ຂອງໂຄງການຖານເຊື່ອມຕໍ່ພະລັງງານສະອາດ ພາກເໜືອລາວ ໄລຍະທີ II ລະຫວ່າງ ລັດຖະບານລາວ ກັບ ບໍລິສັດຊີຈີເອັນເອເນີຈີເຕັກໂນໂລຊີ (ລາວ) ຈໍາກັດ ຈັດຂຶ້ນໃນວັນທີ 20 ມີນາ ຜ່ານມາທີ່ນະຄອນຫຼວງວຽງຈັນໂດຍການເຂົ້າຮ່ວມເປັນສັກຂີພິຍານຂອງ ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ຫວາງຊາງ ອຸປະທູດ ສະຖານເອກອັກຄະລັດຖະທູດ ສປ ຈີນ ປະຈຳລາວ.
ໂຄງການໄລຍະທີ II ໂຄງການໄຟຟ້າພະລັງງານລົມ ແມ່ນຈະຊ່ວຍເສີມໂຄງການໄລຍະທີ I ໂຄງການໄຟຟ້າພະລັງງານແສງຕາເວັນ 1.000 MW ທີ່ໄດ້ເລີ່ມດຳເນີນການກໍ່ສ້າງແລ້ວ ໂດຍຈະຊ່ວຍເພີ່ມປະສິດທິພາບ ໃນການນຳໃຊ້ລະບົບສາຍສົ່ງໄຟຟ້າ ແລະ ພັດທະນາຖານພະລັງງານສະອາດ ແບບປະສົມປະສານຂະໜາດໃຫຍ່ ໃຫ້ເຂັ້ມແຂງອີກກ້າວໜຶ່ງ.
ທ່ານ ໂພໄຊ ໄຊຍະສອນ ໄດ້ມີຄໍາເຫັນໃນພິທີວ່າ: ໂຄງການຖານເຊື່ອມຕໍ່ພະລັງງານສະອາດ ຂອງບໍລິສັດຊີຈີເອັນ ຢູ່ພາກເໜືອຂອງລາວ ເປັນໜຶ່ງຜົນສຳເລັດອັນໃຫຍ່ຂອງສອງປະເທດ ໃນການລົງເລິກການຮ່ວມມືຕົວຈິງ ແລະ ຮ່ວມກັນສ້າງ "ໜຶ່ງແລວໜຶ່ງເສັ້ນທາງ" ສືບຕໍ່ຈາກໂຄງການທາງລົດໄຟລາວ-ຈີນ. ນອກນັ້ນ, ຍັງເປັນໂຄງການພະລັງງານຍຸດທະສາດ ເພິ່ງພາອາໄສກັນກັບໂຄງການສາຍສົ່ງລາວ-ຈີນ 500 kV. ຫວັງວ່າບໍລິສັດຊີຈີເອັນລາວ ຈະສືບຕໍ່ຮັກສາມູນເຊື້ອການຈັດຕັ້ງປະຕິບັດວຽກງານທີ່ດີຄືດັ່ງຜ່ານມາ, ປະກອບສ່ວນເຂົ້າໃນການພັດທະນາສັງຄົມຢ່າງຕັ້ງໜ້າ,ສະໜັບສະໜູນວຽກງານຂົງເຂດການສຶກສາ,ສາທາລະນະສຸກ, ສ້າງພື້ນຖານໂຄງລ່າງ ແລະ ອື່ນໆ ໃຫ້ຫຼາຍຂຶ້ນກວ່າເກົ່າ ເພື່ອສ້າງຄວາມຜາສຸກໃຫ້ແກ່ຊຸມຊົນເຂດໂຄງການຕັ້ງຢູ່; ເພື່ອເພີ່ມທະວີການພົວພັນຮ່ວມມື ກັບບັນດາອົງການລັດ, ຊຸກຍູ້ໂຄງການພະລັງງານສະອາດ ໃຫ້ກາຍເປັນຮູບປະທຳຫຼາຍຂຶ້ນ, ກໍ່ສ້າງໂຄງການພະລັງງານສະອາດ ພາກເໜືອຂອງລາວ ເພື່ອເປັນຕົ້ນແບບໃຫ້ແກ່ໂຄງການພະລັງງານສະອາດ ໃນເຂດແມ່ນໍ້າຂອງ-ແມ່ນໍ້າລ້ານຊ້າງ, ເປັນການຂະຫຍາຍການເຊື່ອມຕໍ່ເຄືອຂ່າຍໄຟຟ້າ ແລະ ການແລກປ່ຽນກະແສໄຟຟ້າ ລະຫວ່າງລາວ ກັບປະເທດເພື່ອນບ້ານ, ສົ່ງເສີມໃຫ້ປະເທດລາວ ກາຍເປັນສູນກາງການເຊື່ອມຕໍ່ ແລະ ແລກປ່ຽນພະລັງງານໄຟຟ້າ ທີ່ສຳຄັນຂອງພາກພື້ນ; ໃຫ້ຄວາມສຳຄັນຕໍ່ກັບການຕອບສະໜອງຄວາມຕ້ອງການ ດ້ານພະລັງງານໄຟຟ້າໃນ ສປປ ລາວ ທີ່ນັບມື້ນັບຫຼາຍຂຶ້ນ, ເພື່ອເປັນການສະໜັບສະໜູນການພັດທະນາເສດຖະກິດ-ສັງຄົມລາວ ແລະ ເປັນການປະກອບສ່ວນອັນໃຫຍ່ຫຼວງ ເຂົ້າໃນການສ້າງ-ຍົກລະດັບ ຄູ່ຮ່ວມຊາຕາກຳຂອງສອງຊາດ ລາວ-ຈີນ ໃຫ້ມີມາດຕະຖານ ແລະ ຄຸນນະພາບທີ່ສູງຂຶ້ນ.
ທ່ານ ຈ່າງຊາວສຸນ ປະທານບໍລິຫານບໍລິສັດຈີຊີເອັນ ພະລັງງານສາກົນ ໄດ້ກ່າວວ່າ: ການພົວພັນ ລາວ-ຈີນ ພວມຢູ່ໃນຈຸດເລີ່ມຕົ້ນປະຫວັດສາດໃໝ່ການຮ່ວມກັນສ້າງ "ໜຶ່ງແລວໜຶ່ງເສັ້ນທາງ" ຄຸນນະພາບສູງ ແລະ ສ້າງ "ຄູ່ຮ່ວມຊາຕາກຳລາວ-ຈີນ" ໄດ້ກາຍເປັນຄວາມເຫັນດີເຫັນພ້ອມ ທີ່ສຳຄັນຂອງສອງພັກ ແລະ ສອງປະເທດ. ບໍລິສັດຈີຊີເອັນ ຈະສືບຕໍ່ຍຶດໝັ້ນໃນຫຼັກການ "ຮ່ວມຄິດຮ່ວມສ້າງຮ່ວມແບ່ງປັນ" ແລະ ເພື່ອເປັນການຊຸກຍູ້ ການພັດທະນາ-ການກໍ່ສ້າງໂຄງການຖານເຊື່ອມຕໍ່ພະລັງງງານສະອາດ ພາກເໜືອຂອງລາວ ໃຫ້ມີຄຸນນະພາບສູງໂດຍຢຶດໝັ້ນແນວທາງການເຮັດວຽກ: "ເຄັ່ງຄັດເຂັ້ມງວດ, ລະມັດລະວັງ, ລະອຽດຮອບຄອບ, ເຮັດແທ້ທໍາຈິງ, ນໍາໃຊ້ຄວາມໄດ້ປຽບຂອງພະລັງງານສົ່ງເສີມກັນ ແລະ ກັນ, ປະສົມປະສານການພັດທະນາພະລັງງານປະເພດຕ່າງໆເຊັ່ນ: ພະລັງແສງຕາເວັນ, ພະລັງງານລົມ, ພະລັງງານຊີວະມວນ ແລະ ອື່ນໆ ເພື່ອຫຼຸດຜ່ອນຄວາມກົດດັນຕໍ່ຕາຂ່າຍໄຟຟ້າ ແລະ ປັບປຸງຜົນປະໂຫຍດທາງດ້ານເສດຖະກິດໂດຍລວມ. ລົງເລິກການປະສານສົມທົບຂອງຕ່ອງໂສ້ອຸດສາຫະກຳ, ສະໜອງຄວາມໄດ້ປຽບດ້ານອຸປະກອນພະລັງງານໃໝ່, ເຕັກໂນໂລຊີ ແລະ ການບໍລິການ, ຊ່ວຍ ສປປ ລາວ ພັດທະນາຂະແໜງພະລັງງານສະອາດ ແລະ ບຸກຄະລາກອນໃນທ້ອງຖິ່ນ, ຕັ້ງໜ້າຕອບສະໜອງຄໍາສະເໜີຂອງລັດຖະບານລາວ, ຈັດຕັ້ງໂຄງການພະລັງງານສະອາດ ທີ່ເໝາະສົມກັບການຊົມໃຊ້ໃນທ້ອງຖິ່ນ, ຕາມຄວາມຕ້ອງການພະລັງງານຂອງທ້ອງຖິ່ນ ແລະ ເງື່ອນໄຂການກໍ່ສ້າງຕາຂ່າຍ, ປະສົມປະສານເຂົ້າໃນລະບົບຖານພະລັງງານສະອາດຂະໜາດໃຫຍ່, ຊ່ວຍພັດທະນາເສດຖະກິດ ແລະ ສັງຄົມພາຍໃນຂອງ ສປປ ລາວ.
(ຂ່າວ: ຂປລ)
ຄໍາເຫັນ