 |
ໃນໂອກາດສະເຫຼີມສະຫຼອງວັນຄູແຫ່ງຊາດ 7 ຕຸລາ ຄົບຮອບ 31 ປີ, ພິທີຕ້ອນຮັບຄູ-ອາຈານໃໝ່ທີ່ມາຈາກ ສປ ຈີນ 22 ທ່ານ, ພິທີປະກາດການຈັດຕັ້ງ ພະນັກງານເຂົ້າຮັບອຸດໜູນບໍານານ ທີ່ຈັດຂຶ້ນໃນວັນທີ 6 ຕຸລາ ຜ່ານມາທີ່ສະຖາບັນຂົງຈື (ສຂຈ) ມະຫາວິທະຍາໄລແຫ່ງຊາດ (ມຊ). ທ່ານ ນາງ ມະນີສຸກ ຈຽມສີສຸລາດ ຮອງຜູ້ອຳນວຍການສະຖາບັນຂົງຈື ມຊ ຜູ້ຊີ້ນຳພາກວິຊາຄູພາສາຈີນປະລິນຍາຕີ ໂຄງການ 2+2 ໄດ້ກ່າວສະແດງຄວາມຮູ້ສຶກວ່າ: ຕະຫຼອດໄລຍະ 38 ປີ, ທີ່ຕົນເອງໄດ້ຢຶດຖືອາຊີບຄູສອນ ຍ້ອນເກີດຈາກຄວາມຮັກອາຊີບຄູແຕ່ນ້ອຍ ຕົນເອງກໍກຳເນີດມາຈາກຄອບຄົວປັນຍາຊົນ, ພໍ່ເປັນນາຍຄູ, ແມ່ເປັນຊາວນາ. ຕະຫຼອດການປະຕິບັດໜ້າທີ່ວຽກງານຜ່ານມາ ກໍໄດ້ໄປສຶກສາປະລິນຍາໂທຢູ່ມະຫາວິທະຍາໄລສ້າງຄູຢຸນນານ ສປ ຈີນ, ຕໍ່ມາໄປປະຈຳການຢູ່ສະຖານກົງສຸນໃຫຍ່ແຫ່ງ ສປປ ລາວ ທີ່ນະຄອນຄຸນໝິງ ເປັນເລຂານຸການເອກກົງສຸນການສຶກສາ ແລະ ວັດທະນະທຳ ກ່ອນທີ່ໄດ້ມາຮັບໜ້າທີ່ຢູ່ສະຖາບັນຂົງຈື ມຊ ແຫ່ງນີ້. ຕະຫຼອດໄລຍະຜ່ານມາ ກໍໄດ້ເຮັດວຽກງານມາດ້ວຍຄວາມດຸໝັ່ນ, ຫ້າວຫັນ, ຕັ້ງໃຈໃນການຄົ້ນຄວ້າ, ມີຄວາມເອົາໃຈໃສ່ປະຕິບັດລະບຽບວິໃນຂອງລັດຖະກອນຄູ ເຮັດໃຫ້ມີຜົນງານຜົນສໍາເລັດຫຼາຍດ້ານ ເປັນຕົ້ນໄດ້ສ້າງບຸກຄະລາກອນ ກໍຄືນັກຮຽນ-ນັກສຶກສາອອກຮັບໃຊ້ສັງຄົມໄດ້ຫຼາຍຮຸ້ນ ຈົນມາຮອດປັດຈຸບັນ. ພິເສດປີນີ້, ເປັນປີທຳອິດທີ່ສອງມະຫາວິທະຍາໄລແຫ່ງຊາດ ແລະ ມະຫາວິທະຍາໄລຊົນເຜົ່າກວາງຊີ ສປຈີນ ກໍຄືສອງປະເທດໄດ້ສໍາເລັດການສ້າງບຸກຄະລາກອນ ກໍຄືນັກສຶກສາຄູພາສາຈີນ ອອກຮັບໃຊ້ສັງຄົມໄດ້ທັງໝົດ 53 ຄົນ.
 |
ທ່ານ ນາງ ມະນີສຸກ ຈຽມສີສຸລາດ ກ່າວໃຫ້ຮູ້ຕື່ມວ່າ: ຕົນເອງມີຄວາມພາກພູມໃຈທີ່ສຸດໃນພິທີອັນສຳຄັນໃນຄັ້ງນີ້, ມື້ນີ້, ຍັງເປັນວັນສະເຫຼີມສະຫຼອງວັນບຸນໄຫ້ວພະຈັນຂອງເຊື້ອຊາດຈີນ ສຳລັບລາວເຮົາກໍສະຫຼອງວັນບຸນອອກພັນ ແລະ ອັນພູມໃຈທີ່ສຸດ ແມ່ນໄດ້ຕ້ອນຮັບຄູ-ອາຈານ, ຊ່ຽວຊານຈີນ ທີ່ມາຈາກ ສປ ຈີນ ມາສິດສອນຢູ່ສະຖາບັນຂົງຈືແຫ່ງນີ້ ແລະ ເປັນວັນທີ່ຕົນເອງມີຜົນສຳເລັດອັນຍິ່ງໃຫຍ່ໃນການປະຕິບັດໜ້າທີ່ວຽກງານເປັນອາຈານສອນ ກໍຄືຄູສອນມາໄດ້ຮັບເຂົ້າເປັນພະນັກງານບຳນານ, ພໍດີເປັນເວລາ 38 ປີ. ທ່ານຍັງກ່າວດ້ວຍຄວາມປະທັບໃຈຕື່ມວ່າ: ການເປັນອາຈານສອນ ຫຼື ຄູສອນຕະຫຼອດໄລຍະຜ່ານມາບໍ່ມີຄຳວ່າ ບໍ່ປະທັບໃຈ, ມີແຕ່ຄວາມດີໃຈທີ່ມາຮອດວັນນີ້. ຕົນເອງໄດ້ສ້າງບຸກຄະລາກອນລູກ-ຫຼານຄົນລາວ ແລະ ຄົນຈີນໄດ້ເປັນຈຳນວນຫຼວງຫຼາຍສົມຄວນ, ການເປັນຄູ ແມ່ນມີແຕ່ໄດ້ກໍາໄລບໍ່ມີອັນຫຼຸບທຶນ, ຄູເປັນຜູ້ໃຫ້ຄວາມຮູ້ແກ່ນັກສຶກສາ ໄດ້ມາມີແຕ່ຄວາມຮັກ ແລະ ເຫັນໄດ້ເມັດພັນທີ່ແຕກໜໍ່ຈໍ່ໃບອອກມາກາຍເປັນຕົ້ນພືດທີ່ແຂງແກ່ນ ແລະ ມີຄຸນນະພາບເພື່ອຮັບໃຊ້ສັງຄົມໃນຍຸກປັດຈຸບັນຄື: ພວກເຂົາໄດ້ປະກອບເຂົ້າໃນຫຼາຍອາຊີບບາງທ່ານກໍເປັນຮອດສາດສະດາຈານ, ຮອງສາດສະດາຈານ, ກາຍເປັນເອກອັກຄະລັດຖະທູດ, ເປັນທ່ານໝໍ, ທະຫານ-ຕຳຫຼວດ, ຜູ້ຊ່ຽວຊານດ້ານການກະເສດ, ການຮວມມືລາວ-ຈີນ, ເປັນນັກທຸລະກິດໃຫຍ່ ແລະ ອື່ນໆ.
ໂອກາດວັນຄູແຫ່ງຊາດ 7 ຕຸລາ, ທ່ານ ນາງ ມະນີສຸກ ຈຽມສີສຸລາດ ຍັງກ່າວສະແດງຄວາມຮູ້ບຸນຄຸນ ຂອບໃຈເປັນຢ່າງສູງຕໍ່ການນໍາພັກ-ລັດ, ອົງການຈັດຕັ້ງທຸກຂັ້ນ, ຄອບຄົວພໍ່-ແມ່ອ້າຍເອື້ອຍນ້ອງທີ່ໄດ້ໃຫ້ການສະໜັບສະໜູນຊ່ວຍເຫຼືອຕະຫຼອດໄລຍະຜ່ານມາ, ຂໍອວຍພອນໄຊອັນປະເສີດ ໃຫ້ຜູ້ເປັນຄູໃນທົ່ວປະເທດ ທຸກທ່ານ ຈົ່ງມີສຸຂະພາບແຂງແຮງມີຄວາມສຸກທາງກາຍ ແລະ ໃຈ, ມີຜົນສໍາເລັດໃນທຸກໜ້າທີ່ວຽກງານທຸກປະການ ແລະ ສືບຕໍ່ຊີ້ນໍາ-ນໍາພາສ້າງບຸກຄະລາກອນໃຫ້ກາຍເປັນພົນລະເມືອງດີອອກຮັບໃຊ້ສັງຄົມປະເທດຊາດ.
ຄໍາເຫັນ