 |
ຮ່ວມລົງນາມໃນຄັ້ງນີ້ ລະຫວ່າງ ທ່ານ ນາງ ມະນີສາຄອນ ທໍາມະວົງໄຊ ຫົວໜ້າກົມສົ່ງເສີມຕະຫຼາດການທ່ອງທ່ຽວ, ທ່ານ ນາງ ແສງອາລຸນ ສີລາວັນ ອໍານວຍການບໍລິສັດ HTH ການຄ້າຂາອອກ - ຂາເຂົ້າ ຈໍາກັດຜູ້ດຽວ, ທ່ານ ວິທະຍາ ວັງຊັບມັງກອນ ປະທານຜູ້ບໍລິຫານ ບໍລິສັດ ແມັດ ຈໍາກັດຜູ້ດຽວ ແລະ ທ່ານ ຫັດ ວາດວານີ ຜູ້ອໍານວຍການ ສູນການສຶກສາ LS ໂດຍເປັນກຽດເຂົ້າຮ່ວມຂອງທ່ານ ຄໍາພູ ເພັຍສັກຂາ ຫົວໜ້າກົມແຜນການ ແລະ ການຮ່ວມມືສາກົນ ກະຊວງ ວທ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
 |
ສປປ ລາວ ອຸດສາຫະກຳການທ່ອງທ່ຽວ ຖືເປັນຂະແໜງການເສດຖະກິດປາຍແຫຼມ ທີ່ເປັນກຳລັງແຮງສຳຄັນໃນການຂັບເຄື່ອນເສດຖະກິດ-ສັງຄົມ ຂອງ ສປປ ລາວ. ເພື່ອໃຫ້ສາມາດບັນລຸແຜນພັດທະນາວຽກງານ ວທ ສົກປີ 2026-2030 ແລະ ຮັບປະກັນໃຫ້ຂະແໜງການທ່ອງທ່ຽວຂອງລາວເຮົາເຕີບໃຫຍ່ຂະຫຍາຍຕົວຢ່າງມີຄຸນນະພາບ, ມີຄວາມເຂັ້ມແຂງ ຕາມທິດສີຂຽວ ແລະ ຍືນຍົງ, ຈໍາເປັນຕ້ອງມີການຫັນປ່ຽນ ແລະ ພັດທະນາວຽກງານການທ່ອງທ່ຽວ ໃຫ້ມີຄວາມທັນສະໄໝ, ຍືນຍົງ ແລະ ມີສ່ວນຮ່ວມຈາກທຸກພາກສ່ວນໃນສັງຄົມ ໂດຍສະເພາະມີການປະສານງານຢ່າງກົມກຽວ ແລະ ຕໍ່ເນື່ອງລະຫວ່າງທຸກພາກສ່ວນທີ່ກ່ຽວຂ້ອງ ທັງພາກລັດ ແລະ ພາກທຸລະກິດ ນັບແຕ່ຂັ້ນສູນກາງ ຈົນຮອດຂັ້ນທ້ອງຖິ່ນ.
|
ທ່ານ ວົງເດືອນ ແກ້ວສຸລິວົງ ຮອງຫົວໜ້າກົມສົ່ງເສີມຕະຫຼາດການທ່ອງທ່ຽວ ກ່າວວ່າ: ການລົງນາມໃນຄັ້ງນີ້, ຖືເປັນບາດກ້າວອັນສຳຄັນ ແລະ ເປັນຂີດໝາຍໜຶ່ງຂອງການຮ່ວມມື ລະຫວ່າງພາກລັດ ແລະ ພາກເອກະຊົນ ເພື່ອຍົກລະດັບວຽກງານສົ່ງເສີມຕະຫຼາດການທ່ອງທ່ຽວລາວ ຊຶ່ງປະກອບມີ 3 ໜ້າວຽກໃຫຍ່ຄື: 1. ການສົ່ງເສີມເອກະລັກທາງດ້ານວັດທະນະທຳ ຜ່ານຜະລິດຕະພັນ: ພວກເຮົາຮ່ວມມືກັບບໍລິສັດ HTH ການຄ້າ ຂາອອກ-ຂາເຂົ້າ ຈຳກັດຜູ້ດຽວ ໃນການພັດທະນາ ແລະ ຜະລິດເຄື່ອງທີ່ລະນຶກ ໂດຍນຳໃຊ້ສັນຍາລັກ "ຊ້າງເຜືອກ" ທີ່ເປັນມູນເຊື້ອອັນດີງາມຂອງຊາດ ຊຶ່ງບໍ່ພຽງແຕ່ເປັນການສ້າງມູນຄ່າເພີ່ມທາງເສດຖະກິດ, ແຕ່ຍັງເປັນການເຜີຍແຜ່ເອກະລັກຄວາມເປັນລາວ ໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ໄດ້ຮັບຮູ້ຢ່າງກວ້າງຂວາງ; 2. ການຫັນການທ່ອງທ່ຽວສູ່ລະບົບທີ່ທັນສະໄໝ (Digital Tourism): ພວກເຮົາຮ່ວມມືກັບ ບໍລິສັດ ແມັດ ຈຳກັດຜູ້ດຽວ ເພື່ອພັດທະນາແພລັດຟອມດີຈີຕອນ ລວມເຖິງເວັບໄຊ Meekula.com ແລະ ແອັບພລິເຄຊັນການທ່ອງທ່ຽວ. ໂຄງການນີ້ ຈະຊ່ວຍອໍານວຍຄວາມສະດວກໃຫ້ແກ່ນັກທ່ອງທ່ຽວສາມາດຮັບຮູ້ ແລະ ເຂົ້າເຖິງຂໍ້ມູນຂ່າວສານການທ່ອງທ່ຽວລາວ ໄດ້ຢ່າງວ່ອງໄວ, ຖືກຕ້ອງ, ທັນກັບສະພາບການ ແລະ ເປັນການສ້າງຊ່ອງທາງໃຫ້ບັນດາຜູ້ປະກອບການທຸລະກິດການທ່ອງທ່ຽວໃນລາວ ສາມາດໂຄສະນາການບໍລິການຂອງຕົນແບບບໍ່ເສຍຄ່າໃຊ້ຈ່າຍ; 3. ການພັດທະນາຊັບພະຍາກອນມະນຸດ ແລະ ຄວາມເປັນມືອາຊີບ: ພວກເຮົາຮ່ວມມືກັບສູນການສຶກສາ ແອວເອສ (LS Education) ໃນການຍົກລະດັບຄວາມຮູ້ຄວາມສາມາດທາງດ້ານວິຊາການ ໂດຍສະເພາະພາສາຕ່າງປະເທດ ແລະ ການຕະຫຼາດການ ທ່ອງທ່ຽວໃຫ້ພະນັກງານ, ພ້ອມທັງຊ່ວຍປັບປຸງເນື້ອໃນສື່ໂຄສະນາການທ່ອງທ່ຽວຂອງລາວໃຫ້ມີຄວາມດຶງດູດໃຈ, ມີເນື້ອໃນເລິກເຊິ່ງ ແລະ ມີມາດຕະຖານໃນລະດັບສາກົນ.
(ຂ່າວ-ພາບ: ວັນເພັງ)
ຄໍາເຫັນ