 |
ການຈັດຕັ້ງປະຕິບັດກິດຈະກຳໂຄງການປົກປ້ອງເດັກ ເພື່ອປ້ອງກັນການໃຊ້ແຮງງານເດັກຢູ່ແຂວງຫຼວງພະບາງ ໄດ້ເລັ່ງໃສ່ 30 ບ້ານໃນ 6 ເມືອງຄື: ເມືອງນໍ້າບາກ, ເມືອງງອຍ, ເມືອງວຽງຄໍາ, ເມືອງໂພນທອງ, ເມືອງໂພນໄຊ ແລະ ເມືອງປາກແຊງ ເພື່ອສົ່ງເສີມການປົກປ້ອງສິດ ແລະ ຜົນປະໂຫຍດຂອງເດັກ ໂດຍເດັກ ນ້ອຍ ແລະ ໄວໜຸ່ມໄດ້ຮັບການປົກປ້ອງ, ການຊ່ວຍເຫຼືອເຂົ້າເຖິງການສຶກສາທີ່ມີຄຸນນະພາບ, ເຂົ້າເຖິງຂໍ້ມູນທັກສະຊີວິດດ້ານການເງິນ, ການເປັນຜູ້ປະກອບການ ທີ່ເປັນທາງເລືອກສໍາລັບກຸ່ມສ່ຽງໃນການໃຊ້ແຮງງານເດັກ ແລະ ການເຂົ້າເຖິງການຈ້າງງານໃນວຽກທີ່ເໝາະສົມ, ເພີ່ມຄວາມເຂົ້າໃຈໃຫ້ຄອບຄົວ ແລະ ຊຸມຊົນ ຮັບຮູ້ໄດ້ເຖິງຄວາມສ່ຽງຈາກຜົນກະທົບຂອງການໃຊ້ແຮງງານເດັກ, ສ້າງຄວາມອາດສາມາດໃຫ້ພະນັກງານພາກລັດ, ຂະ ແໜງການທີ່ກ່ຽວຂ້ອງ ແລະ ຄະນະກຳມະການປົກຄອງທ້ອງຖິ່ນ, ສະມາຄົມໃນການປົກປ້ອງເດັກ, ການປ້ອງກັນ ແລະ ຫຼຸດຜ່ອນການໃຊ້ແຮງງານເດັກ ແລະ ຄອບຄົວທີ່ມີຄວາມສ່ຽງ (ຄອບຄົວທຸກຍາກ, ດ້ອຍໂອກາດ), ຍົກລະ ດັບຄວາມສາມາດໃນການປະສານງານ ການປົກປ້ອງເດັກ, ປ້ອງກັນ ແລະ ຫຼຸດຜ່ອນຄວາມສ່ຽງໃນການໃຊ້ແຮງງານເດັກໃຫ້ຄູ່ຮ່ວມງານພາກລັດ ແລະ ພາກສ່ວນທີ່ກ່ຽວຂ້ອງ ເພື່ອຊອກຫາວິທີທາງອອກທີ່ເໝາະສົມ ແລະ ທັນເວລາ, ເພີ່ມທະວີການບັງຄັບໃຊ້ກົດໝາຍເພື່ອປົກປ້ອງ, ປ້ອງກັນ ແລະ ຫຼຸດຜ່ອນການໃຊ້ແຮງງານເດັກ. ຊຶ່ງໄດ້ຮັບການສະໜັບສະໜູນທຶນຈາກສະຫະພາບເອີຣົບ, ຜ່ານການປະຕິບັດງານຂອງອົງການຊ່ວຍເຫຼືອເດັກສາກົນປະຈຳແຂວງຫຼວງພະບາງດ້ວຍງົບປະມານທັງໝົດ 1 ລ້ານ 8 ໝື່ນ 2 ພັນກວ່າໂດລາ ມີໄລຍະການຈັດຕັ້ງປະຕິບັດ 3 ປີ ຫຼື ຮອດເດືອນມີນາປີ 2028 ຈຶ່ງສຳເລັດ, ສຳລັບກິດຈະກຳທີ່ຈັດຕັ້ງປະຕິບັດໃນປີ 2026 ນີ້ ລວມມີ 23 ກິດຈະກຳ, ຜ່ານການປະຕິບັດໃນ 6 ເດືອນຕົ້ນປີນີ້ສຳເລັດແລ້ວ 16 ກິດຈະກຳ ນຳໃຊ້ງົບປະມານທັງໝົດ 4 ແສນ 3 ໝື່ນ 1 ພັນກວ່າໂດລາ. ໃນວາລະກອງປະຊຸມໄດ້ມີການປະກອບຄຳເຫັນຈາກພະແນກການກ່ຽວຂ້ອງ ແລະ ບັນດາເມືອງເປົ້າໝາຍ ເພື່ອເຮັດໃຫ້ບັນດາວຽກງານທີ່ຈະສືບຕໍ່ປະຕິບັດໃນ 6 ເດືອນທ້າຍປີ ມີຜົນສຳເລັດຕາມຄາດໝາຍທີ່ວາງໄວ້. ຂ່າວ-ພາບ: ອາພຸດເດດ ບຸບຜາ
ຄໍາເຫັນ