ໂດຍ:ຍຸພິນທອງ
ທ່ານ ຈົງ ກົວຟູ (ZongGuofu) ຜູ້ຊ່ວຍຜູ້ອໍານວຍການໃຫຍ່ ຂອງ ອາຊີ-ໂປຕາສ ສາກົນ ໄດ້ກ່າວລາຍງານ ໃນກອງປະຊຸມ ເວທີສົນທະນາການຮ່ວມມື ລາວ-ຈີນ ພາຍໃຕ້ຫົວຂໍ້ “ໜຶ່ງແລວ ໜຶ່ງເສັ້ນທາງ” ຄັ້ງທີ II ໄດ້ຈັດຂຶ້ນເມື່ອບໍ່ດົນຜ່ານມາ ທີ່ນະຄອນຫຼວງວຽງຈັນວ່າ:ອາຊີ-ໂປຕາສ ສາກົນ ໄດ້ໃຫ້ຄວາມສຳຄັນວຽງງານການແກ້ໄຂຄວາມທຸກຍາກຢູ່ບ້ານຊຽງແຫວນ ເມືອງທ່າແຂກ, ແຂວງຄຳມ່ວນ ຊຶ່ງໄດ້ເອົາໃຈໃສ່ ແລະ ຕີລາຄາທ່າແຮງດ້ານຊັບພະຍາກອນກະສິກຳຂອງລາວ, ສະນັ້ນ, ຈຶ່ງເລີ່ມຈາກການກໍ່ສ້າງຖານທົດລອງປູກພືດຜັກໃນໂຮງເຮືອນ ແລະ ຂະຫຍາຍຖານການປູກເຂົ້າ 3 ລະດູ ຢູ່ແຂວງຈຳປາສັກ, ຊຶ່ງເປັນການເລີ່ມຕົ້ນການປະຕິບັດຕົວຈິງຂອງການຫັນກະສິກໍາທັນສະໄໝ. ຊ່ວຍບ້ານທຸກຍາກຫຼຸດພົ້ນອອກຈາກຄວາມທຸກຍາກດ້ວຍແນວຄິດຫັນເປັນອຸດສາຫະກຳ, ຊຸກຍູ້ການຫັນປ່ຽນຂອງປະເທດລາວຈາກກະສິກຳດັ້ງເດີມເປັນກະສິກຳທັນສະໄໝ ດ້ວຍຜົນຜະລິດສູງ, ມີມູນຄ່າເພີ່ມສູງ ແລະ ຜົນຕອບແທນສູງ. ຢູ່ບ້ານ ຊຽງແຫວນ, ອາຊີ-ໂປຕາສ ສາກົນ ໄດ້ສ້າງຕັ້ງໂຮງເຮືອນປູກຜັກ ແລະ ຖານທົດລອງປູກພືດຫຼາຍລະດູ, ຊຶ່ງບໍ່ພຽງແຕ່ເພີ່ມລາຍຮັບໃຫ້ແກ່ຄອບຄົວຊາວກະສິກອນໃນບ້ານທຸກຍາກ, ແຕ່ຍັງສົ່ງເສີມການປູກຝັງຂະໜາດໃຫຍ່ ແລະ ການປູກຝັງແບບອຸດສາຫະກໍາອີກດ້ວຍ. ໄດ້ເພີ່ມທະວີຄວາມສາມາດໃນການສະໜອງພືດຜັກໃຫ້ແກ່ທ້ອງຖິ່ນ, ຮັກສາສະຖຽນລະພາບຂອງລາຄາຜະລິດຕະພັນກະສິກໍາໃນທ້ອງຖິ່ນ ແລະ ຄວບຄຸມໄພເງິນເຟີ້ໄດ້ຢ່າງມີປະສິດທິຜົນ. ຢູ່ເມືອງໂຂງ, ແຂວງຈໍາປາສັກ, ອາຊີ-ໂປຕາສ ສາກົນ ໄດ້ນໍາທີມງານແນວພັນຊັ້ນນໍາຂອງຈີນ ແລະ ວິສາຫະກິດປຸງແຕ່ງອາຫານ ເຂົ້າມາຮ່ວມກັນລົງທຶນ ແລະ ຮ່ວມມືໃນການກໍ່ສ້າງໂຄງການສາທິດປູກເຂົ້າເຂົ້າ 3 ລະດູ ທໍາອິດຢູ່ ສປປ ລາວ, ປູກເຂົ້າໂດຍນໍາໃຊ້ເຄື່ອງກົນຈັກ, ການປູກຝັບແບບທັນສະໄໝ ທີ່ແທດເໝາະກັບສະພາບຢູ່ລາວ, ໂດຍປ່ຽນຈາກການປູກເຂົ້າລະດູດຽວ ມາປູກເຂົ້າ 3 ລະດູ, ເປັນແຮງຊ່ວຍໃຫ້ລາວບັນລຸການສະໜອງສະບຽງອາຫານໄດ້ເພີ່ມຂື້ນແບບກ້າວກະໂດດ.
ທ່ານ ກ່າວຕື່ມວ່າ: ໃນອະນາຄົດ, ອາຊີ-ໂປຕາສ ສາກົນ ຈະເອົາມາດຕະຖານຄຸນນະພາບເຂົ້າຂອງຈີນ ແລະ ເຕັກໂນໂລຊີການປູກຝັງຂອງຈີນ ມາເຜີຍແຜ່ຢູ່ ສປປ ລາວ, ເພື່ອຊ່ວຍປະເທດລາວສ້າງຕ່ອງໂສ້ອຸດສາຫະກຳປູກເຂົ້າຫຼາຍລະດູ ທີ່ລວມທັງການປັບປຸງແນວພັນ, ການປູກຝັງ, ການປຸງແຕ່ງ ແລະ ການສົ່ງອອກ, ປະກອບສ້າງເປັນລະບົບການພັດທະນາກະສິກຳ ທີ່ມີ ການປູກຝັງແບບທັນສະໄໝ, ການປຸງແຕ່ງແບບເສດຖະກິດ ແລະ ການຄ້າແບບສາກົນ, ຊຸກຍູ້ການຫັນປ່ຽນການຜະລິດເຂົ້າໃນລາວຈາກກະສິກຳດັ້ງເດີມເປັນກະສິກຳທັນສະໄໝທີ່ມີປະສິດທິຜົນສູງ, ເສດຖະກິດ ແລະ ພັດທະນາຢ່າງຍືນຍົງ. ໃນຖານະທີ່ເປັນວິສາຫະກິດຈີນທີ່ລົງທຶນໃນລາວ, ອາຊີ-ໂປຕາສ ສາກົນ ໄດ້ຮັບການສະໜັບສະໜູນຂອງລັດຖະບານ ສປປ ລາວ ແລະ ປະຊາຊົນລາວ, ຍຶດໝັ້ນນໍາເອົາໝາກຜົນຂອງການພັດທະນາວິສາຫະກິດ ມາຄືນສູ່ສັງຄົມລາວ. ໂດຍຜ່ານການຈັດຕັ້ງກອງທຶນການສຶກສາ, ກອງທຶນອຸດໜູນຊ່ວຍເຫຼືອວຽກງານປ້ອງກັນຄວາມສະຫງົບ, ການກໍ່ສ້າງໂຮງຮຽນປະຖົມແຫ່ງຄວາມຫວັງ, ການຊ່ວຍເຫຼືອສ້າງເສັ້ນທາງແລະຂົວ ແລະ ການເຄື່ອນໄຫວວຽກງານສັງຄົມອື່ນໆ, ອາຊີ-ໂປຕາສ ສາກົນ ໄດ້ຮັບການຍ້ອງຍໍຊົມເຊີຍ ແລະ ຮັບຮູ້ຈາກລັດຖະບານແລະ ປະຊາຊົນລາວ ແລະຖືກຂະໜານນາມວ່າແມ່ນໂຄງການເຊື່ອມໂຍງຈິດໃຈປະຊາຊົນ ພາຍໃຕ້ຂໍ້ລິເລີ່ມ ໜຶ່ງແລວໜຶ່ງເສັ້ນທາງ.
ຄໍາເຫັນ