ໃນລະຫວ່າງວັນທີ 10-13 ກັນຍາ 2024 ພະຍຸໄຕ້ຝຸ່ນ ຢາກິ (YAGI) ໄດ້ສ້າງຜົນກະທົບ ແລະ ຜົນເສຍຫາຍຢ່າງມະຫາສານແກ່ ແຂວງອຸດົມໄຊ ເປັນຕົ້ນແມ່ນຊີວິດ, ຊັບສິນ, ທີ່ຢູ່ອາໄສ, ພື້ນຖານໂຄງລາງ, ເນື້ອທີທໍາການຜະລິດ, ເສັ້ນທາງຄົມມະນາຄົມ, ລະບົບການສື່ສານ, ລະບົບຕາຂ່າຍໄຟຟ້າ ແລະ ອື່ນໆ.ໂດຍສະເພາະຜົນເສຍຫາຍ ເຮັດໃຫ້ສະພາບຕາໜ່າງເສັ້ນທາງມີການເປ່ເພເສຍຫາຍເກີດຂຶ້ນຕາມທາງຫຼວງແຫ່ງຊາດ ແລະ ທາງຫຼວງທ້ອງຖິ່ນ ໜ້າທາງເປ່ເພ, ນໍ້າຖ້ວມ, ດິນເຈື່ອນ, ຫີນເຈື່ອນ, ທໍ່ລອດທາງຫັກ, ທໍ່ລອດທາງອຸດຕັນ, ບ່າທາງຫຍຸບ, ທາງຂາດ, ຕົ້ນໄມ້ໃຫຍ່ລົ້ມທັບໜ້າທາງ ໃນຂອບເຂດແຕ່ລະເມືອງບໍ່ວ່າຈະເປັນເສັ້ນທາງຫຼວງແຫ່ງຊາດ ແລະ ທາງຫຼວງທ້ອງຖິ່ນ. ຊຶ່ງມີມູນຄ່າເສຍຫາຍເຖິງ 89.46 ຕື້ກວ່າກີບ. ສຳລັບທາງຫຼວງແຫ່ງຊາດເສຍຫາຍໃນມູນຄ່າ 6.47 ຕື້ກີບ; ໃນນີ້ທາງເລກທີ 13N ຖືກເສຍຫາຍ 1.33 ຕື້ກີບ, ທາງເລກທີ 2W ຖືກເສຍຫາຍ 4.09 ຕື້ກີບ;ທາງເລກທີ 2E ຖືກເສຍຫາຍ 1.03 ຕື້ກີບ.
ທາງຫຼວງທ້ອງຖິ່ນຖືກເສຍຫາຍທັງໝົດ 84 ເສັ້ນ, ມູນຄ່າ 82,99 ຕື້ກີບ; ໃນນີ້ ເຂດເມືອງໄຊຈໍານວນ 22 ເສັ້ນ.ມູນຄ່າ 20.38 ຕື້ກີບ; ເຂດເມືອງຫຼາຈໍານວນ 10 ເສັ້ນ.ມູນຄ່າ 5 ຕື້ກີບ; ເຂດເມືອງນາໝໍ້ຈໍານວນ 14 ເສັ້ນ. ມູນຄ່າ 13.2 ຕື້ກີບ; ເຂດເມືອງງາ ຈໍານວນ 9 ເສັ້ນ.ມູນຄ່າ 21.62 ຕື້ກີບ; ເຂດເມືອງແບ່ງຈໍານວນ 9 ເສັ້ນ. ມູນຄ່າ 9.2 ຕື້ກີບ; ເຂດເມືອງຮຸນຈໍານວນ 12 ເສັ້ນ.ມູນຄ່າ 8.86 ຕື້ ກີບ; ເຂດເມືອງປາກແບງຈໍານວນ 8 ເສັ້ນ.ມູນຄ່າ 4.75 ຕື້ກີບ;
ເພື່ອແກ້ໄຂ ແລະ ຫຼຸດຜ່ອນຜົນກະທົບຈາກໄພພິບັດຄັ້ງນີ້, ໃຫ້ນ້ອຍທີ່ສຸດ ທາງພະແນກໂຍທາທິການ ແລະ ຂົນສົ່ງ ໄດ້ສຸມໃສແກ້ໄຂປະຕິບັດ 2 ໄລຍະຄື: ໄລຍະເລັ່ງດ່ວນພາຍຫຼັງທີລະດັບນໍ້າຫຼຸດລົງ ພະແນກ ຍທຂ, ຂະແໜງຂົວທາງ ໄດ້ປຶກສາຫາລື ແລະ ນໍາພາບໍລິສັດຮັບເໝົາລົງແກ້ໄຂແບບສຸກເສີນໂດຍເລັ່ງດ່ວນຕາມທາງຫຼວງທ້ອງຖິ່ນເພື່ອແກ້ໄຂ ໃຫ້ສາມາດສັນຈອນໄປມາໄດ້ປົກກະຕິ. ໄລຍະແກ້ໄຂແບບສຸກເສີນ ແລະ ຟື້ນຟູ (ທາງຫຼວງທ້ອງຖິ່ນ). ພະແນກ ຍທຂ ອອກແຈ້ງການໃຫ້ຫ້ອງການ ໂຍທາທິການ ແລະ ຂົນສົ່ງ 7 ເມືອງ ລົງເກັບກຳຂໍ້ມູນລະອຽດເພຶ່ອປະເມີນຄວາມເສຍຫາຍສະເໜີຕໍ່ຂັ້ນເທິງຂໍແກ້ໄຂສ້ອມແປງແບບສຸກເສີນ ແລະ ຟື້ນຟູ (ເປັນວຽກຫຼັງຝົນ) ໃຫ້ເຂົ້າສູ່ສະພາບປົກກະຕິ.
(ຂ່າວ: ຄຳພູສະຫວັນ ເພັນສະຫວັດ)
ຄໍາເຫັນ