ້, ໄດ້ເອົາໃຈໃສ່ຈັດຈັ້ງປະຕິບັດໂຄງການກໍ່ສ້າງ ແລະ ປັບປຸງລະບົບນໍ້າປະປາ-ສຸຂະພິບານເມືອງລະມາມ, ໂຄງການກໍ່ສ້າງລະບົບນໍ້າປະປາ-ສຸຂາພິບານເມືອງດາກຈຶງ, ໂຄງການປັບປຸງ ແລະ ກໍ່ສ້າງເພີ່ມກໍາລັງການຜະລິດໂຮງງານນໍ້າປະປາຕາດເຮ້ຍຈາກ 2.000 ແມັດກ້ອນ/ວັນ ມາເປັນ 7.400 ແມັດກ້ອນ/ວັນ. ປັດຈຸບັນ ແຂວງເຊກອງ ມີໂຮງງານຜະລິດນໍ້າ 5 ແຫ່ງ ສາມາດຜະລິດນໍ້າປະປາ 1.725.656 ແມັດກ້ອນ, ບໍລິມາດນໍ້າສົ່ງອອກ 1.573.309 ແມັດກ້ອນ ທຽບໃສ່ແຜນປີປະຕິບັດໄດ້ 99%. ໃນນີ້, ຈໍາໜ່າຍໄດ້ 1.178.301 ແມັດກ້ອນ ທຽບໃສ່ແຜນປະຕິບັດໄດ້ 97% ແລະ ບໍລິມາດນໍ້າສູນເສຍ 385.008 ແມັດກ້ອນກວມ 25%.
    ທ່ານ ສຸລິພົນ ໝື່ນວິເສດ ໃຫ້ຮູ້ຕື່ມອີກວ່າ: ໃນໄລຍະຜ່ານມາ ການສະໜອງນໍ້າປະປາທົ່ວແຂວງ ຍັງບໍ່ທັນພຽງພໍກັບຄວາມຕ້ອງການຂອງສັງຄົມ ແມ່ນມີຫຼາຍສາເຫດ ຍ້ອນລະບົບໂຄງລ່າງນໍ້າປະປາຈໍານວນໜຶ່ງເກົ່າແກ່-ຊໍາລຸດເປ່ເພ; ການວາງທໍ່ບໍ່ໄດ້ມາດຖານ; ຜົນກະທົບຈາກໂຄງການກໍ່ສ້າງໃໝ່ເຮັດໃຫ້ນໍ້າແຕກຮົ່ວ (ບໍ່ຮູ້ບ່ອນ, ບໍ່ຮູ້ຈຸດ ບໍ່ຮູ້ສາເຫດ) ເຮັດໃຫ້ເກີດມີນໍ້າສູນເສຍ ແລະ ແຮງດັນຫຼຸດລົງຫຼາຍ ຖ້າທຽບໃສ່ການກໍ່ສ້າງແມ່ນບໍ່ສາມາດສົ່ງນໍ້າໄດ້ທົ່ວເຖິງ ໂດຍສະເພາະເຂດນາວາ, ເຂດປາກໂທນ ແມ່ນບໍ່ມີນ້ຳໃຊ້.
ຂ່າວ-ພາບ: ພຸດທະສອນ