 |
ໃນກອງປະຊຸມ ໄດ້ຜ່ານບົດສະຫຼຸບການເຄື່ອນໄຫວ ຂອງສະມາຄົມນັກທຸລະກິດຮ້ານອາຫານລາວ - ເບຍລາວ ໃນໄລຍະປີ 2025 ຜ່ານມາ ແລະ ແຜນການເຄື່ອນໄຫວທິດທາງປີ 2026-2027 ໂດຍສະເພາະແມ່ນສ້າງແຜນຮ່ວມມືກັບ ບໍລິສັດ ເບຍລາວ ຈໍາກັດ ຈະຈັດໂຄງການຝຶກອົບຮົມໃຫ້ຄວາມຮູ້ທາງກົນລະຍຸດການຕະຫຼາດອອນລາຍ, ສົ່ງເສີມຜູ້ປະກອບການຮ້ານອາຫານທີ່ເປັນສະມາຊິກ, ສ້າງໂອກາດໃນການຂາຍເຮັດກິດຈະກຳສົ່ງເສີມການຂາຍເຊັ່ນ: ກິດຈະກຳຄອນເສີດກັບຮ້ານອາຫານທີ່ມີເງື່ອນໄຂ, ສ້າງຄວາມເຂັ້ມແຂງໃຫ້ກັບສະມາຊິກ ສນຮລ-ເບຍລາວ ທີ່ບໍ່ມີໂອກາດໃນການແຂ່ງຂັນໄປທ່ອງທ່ຽວຕ່າງປະເທດກັບ ບໍລິສັດ ເບຍລາວ ໂດຍຊອກຫາເງື່ອນໄຂທີ່ເໝາະສົມໃນການເຮັດກິດຈະກຳສົ່ງເສີມການຂາຍໃນຮ້ານຈຸດສຸມທົ່ວໄປ ແລະ ການພັດທະນາສີມືແຮງງານລະຫວ່າງຮ້ານອາຫານກັບຮ້ານອາຫານແລກປ່ຽນກັນໃຫ້ມີຄຸນນະພາບທີ່ດີ, ການສ້າງວຽກເຮັດງານທໍາ, ເສີມສ້າງທຸລະກິດຮ້ານອາຫານໃຫ້ເຂັ້ມແຂງ ເພື່ອບໍ່ໃຫ້ແຮງງານລາວໄຫຼອອກໄປເຮັດວຽກຢູ່ຕ່າງປະເທດເປັນຕົ້ນ.
ສຳລັບແຜນກິດຈະກຳໃນປີ 2026 ນີ້ ກໍຈະມີການແຂ່ງຂັນເຕະບານ 4 ສາມັກຄີ ທີ່ຈະຈັດຂຶ້ນໃນທ້າຍເດືອນມີນານີ້ ປະກອບມີ ຄະນະກຳມະການປົກຄອງເມືອງຫາດຊາຍຟອງ, ຝ່າຍສົ່ງເສີມການຂາຍ ແລະ ການຕະຫຼາດ ບໍລິສັດ ເບຍລາວ ຈຳກັດ, ທີມສື່ມວນຊົນສາຍກິລາລາວ ແລະ ທີມ ສນຮລ ຕໍ່ດ້ວຍການແຂ່ງຂັນກິລາດອກປີກໄກ່ ໃນເດືອນ ເມສາ ແລະ ອີກກິດຈະກຳໜຶ່ງຄື ການຍ່າງເພື່ອສຸຂະພາບ ທີ່ທາງ ບໍລິສັດ ເບຍລາວ ຈະຈັດຂຶ້ນ ສຳລັບກິດຈະກຳການແຂ່ງຂັນເຕະບານ 4 ສາມັກຄີໃນປີຜ່ານມາ ແມ່ນຈັດຂຶ້ນ ທີ່ເມືອງໄຊທານີ ແລະ ປີນີ້ ແມ່ນໝູນໄປທາງເມືອງຫາດຊາຍຟອງ ນອກຈາກຈະມີກິດຈະກຳແຂ່ງຂັນກິລາແລ້ວ ຍັງມີກິດຈະກຳທ່ອງທ່ຽວທັງພາຍໃນ ແລະ ຕ່າງປະເທດຕື່ມອີກ. ທັງນີ້ ກໍເພື່ອຮັດແໜ້ນຄວາມສາມັກຄີລະຫວ່າງພາກລັດ, ພາກທຸລະກິດ ແລະ ສື່ມວນຊົນ ໃຫ້ມີຄວາມໃກ້ຊິດຕິດແທດຍິ່ງຂຶ້ນ ກັບສະມາຊິກ 52 ຮ້ານ.
ໃນໂອກາດນີ້ ຝ່າຍສົ່ງເສີມການຂາຍ ແລະ ການຕະຫຼາດ ກໍໄດ້ຂຶ້ນນຳສະເໝີ ແຜນສົ່ງເສີມການຂາຍ ແລະ ຜະລິດຕະພັນໃໝ່ ແລະ ຕອບຂໍ້ຂ້ອງໃຈຕໍ່ສະມາຊິກສະມາຄົມ ໃນການຈັດຕັ້ງປະຕິບັດວຽກຮ່ວມກັນໃນໄລຍະຜ່ານມາຕື່ມອີກ. ພ້ອມດຽວກັນນີ້, ກໍໄດ້ມີການຜ່ານຂໍ້ຕົກປັບປຸງກົງຈັກການຈັດຕັ້ງ ສນຮລ-ເບຍລາວ ປີ 2026 ໂດຍໄດ້ແຕ່ງຕັ້ງຄະນະນຳ ບໍລິສັດ ເບຍລາວ ຈຳກັດ ເປັນທີ່ປຶກສາ ຈຳນວນ 3 ທ່ານ, ຄະນະປະທານ ແລະ ຄະນະປະຈຳການ 3 ທ່ານ ໂດຍແຕ່ງຕັ້ງທ່ານ ຄຳແພງ ເພົ້າບົວວົງ ສືບຕໍ່ເປັນປະທານອີກໜຶ່ງສະໄໝ ແລະ ແຕ່ງຕັ້ງຄະນະບໍລິຫານງານເພີ່ມອີກ 5 ທ່ານ. ນອກນັ້ນ ຍັງມີຜູ້ຊ່ວຍວຽກເສດຖະກິດ ແລະ ເອກະສານຈຳນວນໜຶ່ງຕື່ມອີກ.
(ຂ່າວ: ສົງການ)
ຄໍາເຫັນ