ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ຂຶ້ນຊີ້ແຈງບັນຫາຂ້າງເທິງນັ້ນ ຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ IX ໃນວັນທີ 17 ພະຈິກນີ້ ທີ່ຫໍສະພາແຫ່ງຊາດ ໂດຍການເປັນປະທານຂອງ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ; ທ່ານ ລັດຖະມົນຕີກະຊວງການເງິນ ໄດ້ຊີ້ແຈງວ່າ: ການຫັກລົບມູນຄ່າໂຄງການ ແມ່ນມີ 693 ໂຄງການ ມູນຄ່າ 3,675 ຕື້ກີບ, ສາມາດແກ້ໄຂໄດ້ 189 ໂຄງການ ມູນຄ່າ 1,329 ຕື້ກີບ. ສ່ວນທີ່ເຫຼືອ ຍັງບໍ່ທັນເອກະພາບ ຕໍ່ມູນຄ່າຫັກລົບໂຄງການ ຕາມຜົນການກວດກາ ລະຫວ່າງ ຜູ້ຮັບເໝົາ ແລະ ຄະນະກວດກາຈາກອົງການກວດກາແຫ່ງລັດ.
ສ່ວນການແກ້ໄຂໂຄງການນອກແຜນ, ທ່ານ ສັນຕິພາບ ພົມວິຫານ ຊີ້ແຈງວ່າ: ໂຄງການທັງໝົດ ມີ 98 ໂຄງການ ມູນຄ່າ 1,001 ຕື້ກີບ, ສາມາດແກ້ໄຂໄດ້ 64 ໂຄງການ ມູນຄ່າ 240 ຕື້ກີບ. ສ່ວນທີ່ເຫຼືອ ຍັງບໍ່ສາມາດດຳເນີນໄດ້ໄວ ເນື່ອງຈາກເປັນໂຄງການແກ່ຍາວມາດົນ, ງົບປະມານຂອງຂະແໜງການ ແລະ ທ້ອງຖິ່ນ ມີຈໍາກັດ. ພ້ອມນັ້ນ, ເຈົ້າຂອງໂຄງການ ກໍບໍ່ສາມາດຕອບສະໜອງເອກະສານໄດ້.
ໂອກາດນີ້, ທ່ານ ສັນຕິພາບ ພົມວິຫານ ຍັງໄດ້ສະເໜີທິດທາງໃນຕໍ່ໜ້າ ໂດຍໄດ້ສະເໜີໃຫ້ຂະແໜງການ ແລະ ທ້ອງຖິ່ນທີ່ກ່ຽວຂ້ອງ ເພີ່ມທະວີຄວາມເປັນເຈົ້າການໃນການປະຕິບັດຜົນການກວດກາ, ພ້ອມນັ້ນກໍໃຫ້ຮີບຮ້ອນລາຍງານ ແລະ ສົມທົບກັບອົງການກວດກາແຫ່ງລັດ ເພື່ອກວດກາ ແລະ ຢັ້ງຢືນຄືນຄວາມຖືກຕ້ອງ ແລ້ວສົ່ງໃຫ້ກະຊວງການເງິນ ດໍາເນີນການຕາມລະບຽບການ. ສຳລັບໂຄງການທີ່ຂຶ້ນກັບຄຸ້ມຄອງຂອງທ້ອງຖິ່ນ, ກໍໃຫ້ດໍາເນີນຕາມຂັ້ນຕອນຂອງສະພາຂັ້ນແຂວງ.
(ຂ່າວ: ສຸກສະຫວັນ, ພາບ: ບຸນຕອມ)
ຄໍາເຫັນ