ຈາກກໍລະນີມີຜູ້ນໍາໃຊ້ສື່ສັງຄົມອອນລາຍ ໂດຍສະເພາະແມ່ນຖ່າຍຄລິບລົງເຟສບຸກ ກ່ຽວກັບການບໍລິ ການຢູ່ສວນສາທາລະນະແຄມຂອງ ນະຄອນປາກເຊ ແຂວງຈໍາປາສັກ ເຮັດໃຫ້ສັງຄົມມີຄວາມສັບສົນ ແລະ ເຂົ້າໃຈໄປໃນທາງທີ່ບໍ່ສ້າງສັນ. ດັ່ງນັ້ນ, ໃນວັນທີ 28 ກໍລະກົດຜ່ານມາ, ທ່ານ ສີທົນ ແກ້ວພູວົງ ທີ່ປຶກສາກຸ່ມບໍລິສັດ ຈໍາປາຄໍາ ໃນຖານະຜູ້ຄຸ້ມຄອງ, ປົກປັກຮັກສາ ແລະ ພັດທະນາ ໄດ້ຊີ້ແຈງຜ່ານສື່ມວນຊົນວ່າ: ໂຄງການພັດທະນາຈັດສັນ, ຄຸ້ມຄອງ ແລະ ບູລະນະສວນສາທາລະນະແຄມຂອງ ຢູ່ນະຄອນປາກເຊ ແລະ ເມືອງໂພນທອງ ໄດ້ສຶກສາສຳຫຼວດຄວາມເປັນໄປໄດ້ຂອງໂຄງການໃນເດືອນທັນວາ 2018 ແລະ ໄດ້ເຊັນສັນຍາສໍາປະທານໂຄງການໃນຕົ້ນເດືອນກັນຍາ 2023; ກິດຈະກໍາຕົ້ນຕໍຂອງໂຄງການປະກອບມີ ຕະຫຼາດກາງຄືນ, ຕະຫຼາດຫ້ອງແຖວຖາວອນ, ຮ້ານກາເຟ, ຮ້ານອາຫານ, ຮ້ານຂາຍເຄື່ອງທີ່ລະນຶກ, ໃນນັ້ນ ຕະຫຼາດກາງຄືນ ແລະ ສວນສະໜຸກ ໄດ້ອອກແບບໃຫ້ມີຄວາມທັນສະໄໝ, ສາມາດຮອງຮັບຜູ້ປະກອບການຊື້-ຂາຍ, ສາມາດຈັດຂາຍຍ່ອຍ ຂະໜາດນ້ອຍຕ່າງໆໄດ້ຕາມຄວາມເໝາະສົມ, ໃຫ້ບໍລິການຊື້-ຂາຍ ແຕ່ເວລາ 17 ໂມງ ຫາ 22 ໂມງ. ພ້ອມນີ້, ກໍໄດ້ມີການເກັບມ້ຽນໃຫ້ມີຄວາມສະອາດ ເພື່ອໃຫ້ສາມາດບໍລິການຜູ້ຊື້, ນັກທ່ອງທ່ຽວ ໂດຍເນັ້ນສິນຄ້າທີ່ຜະລິດພາຍໃນແຂວງ ເພື່ອເປັນການສົ່ງເສີມການຜະລິດຂອງປະຊາຊົນ.
ທ່ານ ສີທົນ ແກ້ວພູວົງ ກ່າວຕື່ມວ່າ: ການບໍລິການຢູ່ສວນສາທາລະນະແຄມຂອງ ໄດ້ວາງລະບຽບໃນການຄຸ້ມຄອງ ໂດຍສະເພາະຫ້າມບໍ່ໃຫ້ຂັບລົດເຂົ້າມາໃນບໍລິເວນຕະຫຼາດ, ຫ້າມບໍ່ໃຫ້ຂັບລົດທຸກຊະນິດຂຶ້ນຄູກັນນໍ້າແຄມຂອງ ແລະ ຫ້າມເອົາລົດທຸກຊະນິດເຂົ້າໃນສວນສາທາລະນະ ເພາະວ່າທາງບໍລິສັດໄດ້ມີບ່ອນຈອດລົດຈັກ ແລະ ລົດໃຫຍ່ໄວ້ຄອຍບໍລິການ, ໃນກໍລະນີທີ່ລູກຄ້າເອົາລົດໄຟຟ້າມາເອງ ທາງບໍລິສັດອະນຸຍາດໃຫ້ຂີ່ຢູ່ບໍລິເວນເບື້ອງໃຕ້ຂອງສວນສາທາລະນະ. ຈຸດປະສົງເພື່ອຫຼີກເວັ້ນບໍ່ໃຫ້ເກີດອຸບັດເຫດຕໍ່ປະຊາຊົນທີ່ມາໃຊ້ບໍລິການໃນສວນສາທາລະນະ.
ຍ້ອນແນວນັ້ນ, ຢູ່ບໍລິເວນນີ້ຈຶ່ງມີການກວດກາຢ່າງເຂັ້ມງວດ. ນອກນັ້ນ, ພາຍໃນຕະຫຼາດ ຍັງມີສວນສະໜຸກຂະໜາດນ້ອຍ ແລະ ມີບໍລິການລົດຊິ້ງໄຟຟ້າ ເພື່ອບໍລິການລູກຄ້າຜູ້ມາທ່ອງທ່ຽວ, ຜູ້ເຮັດໜ້າທີ່ໃນການບໍລິການ ກໍຄືລູກຈ້າງຂອງບໍລິສັດ ເປັນຄົນຫວຽດນາມ ຊຶ່ງຖືພັດສະປອດຕ່າງດ້າວ ທີ່ສາມາດປະກອບອາຊີບຢູ່ລາວຢ່າງຖືກຕ້ອງຕາມລະບຽບກົດໝາຍ. ກໍລະນີທີ່ນັກທ່ອງທ່ຽວຜູ້ມາທ່ຽວຊົມ ຫຼື ລູກຄ້າທີ່ມາທ່ຽວຫຼິ້ນ, ມາໃຊ້ບໍລິການ ຖ້າມີອັນໃດບໍ່ເຂົ້າໃຈ ກໍສາມາດຕິດຕໍ່ສອບຖາມນໍາພະນັກງານຜູ້ເຮັດໜ້າທີ່ບໍລິການ ແລະ ຮ້ານຂາຍເຄື່ອງພາຍໃນຕະຫຼາດໄດ້.
ໃນຕໍ່ໜ້ານີ້, ທາງບໍລິສັດ ຈະເອົາໃຈໃສ່ສ້າງປ້າຍຫ້າມ ແລະ ປ້າຍເຕືອນຕ່າງໆຕາມແຕ່ລະຈຸດໃຫ້ລະອຽດຈະແຈ້ງ ເພື່ອສ້າງຄວາມຮັບຮູ້-ເຂົ້າໃຈໃຫ້ຜູ້ທີ່ມາທ່ຽວຊົມ. ນອກນີ້, ກໍຈະໄດ້ຝຶກອົບຮົມທັກສະ, ວິທີການ ແລະ ເຕັກນິກໃນການບໍລິການໃຫ້ພະນັກງານທີ່ເຮັດໜ້າທີ່ບໍລິການຢູ່ສວນສາທາລະນະແຄມຂອງ ເພື່ອບໍລິການແຂກຄົນໃຫ້ນັບມື້ດີຂຶ້ນເລື້ອຍໆ. ຂ່າວ-ພາບ: ທູນທອງໃຈ
ຄໍາເຫັນ