ຫົວໜ້າການເມືອງກອງບັນຊາການທະຫານແຂວງ ແລະ ທ່ານ ຄໍາຫຼ້າ ດວງພະສຸກ ປະທານບໍລິສັດ ດວງພະສຸກ ກໍ່ສ້າງ ສ້ອມແປງຂົວ-ທາງ, ເຄຫາສະຖານ ແລະ ຊົນລະປະທານ ຈຳກັດຜູ້ດຽວ ໂດຍມີ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ແລະ ພາກສ່ວນກ່ຽວຂ້ອງສອງຝ່າຍເຂົ້າຮ່ວມ.
ໂຄງການກໍ່ສ້າງ ອະນຸສອນສະຖານບັ້ນຮົບນໍ້າບາກ ເມືອງນ້ຳບາກ ແຂວງຫຼວງພະບາງ ແມ່ນ ບໍລິສັດ ດວງພະສຸກ ກໍ່ສ້າງສ້ອມແປງຂົວ-ທາງ, ເຄຫາສະຖານ ແລະ ຊົນລະປະທານ ຈໍາກັດຜູ້ດຽວ ເປັນຜູ້ຮັບເໝົາກໍ່ສ້າງ ໃນມູນຄ່າທັງໝົດ ເກືອບ 20 ຕື້ກີບ ໂດຍມີການກໍ່ສ້າງເປັນສັນຍາແຕ່ລະໄລຍະ. ສະເພາະໄລຍະທີ 1 ອົງການປົກຄອງແຂວງ ເຫັນດີໃຫ້ເຊັນສັນຍາກັບຜູ້ຮັບເໝົາ ໃນມູນຄ່າ 4 ຕື້ກີບ ຕາມມະຕິຂອງຄະນະປະຈຳສະພາປະຊາຊົນແຂວງ ວ່າດ້ວຍການຮັບຮອງເອົາການສະເໜີຂໍນຳໃຊ້ຮ່ວງເງິນເກີນແຜນ ປີ 2023 ຂອງແຂວງ, ສ່ວນມູນຄ່າຍັງເຫຼືອ ແມ່ນຈະສືບຕໍ່ຈັດຕັ້ງປະຕິບັດ ພາຍຫຼັງລັດຖະບານໄດ້ອະນຸມັດ ຫຼື ມີການຮັບຮອງຈາກສະພາ ໃນການຈັດຕັ້ງປະຕິບັດ.
ໂຄງການດັ່ງກ່າວ ເປັນໂຄງການໜຶ່ງທີ່ມີຄວາມໝາຍສຳຄັນທາງດ້ານການເມືອງ ແລະ ປະຫວັດ ສາດຂອງຊາດລາວ ເພື່ອຫວນຄືນມູນເຊື້ອການຕໍ່ສູ້ກູ້ຊາດ ອັນພິລະອາດຫານຂອງນັກຮົບປະຕິວັດ ໃນພາລະກິດຕໍ່ສູ້ປົດປ່ອຍຊາດ ເພື່ອຄວາມຢູ່ເຢັນເປັນສຸກ ຂອງປະຊາບັນດາເຜົ່າ ກໍຄື ປະຊາຊົນແຂວງຫຼວງພະບາງໃນປັດຈຸບັນ. ພ້ອມນີ້, ກໍເພື່ອສ້າງເປັນແຫຼ່ງທ່ອງທ່ຽວທາງປະຫວັດສາດ, ເປັນບ່ອນຮຽນຮູ້ປູກຈິດສຳນຶກໃຫ້ຄົນຮຸ່ນຫຼັງ ເຫັນໄດ້ຄວາມໝາຍຄວາມສໍາຄັນຂອງໂຄງການ.
(ຂ່າວ: ແຂວງຫຼວງພະບາງ)
ຄໍາເຫັນ