ໃນວັນທີ 8 ພຶດສະພາ 2024 ນີ້ ຢູ່ທີ່ຫ້ອງປະຊຸມຫ້ອງການສາທາລະນະສຸກເມືອງບໍ່ແຕນ ໄດ້ຈັດກອງປະຊຸມຄະນະກຳມາທິການເພື່ອແມ່ ແລະ ເດັກ ຂັ້ນເມືອງ ເພື່ອຊີ້ແຈງວຽກງານສັກຢາກັນພະຍາດໝາກແດງໃຫຍ່ ແລະ ໝາກແດງນ້ອຍ ໂດຍການເປັນປະທານຂອງ ທ່ານ ບຸນພະລັງ ວິໄລສັກ ຮອງເຈົ້າເມືອງບໍ່ແຕນ ແຂວງ ໄຊຍະບູລີ ມີບັນດາຄະນະກຳມະການຮັກສາສຸຂະພາບແມ່ ແລະ ເດັກ ເຂົ້າຮ່ວມ.
ໃນກອງປະຊຸມປະທານກອງປະຊຸມໄດ້ກ່າວເປີດກອງປະຊຸມຢ່າງເປັນທາງການ ຫຼັງຈາກນັ້ນກໍໄດ້ຮັບຟັງການຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 176/ຈມ.ບຕ, ລົງວັນທີ 8 ພຶດສະພາ 2024 ວ່າດ້ວຍການແຕ່ງຕັ້ງຄະນະກຳມະການຮັກສາສຸຂະພາບແມ່ ແລະ ເດັກ ຂັ້ນເມືອງ ແລະ ບົດລາຍງານສະພາບການຮັບວັກຊິນກັນພະຍາດໃນປີ 2023 ແລະ ແຜນຈັດຕັ້ງປະຕິບັດວັນສັກຢາກັນພະຍາດແຫ່ງຊາດ ກັນພະຍາດຍາດໝາກແດງໃຫຍ່, ໝາກແດງນ້ອຍ 2024 ຂອງເມືອງບໍ່ແຕນ ຊຶ່ງເມືອງບໍ່ແຕນມີເປົ້າໝາຍໃນການສັກວັກຊິນກັນພະຍາດໝາກແດງລວມທັງໝົດ 1.059 ຄົນ ໃນເກນອາຍຸແຕ່ 9 ເດືອນ ຫາ 1 ປີ ມີ 57 ຄົນ, ອາຍຸ 1 ປີ ຫາ 5 ປີ ມີ 1.002 ຄົນ , ໂດຍສະເພາະເມືອງບໍ່ແຕນຈໍາເປັນຕ້ອງໄດ້ຈັດຕັ້ງປະຕິບັດ ຂະບວນການ ວັນສັກຢາກັນພະຍາດແຫ່ງຊາດ (ວສຊ) ໝາກແດງ ໃນປີ 2024 ທັງໝົດນີ້ກໍເພື່ອເພີ່ມລະດັບພູມຄຸ້ມກັນພະຍາດໃນຂອບເຂດທົ່ວປະເທດ ເພື່ອຮັບປະກັນເດັກນ້ອຍແຕ່ອາຍຸ 9 ເດືອນ ຫາ 59 ເດືອນທຸກຄົນໄດ້ຮັບວັກຊີນໃຫ້ໄດ້ຫຼາຍກວ່າ 95 %%ການອົບຮົມຊຸດນີ້ ແມ່ນການທົບທວນຄືນວິທີການ ໃນການຈັດຕັ້ງປະຕິບັດ ວສຊ ສໍາລັບກັນພະຍາດໝາກແດງໃຫ່ຍແລະ ໝາກແດງນ້ອຍ ໃຫ້ແກ່ຜູ້ຮັບຜິດຊອບຊີ້ນໍາວຽກງານດັ່ງກ່າວ ຢູ່ຂັ້ນເມືອງ ເພື່ອນໍາເອົາບົດຮຽນໃນຄັ້ງນີ້ໄປສືບຕໍ່ຜັນຂະຫຍາຍ, ສົນທະນາ-ແລກປ່ຽນຄໍາຄິດເຫັນກັນ ມີທັງວຽກງານບໍລິຫານ-ຈັດການ, ຄຸ້ມຄອງການດໍາເນີນຂະບວນການ, ແບບແຜນວິທີການ ແລະ ເຕັກນິກການໃຫ້ບໍລິການຕົວຈິງ, ພ້ອມດຽວກັນນີ້ ກໍເອົາໃຈໃສ່ແບບວິທີການປະສານງານເພື່ອເຮັດໃຫ້ເກີດການມີສ່ວນຮ່ວມ ຂອງບັນດາຄະນະກໍາມະການຮັກສາສຸຂະພາບແມ່ ແລະ ເດັກ ແຕ່ລະຂັ້ນ ໃຫ້ໄດ້ປະກອບສ່ວນເຂົ້າໃນວຽກງານປຸກລະດົມຊຸມຊົນຢ່າງກ້ວາງຂວາງ, ຊຶ່ງໃນທີ່ຜ່ານມາກໍພົບເຫັນມີບັນຫາຕໍ່ກັບວຽກງານວັກຊິນກັນພະຍາດຈໍານວນໜຶ່ງ ດັ່ງນັ້ນ ປະທານກອງປະຊຸມຈຶ່ງຮຽກຮ້ອງໃຫ້ບັນດາທ່ານທີ່ເຂົ້າຮ່ວມອົບຮົມ ຈົ່ງໄດ້ສຸມທຸກສະຕິປັນຍາ ເພື່ອຍົກເອົາເຫດການ-ປະສົບການຈາກວຽກງານຕົວຈິງ ຂອງບັນດາທ່ານ ມາແລກປ່ຽນ ແລະ ທຽບໃສ່ບົດຮຽນທີ່ນໍາສະເໜີໃນຊຸດອົບຮົມຄັ້ງນີ້ ເພື່ອໃຫ້ເກີດມີຄວາມເປັນເອກະພາບກັນ ໃນການຕິບັດຂະບວນການເຄື່ອນໄຫວ ວັນສັກຢາກັນພະຍາດແຫ່ງຊາດ (ວສຊ) ໝາກແດງໃຫ່ຍ, ໝາກແດງນ້ອຍ ທີ່ຈະຈັດຂຶ້ນໃນລະຫວ່າງ ວັນທີ 20 ຫາ 31 ພຶດສະພາ 2024 ຈະມາເຖິງນີ້ ມີຜົນສໍາເລັດຕາມລະດັບຄາດໝາຍ. ພາບ-ຂ່າວ: ວິໄລທອງ ນິຫາລາດ
ຄໍາເຫັນ