ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ, ໄດ້ລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 5ປີ(2021-2025) ແລະ ແຜນການເຄືອນໄຫວວຽກງານ 5ປີ (2026-2030),ປະຈຳປີ2026ຂອງອົງການກວດສອບແຫ່ງລັດ,ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2024 ຂອງອົງການກວດສອບແຫ່ງລັດ, ຕໍ່ກອງປະຊຸມສະໄໝສາມັນເທື່ອທີ່ 10 ຂອງສະພາແຫ່ງຊາດ ຊຸດທີ IX, ໃນວັນທີ 14 ພະຈິກນີ້, ໂດຍການເປັນ ປະທານ ຂອງ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ.
ທ່ານ ວຽງທະວີສອນ ເທບພະຈັນກ່າວວ່າ: 5 ປີ ຜ່ານມາ,ອົງການກວດສອບແຫ່ງລັດໄດ້ເຄື່ອນໄຫວກວດສອບໃນຂົງເຂດງົບປະມານແຫ່ງລັດ, ໂຄງການເງິນກູ້ຢືມ ແລະ ຊ່ວຍເຫຼືອ, ທະນາຄານແຫ່ງ ສປປ ລາວ, ທະນາຄານທຸລະກິດລັດລົງທຶນ ແລະ ວິສາຫະກິດລັດລົງທຶນ ຕິດພັນກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ,ການແກ້ໄຂຂໍ້ຫຍຸ້ງຍາກທາງດ້ານເສດຖະກິດ-ການເງິນ ໂດຍລວມແລ້ວ ສາມາດບັນລຸໄດ້ 600 ເປົ້າໝາຍ ເທົ່າກັບ 100% ຂອງຄາດໝາຍສູ້ຊົນທີ່ໄດ້ກຳນົດໄວ້; ພ້ອມກັນນັ້ນ ກໍໄດ້ດໍາເນີນການກວດສອບຕາມການມອບໝາຍ, ຕາມການແຈ້ງການ ແລະ ຕາມການສະເໜີ ເພີ່ມຕື່ມ ຈໍານວນ 11 ເປົ້າໝາຍ,ສະເພາະປີ 2025 ໄດ້ສຳເລັດການຕິດຕາມ, ຊຸກຍູ້ ການແກ້ໄຂຜົນການກວດສອບ ຢູ່ບັນດາກະຊວງ-ອົງການ, ແຂວງ-ນະຄອນຫຼວງວຽງຈັນ ສຳເລັດ 39 ເປົ້າໝາຍ. ໃນນັ້ນ: ຂັ້ນສູນກາງ 13 ເປົ້າໝາຍ ແລະ ທ້ອງຖິ່ນ 26 ເປົ້າໝາຍ,ໄດ້ດໍາເນີນການ ກວດສອບຕາມແຜນການກວດສອບປະຈໍາປີ 2025 ສໍາເລັດ 154 ເປົ້າໝາຍ ເທົ່າກັບ 100% ຂອງ ແຜນການ.
ນອກຈາກນີ້ ໄດ້ເຄື່ອນໄຫວຮ່ວມມືກັບ ອົງການກວດສອບແຫ່ງລັດ ຂອງປະເທດເພື່ອນມິດເຊັ່ນ: ສສ ຫວຽດນາມ, ສປ ຈີນ, ອິນໂດເນເຊຍ, ມາເລເຊຍ, ຮົງກາລີ, ສ ສະໂລວັກ, ສ ຣັດເຊຍ, ສ ເກົາຫຼີ ແລະ ຝຣັ່ງ ໂດຍລົງເລິກ ແລະ ສຸມໃສ່ແລກປ່ຽນບົດຮຽນ ດ້ານວິຊາສະເພາະ ໃນ 3 ປະເພດການກວດສອບ ໃນຫົວຂໍ້ຕ່າງໆ ເປັນຕົ້ນ: ການກວດ ສອບເອກະສານລາຍງານການເງິນ, ການວິເຄາະຄວາມສ່ຽງ ຖານະການເງິນ ຊັບສິນ-ໜີ້ສິນ ຂອງວິສາຫະກິດ, ການກວດສອບເອກະສານລາຍງານການເງິນຂອງໂຄງການເງິນກູ້ຢືມ ແລະ ຊ່ວຍເຫຼືອ, ການກວດສອບລາຍຈ່າຍ ງົບປະມານແຫ່ງລັດ, ການກວດສອບ ການຈັດຊື້-ຈັດຈ້າງ ຂອງວິສາຫະກິດລັດລົງທຶນ, ການກວດສອບຜົນ ການຈັດຕັ້ງປະຕິບັດ, ການກວດສອບຈັດເກັບລາຍຮັບສ່ວຍສາອາກອນ, ການກວດສອບການຄຸ້ມຄອງເຂດເສດຖະກິດພິເສດ, ການກວດສອບໂຄງການລົງທຶນພາກລັດ, ການກວດສອບທະນາຄານແຫ່ງຊາດ, ການກວດສອບ ການປ່ອຍສິນເຊື່ອຂອງທະນາຄານທຸລະກິດແລະອື່ນໆ.
ອັນພົ້ນເດັ່ນໃນປີ 2025 ໄດ້ຍົກສູງການຮ່ວມມືກັບ ອົງການກວດສອບແຫ່ງລັດ ສສ ຫວຽດນາມ ໃນຫົວຂໍ້:ການກວດສອບທະນາຄານການຄ້າ, ການກວດສອບການປະເມີນຄວາມຄືບໜ້າໂຄງການ, ການມີສ່ວນຮ່ວມໃນການ ສ້າງແຜນງົບປະມານແຫ່ງລັດ ແລະ ບົດຮຽນການແກ້ໄຂຜົນການກວດສອບ, ການເກັບກູ້ລາຍຮັບຈາກຜົນການກວດສອບ; ຮ່ວມກັບອົງການກວດສອບ ສປ ຈີນ ຝຶກອົບຮົມໃນຫົວຂໍ້: ການນໍາໃຊ້ບັນຍາປະດິດ (AI) ເຂົ້າໃນການວາງແຜນກວດສອບ.
(ຂ່າວ:ສຳນານ,ພາບ:ບຸນຕອມ)
ຄໍາເຫັນ