ສຸພາສິດຂອງຈີນໄດ້ກ່າວວ່າ: “ຜູ້ທີ່ຮຽນສຳນັກດຽວກັນເອີ້ນວ່າໝູ່, ຜູ້ທີ່ມີອຸດົມການດຽວກັນເອີ້ນວ່າສະຫາຍ”, ການມີອຸດົມການດຽວກັນແມ່ນພື້ນຖານອັນເລິກເຊິ່ງທີ່ສຸດ ທີ່ເຮັດໃຫ້ມິດຕະພາບຂອງສອງປະເທດຍືນຍົງຄົງຕົວ. ເມື່ອ 65 ປີກ່ອນ, ຈີນ ແລະ ລາວ ໄດ້ສ້າງຕັ້ງສາຍພົວພັນການທູດນຳກັນຢ່າງເປັນທາງການ, ຜູ້ນຳຮຸ່ນອາວຸໂສ ເຊັ່ນ: ສະຫາຍ ເໝົາ ເຈີຕຸງ, ສະຫາຍ ໂຈວ ເອິນໄຫຼ ແລະ ສະຫາຍ ໄກສອນ ພົມວິຫານ ໄດ້ສ້າງສາຍພົວພັນມິດຕະພາບປະຕິວັດອັນເລິກເຊິ່ງ, ຊຶ່ງໄດ້ວາງຮາກຖານອັນໜັກແໜ້ນທີ່ບໍ່ສາມາດສັ່ນຄອນໄດ້ໃຫ້ແກ່ມິດຕະພາບທີ່ສືບທອດກັນມາຫຼາຍເຊັ່ນຄົນຂອງສອງປະເທດ. ໃນຊຸມປີ 60 ແລະ 70 ຂອງສະຕະວັດທີ່ຜ່ານມາ, ໃນຂະນະທີ່ປະຊາຊົນລາວກຳລັງຜ່ານຜ່າໄລຍະເວລາອັນຫຍຸ້ງຍາກໃນການຕໍ່ສູ້ເພື່ອເອກະລາດແຫ່ງຊາດ, ປະເທດຈີນ ໄດ້ຈັດສົ່ງຄະນະຊ່ຽວຊານທາງການທະຫານ, ໜ່ວຍກໍ່ສ້າງທາງ, ໜ່ວຍປ້ອງກັນອາກາດ ແລະ ພະນັກງານການທູດ ລວມທັງໝົດຫຼາຍກວ່າໜຶ່ງແສນຄົນ ມາປະຕິບັດໜ້າທີ່ຊ່ວຍເຫຼືອລາວ, ໂດຍໄດ້ຮ່ວມທຸກຮ່ວມສຸກ ແລະ ຄຽງບ່າຄຽງໄຫຼ່ກັບປະຊາຊົນລາວ. ວິລະຊົນຊາວຈີນຫຼາຍຮ້ອຍສະຫາຍໄດ້ເສຍສະຫຼະຊີວິດຢູ່ເທິງຜືນແຜ່ນດິນລາວ, ໃນນັ້ນ 215 ສະຫາຍ ໄດ້ເສຍສະຫຼະຊີວິດ ແລະ ຝັງຢູ່ທີ່ສຸສານວິລະຊົນຈີນ 3 ແຫ່ງ ໃນ ສປປ ລາວ. ຢູ່ທີ່ນະຄອນໜານໜິງ, ກວາງຊີ ທີ່ຫ່າງໄກອອກໄປຫຼາຍພັນກິໂລແມັດ, ລູກຫຼານນັກປະຕິວັດລາວຫຼາຍຮຸ່ນຄົນ ໄດ້ໄປສຶກສາຮ່ຳຮຽນ ແລະ ເຕີບໃຫຍ່ຢູ່ໃນໂຮງຮຽນ "67" ທີ່ປະເທດຈີນສ້າງຂຶ້ນສະເພາະສຳລັບພວກເຂົາເຈົ້າ, ຊຶ່ງໄດ້ໃຊ້ເວລາໃນຊ່ວງໄວທີ່ສຳຄັນທີ່ສຸດຂອງຊີວິດຢູ່ນັ້ນ. ຜືນແຜ່ນດິນຈະຈົດຈຳ, ວິນຍານອັນພິລະອາດຫານຈະຄົງຢູ່ຕະຫຼອດໄປ, ປະຫວັດສາດໜ້ານີ້ຈະຖືກຈາລຶກໄວ້ໃນຄວາມຊົງຈຳຮ່ວມກັນຂອງປະຊາຊົນສອງຊາດຕະຫຼອດການ.
ຕະຫຼອດໄລຍະ 65 ປີທີ່ຜ່ານມາ, ມິດຕະພາບທີ່ເປັນມູນເຊື້ອແບບສະຫາຍກໍຄືອ້າຍນ້ອງທີ່ເປັນສັງຄົມນິຍົມລະຫວ່າງຈີນ-ລາວໄດ້ຜ່ານການທົດສອບຈາກການປ່ຽນແປງຂອງຍຸກສະໄໝ ແລະ ສະພາບການສາກົນ, ຍິ່ງດົນຍິ່ງແໜ້ນແຟ້ນ, ຍິ່ງດົນຍິ່ງໃໝ່. ໂດຍສະເພາະໃນຊຸມປີມໍ່ໆມານີ້, ສະຫາຍ ສີ ຈິ້ນຜິງ, ເລຂາທິການໃຫຍ່, ປະທານປະເທດຈີນ ແລະ ຜູ້ນຳສູງສຸດຂອງລາວ ໄດ້ບັນລຸຄວາມເຫັນດີເຫັນພ້ອມທາງດ້ານຍຸດທະສາດໃນການສ້າງຄູ່ຮ່ວມຊາຕາກໍາ ຈີນ-ລາວ, ພ້ອມທັງໄດ້ລົງນາມໃນແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳຮ່ວມກັນເຖິງ 2 ຄັ້ງ ໃນປີ 2019 ແລະ 2023, ຊຶ່ງເປັນການກຳນົດທິດທາງລວມ ແລະ ແຕ້ມພາບແຜນວາດອັນໃໝ່ສຳລັບການຮ່ວມມືຍຸດທະສາດຮອບດ້ານຂອງສອງປະເທດ, ຊີ້ນຳໃຫ້ສາຍພົວພັນສອງຝ່າຍກ້າວເຂົ້າສູ່ໄລຍະການຂະຫຍາຍຕົວຢ່າງໄວວາ ແລະ ກ້າວເຂົ້າສູ່ຍຸກສະໄໝໃໝ່. ໃນເດືອນກັນຍາ ປີ 2025, ສະຫາຍ ສີ ຈິ້ນຜິງ, ເລຂາທິການໃຫຍ່, ປະທານປະເທດຈີນ ແລະ ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດລາວ ໄດ້ບັນລຸຄວາມເຫັນດີເຫັນພ້ອມທີ່ສຳຄັນອີກຄັ້ງ ໃນການຮ່ວມກັນສ້າງຄູ່ຮ່ວມຊາຕາກຳ ຈີນ-ລາວ ທີ່ມີມາດຕະຖານສູງ, ຄຸນນະພາບສູງ ແລະ ລະດັບສູງ, ຊຶ່ງເປັນການຊີ້ທິດເຍືອງທາງ ແລະ ສີດຢາກະຕຸ້ນອັນແຂງແຮງໃຫ້ແກ່ການພັດທະນາສາຍພົວພັນສອງຝ່າຍພາຍໃຕ້ສະພາບການໃໝ່.
ພາຍໃຕ້ການຊີ້ນຳຂອງຜູ້ນຳສູງສຸດຂອງທັງສອງຝ່າຍ, ການຮ່ວມມືຍຸດທະສາດຮອບດ້ານ ຈີນ-ລາວ ໄດ້ສືບຕໍ່ຂະຫຍາຍຕົວຢ່າງກວ້າງຂວາງ ແລະ ເລິກເຊິ່ງ. ໃນຖານະທີ່ເປັນໂຄງການສັນຍາລັກແຫ່ງການຮ່ວມກັນສ້າງ "ໜຶ່ງແລວໜຶ່ງເສັ້ນທາງ" ທີ່ມີຄຸນນະພາບສູງ, ປະສິດທິຜົນຂອງ "ຊ່ອງທາງຄຳ" ຂອງທາງລົດໄຟ ຈີນ-ລາວ ຍັງສືບຕໍ່ປະກົດຜົນເປັນຈິງຢ່າງຕໍ່ເນື່ອງ, ໂດຍໄດ້ຂົນສົ່ງຜູ້ໂດຍສານສະສົມຫຼາຍກວ່າ 70 ລ້ານເທື່ອຄົນ ແລະ ຂົນສົ່ງສິນຄ້າຫຼາຍກວ່າ 80 ລ້ານໂຕນ, ຊຶ່ງບໍ່ພຽງແຕ່ຊ່ວຍຊຸກຍູ້ໃຫ້ລາວຫັນປ່ຽນຈາກ "ປະເທດບໍ່ມີຊາຍແດນຕິດຈອດກັບທະເລ" ກາຍເປັນ "ປະເທດເຊື່ອມໂຍງເຊື່ອມຈອດ", ແຕ່ຍັງເປັນການຍົກລະດັບການເຊື່ອມໂຍງເຊື່ອມຈອດໃນພາກພື້ນຢ່າງຫຼວງຫຼາຍ. ປະເທດຈີນຍັງຄົງເປັນແຫຼ່ງທຶນຕ່າງປະເທດ ແລະ ປະເທດສົ່ງອອກອັນດັບໜຶ່ງຂອງລາວຫຼາຍປີຕິດຕໍ່ກັນ, ໂດຍມີມູນຄ່າການລົງທຶນສະສົມຢູ່ລາວຫຼາຍກວ່າ 18 ຕື້ໂດລາ, ແລະ ໃນປີ 2025 ມູນຄ່າການຄ້າສອງຝ່າຍບັນລຸເຖິງ 9.82 ຕື້ໂດລາ, ເພີ່ມຂຶ້ນ 125% ເມື່ອທຽບໃສ່ປີ 2021 ທີ່ເປັນປີຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ຈີນ-ລາວ. ບັນດາໂຄງການຊ່ວຍເຫຼືອ ເຊັ່ນ "8 ໂຄງການໃຫຍ່ຊ່ວຍເຫຼືອລາວ", ໂຮງໝໍມະໂຫສົດ ແລະ ອື່ນໆໄດ້ປະກົດຜົນເປັນຈິງໃນທົ່ວປະເທດລາວ, ເຮັດໃຫ້ໝາກຜົນແຫ່ງການຮ່ວມມື ຈີນ-ລາວ ໄດ້ເອື້ອອຳນວຍຜົນປະໂຫຍດໃຫ້ແກ່ປະຊາຊົນລາວຫຼາຍຂຶ້ນ. ປຶ້ມ "ສີ ຈິ້ນຜິງ, ກ່ຽວກັບການບໍລິຫານລັດ ແລະ ການປົກຄອງ", "ຫຼຸດພົ້ນອອກຈາກຄວາມທຸກຍາກ" ສະບັບພາສາລາວ ໄດ້ຖືກພິມຈຳໜ່າຍຢູ່ລາວ, ສ່ວນປຶ້ມປະຕິວັດຄລາສສິກຂອງລາວ ເຊັ່ນ "ຊີວິດ ແລະ ພາລະກິດປະຕິວັດຂອງປະທານໄກສອນ ພົມວິຫານ", "ສອງເອື້ອຍນ້ອງ" ກໍໄດ້ຖືກແປເປັນພາສາຈີນ ແລະ ພິມຈຳໜ່າຍຢູ່ຈີນເປັນຄັ້ງທຳອິດ, ການແປປຶ້ມແລກປ່ຽນເຊິ່ງກັນແລະກັນ ໄດ້ສ້າງຂົວຕໍ່ແຫ່ງຄວາມຮູ້ສຳລັບການສົນທະນາທາງດ້ານອະລິຍະທຳຂອງສອງປະເທດ. ຊາວໜຸ່ມລາວນັບມື້ນັບຫຼາຍຂຶ້ນໄດ້ເດີນທາງໄປສຶກສາຕໍ່ທີ່ປະເທດຈີນ, ແລະ ຊາວໜຸ່ມຈີນກໍໄດ້ມາສຶກສາຢູ່ລາວ, ກາຍເປັນຜູ້ສືບທອດ ແລະ ຜູ້ຊຸກຍູ້ມິດຕະພາບທີ່ເປັນມູນເຊື້ອລະຫວ່າງ ຈີນ-ລາວ. ກິດຈະກຳຕ່າງໆ ໃນ "ປີແຫ່ງມິດຕະພາບ ຈີນ-ລາວ" ປີນີ້ ມີຄວາມຫຼາກຫຼາຍສີສັນ, ທັງການບັນຍາຍຫົວຂໍ້ຕ່າງໆ, ການສະແດງສິລະປະວັນນະຄະດີ, ການແລກປ່ຽນຊາວໜຸ່ມ... ພາບເຫດການທີ່ມີຊີວິດຊີວາເຫຼົ່ານີ້ ໄດ້ເຮັດໃຫ້ຈິດໃຈຂອງປະຊາຊົນສອງຊາດໃກ້ຊິດກັນຫຼາຍຂຶ້ນ.
ຄວາມໝາຍຂອງການພັດທະນາສາຍພົວພັນ ຈີນ-ລາວ ບໍ່ພຽງແຕ່ເປັນການຕ່າງຝ່າຍຕ່າງມີຜົນປະໂຫຍດໃນລະດັບສອງຝ່າຍເທົ່ານັ້ນ, ແຕ່ຍັງເປັນການຮ່ວມກັນສີດຢາກະຕຸ້ນພະລັງງານທາງບວກໃຫ້ແກ່ສັນຕິພາບ ແລະ ການພັດທະນາຂອງພາກພື້ນ ແລະ ຂອງໂລກ. ປະເຊີນໜ້າກັບການປ່ຽນແປງອັນເລິກເຊິ່ງຂອງໂລກໃນຮອບຮ້ອຍປີ, ຈີນ ແລະ ລາວຍາມໃດກໍຢືນຢູ່ຄຽງຂ້າງຄວາມຍຸຕິທຳ ແລະ ຄວາມເປັນທຳຂອງສາກົນຢ່າງໜັກແໜ້ນ, ຈັບມືກັນຊຸກຍູ້ການຮ່ວມມື ແມ່ນໍ້າລ້ານຊ້າງ-ແມ່ນໍ້າຂອງ, ຄຽງບ່າຄຽງໄຫຼ່ກັນປົກປັກຮັກສາສັນຕິພາບ ແລະ ຄວາມສະຫງົບໃນອາຊີຕາເວັນອອກ, ຮ່ວມກັນຊຸກຍູ້ການປະຕິບັດຂໍ້ລິເລີ່ມການພັດທະນາທົ່ວໂລກ, ຂໍ້ລິເລີ່ມຄວາມປອດໄພທົ່ວໂລກ, ຂໍ້ລິເລີ່ມອະລິຍະທຳທົ່ວໂລກແລະ ຂໍ້ລິເລີ່ມການຄຸ້ມຄອງທົ່ວໂລກ, ພ້ອມທັງຮ່ວມກັນຕໍ່ຕ້ານລັດທິຄອງຄວາມເປັນໃຫຍ່ ແລະ ການ ເມືອງແບບໃຊ້ອຳນາດບາດໃຫຍ່. ການປະສານງານທາງດ້ານຍຸດທະສາດທີ່ກ້າວຂ້າມຂອບເຂດສອງຝ່າຍນີ້, ບໍ່ພຽງແຕ່ເປັນການສະແດງອອກຢ່າງມີຊີວິດຊີວາຂອງຈິດໃຈຄູ່ຮ່ວມຊາຕາກຳ ຈີນ-ລາວເທົ່ານັ້ນ, ແຕ່ຍັງເປັນການພິສູດດ້ວຍການກະທຳວ່າ: ການໄປມາຫາສູ່ກັນລະຫວ່າງປະເທດກັບປະເທດ ບໍ່ພຽງແຕ່ສາມາດສ້າງຄວາມຈະເລີນຮຸ່ງເຮືອງໃຫ້ແກ່ກັນແລະກັນ, ແຕ່ຍັງສາມາດປະກອບສ່ວນທາງດ້ານສະຕິປັນຍາ ແລະ ກຳລັງແຮງເຂົ້າໃນການສ້າງລະບຽບການສາກົນທີ່ມີຄວາມຍຸຕິທຳ ແລະ ສົມເຫດສົມຜົນຫຼາຍຂຶ້ນ.
ປີນີ້ແມ່ນປີທີ່ມີຄວາມໝາຍສໍາຄັນຂອງ ສປປ ລາວ ແລະ ສປ ຈີນ. ແຜນພັດທະນາ 5 ປີ ຄັ້ງທີ 15 ຂອງຈີນ ໄດ້ເລີ່ມຕົ້ນຂຶ້ນ, ຊຶ່ງເປັນການກ້າວເຂົ້າສູ່ໄລຍະເວລາອັນສຳຄັນໃນການວາງຮາກຖານອັນໜັກແໜ້ນ ແລະ ການລະດົມກຳລັງຢ່າງຮອບດ້ານ ເພື່ອບັນລຸການຫັນເປັນທັນສະໄໝແບບສັງຄົມນິຍົມໂດຍພື້ນຖານ. ສ່ວນກອງປະຊຸມໃຫຍ່ ຄັ້ງທີ 12 ຂອງພັກປະຊາຊົນປະຕິວັດລາວ ກໍໄດ້ເປີດຂຶ້ນຢ່າງສະຫງ່າງາມ, ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ X ຂອງລາວກໍໄດ້ເລີ່ມຕົ້ນຂຶ້ນຢ່າງເປັນທາງການ, ຊຶ່ງເປັນການກ້າວເດີນບາດກ້າວໃໝ່ໄປສູ່ເປົ້າໝາຍການສະເຫຼີມສະຫຼອງວັນສ້າງຕັ້ງພັກຄົບຮອບ 100 ປີ ໃນປີ 2055. ເສັ້ນທາງການກໍ່ສ້າງສັງຄົມນິຍົມຂອງສອງປະເທດໄດ້ມາບັນຈົບກັນຢູ່ທີ່ນີ້, ຊຶ່ງເປັນຊ່ວງເວລາທີ່ດີທີ່ສຸດໃນການຈັບມືກັນລົງເລິກການຮ່ວມມື ແລະ ຮ່ວມກັນວາງແຜນອະນາຄົດຂອງສາຍພົວພັນສອງຝ່າຍ.
ຝ່າຍຈີນຍິນດີຮ່ວມກັບຝ່າຍລາວ ໃນການເພີ່ມທະວີຄວາມໄວ້ເນື້ອເຊື່ອໃຈທາງດ້ານການເມືອງຢ່າງໜັກແໜ້ນ, ສືບທອດ ແລະ ເສີມຂະຫຍາຍມູນເຊື້ອມິດຕະພາບຂອງສອງປະເທດ, ຖອດຖອນບົດຮຽນທິດສະດີ ແລະ ພຶດຕິກຳຕົວຈິງເຊິ່ງກັນແລະກັນ ໃນການຊຸກຍູ້ການປະຕິຮູບ ແລະ ການຄົ້ນຄວ້າການກໍ່ສ້າງສັງຄົມນິຍົມ, ແລະ ຮັດແໜ້ນການໄປມາຫາສູ່ກັນລະຫວ່າງພັກ, ລັດຖະບານ, ອົງການນິຕິບັນຍັດ ແລະ ທ້ອງຖິ່ນ. ປະເຊີນໜ້າກັບການປ່ຽນແປງອັນເລິກເຊິ່ງໃນຮອບຮ້ອຍປີທີ່ພວມເລັ່ງຕົວຂຶ້ນ, ພວກເຮົາຍິ່ງຕ້ອງສືບຕໍ່ໃຫ້ການສະໜັບສະໜູນເຊິ່ງກັນແລະກັນ, ເພີ່ມທະວີການສື່ສານ ແລະ ການປະສານງານໃນກົນໄກຫຼາຍຝ່າຍ, ຮ່ວມກັນຊຸກຍູ້ໃຫ້ຂໍ້ລິເລີ່ມທົ່ວໂລກຕ່າງໆ ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ, ແລະ ປົກປັກຮັກສາຜົນປະໂຫຍດຮ່ວມກັນຂອງບັນດາປະເທດກຳລັງພັດທະນາ.
ຝ່າຍຈີນຍິນດີຮ່ວມກັບຝ່າຍລາວ ໃນການເຊື່ອມຈອດຍຸດທະສາດການພັດທະນາ, ນຳໃຊ້ປະໂຫຍດຈາກ "ຊ່ອງທາງຄຳ" ຂອງທາງລົດໄຟ ຈີນ-ລາວ ຢ່າງເຕັມສ່ວນ, ຊຸກຍູ້ການຈັດຕັ້ງປະຕິບັດ "ການກວດກາຈຸດດຽວ" ໃຫ້ເກີດຂຶ້ນໂດຍໄວ, ເປີດກວ້າງຮູບແບບການພັດທະນາກວມລວມ "ທາງລົດໄຟ+", ເພື່ອຂັບເຄື່ອນການເຕົ້າໂຮມຂອງອຸດສາຫະກຳ ແລະ ການພັດທະນາເສດຖະກິດຕາມແລວທາງລົດໄຟ. ປະເທດຈີນຍິນດີນຳເຂົ້າສິນຄ້າກະສິກຳທີ່ມີຄຸນນະພາບສູງຂອງລາວຫຼາຍຂຶ້ນ, ລົງເລິກການຮ່ວມມືໃນຂົງເຂດການພັດທະນາສີຂຽວ, ເສດຖະກິດດິຈິຕອນ, ພະລັງງານສະອາດ ແລະ ອື່ນໆ, ຊ່ວຍເຫຼືອຝ່າຍລາວໃນການເລັ່ງລັດການຫັນປ່ຽນພະລັງງານແລະຮັບມືກັບຄວາມຜັນຜວນຂອງຕະຫຼາດພະລັງງານສາກົນໄດ້ດີຂຶ້ນ. ສືບຕໍ່ຈັດຕັ້ງປະຕິບັດບັນດາໂຄງການຊ່ວຍເຫຼືອເພື່ອຊີວິດການເປັນຢູ່ຂອງປະຊາຊົນໃຫ້ດີ, ເພື່ອສ້າງຜົນປະໂຫຍດໃຫ້ແກ່ປະຊາຊົນທ້ອງຖິ່ນຫຼາຍຂຶ້ນ.
ຝ່າຍຈີນຍິນດີຮ່ວມກັບຝ່າຍລາວ ໃນການລົງເລິກການແລກປ່ຽນທາງດ້ານວັດທະນະທຳ-ສັງຄົມ, ຈັດຕັ້ງບັນດາກິດຈະກຳສະເຫຼີມສະຫຼອງວັນສ້າງຕັ້ງສາຍພົວພັນການທູດ ຈີນ-ລາວ ຄົບຮອບ 65 ປີ ແລະ "ປີແຫ່ງມິດຕະພາບ ຈີນ-ລາວ" ໃຫ້ດີ, ຮັດແໜ້ນການໄປມາຫາສູ່ກັນ ແລະ ການຮ່ວມມືລະຫວ່າງທ້ອງຖິ່ນໃນທຸກຂົງເຂດ, ເພີ່ມທະວີການຮ່ວມມືດ້ານການສຶກສາ ແລະ ການແລກປ່ຽນຂອງຊາວໜຸ່ມ, ເພື່ອໃຫ້ມິດຕະພາບ ຈີນ-ລາວ ໄດ້ຮັບການສືບທອດຈາກຮຸ່ນສູ່ຮຸ່ນ. ສົ່ງເສີມເພື່ອນມິດຊາວລາວໃຫ້ເດີນທາງໄປສຶກສາ, ທ່ອງທ່ຽວ ແລະ ເຮັດວຽກຢູ່ປະເທດຈີນຫຼາຍຂຶ້ນ, ແລະ ພີ່ນ້ອງຊາວຈີນໃຫ້ເດີນທາງມາປະເທດລາວ ເພື່ອສຳຜັດກັບສະເໜ່ອັນເປັນເອກະລັກຂອງດິນແດນແຫ່ງນີ້ຫຼາຍຂຶ້ນເຊັ່ນກັນ.
ເພື່ອນມິດຊາວລາວມັກກ່າວສະເໝີວ່າ: "ຕົ້ນໄມ້ດີມີໃບ, ທັງໃຜດີມີມິດ". ຄົນຈີນກໍມີຄຳກ່າວທີ່ວ່າ: "ຕົ້ນນ້ຳທີ່ຍາວໄກຍ່ອມໄຫຼໄດ້ຍາວນານ, ຮາກທີ່ເລິກຍ່ອມມີກິ່ງງ່າທີ່ອຸດົມສົມບູນ". ໄລຍະເວລາ 65 ປີ, ສຳລັບສາຍນ້ຳແຫ່ງປະຫວັດສາດແລ້ວ ກໍເປັນພຽງແຕ່ໄລຍະເວລາສັ້ນໆພຽງກະພິບຕາ, ແຕ່ສຳລັບມິດ ຕະພາບຈີນ-ລາວທີ່ມີອຸດົມການຮ່ວມກັນຍິ່ງຜ່ານການເວລາໄປເທົ່າໃດກໍຍິ່ງຫອມຫວນຊວນດື່ມດຳ. ເມື່ອຢືນຢູ່ຈຸດເລີ່ມຕົ້ນໃໝ່ທາງປະຫວັດສາດ, ມິດຕະພາບ ຈີນ-ລາວ ບໍ່ມີມື້ສິ້ນສຸດ, ບາດກ້າວທີ່ຍ່າງຄຽງບ່າຄຽງໄຫຼ່ກັນ ຈະຕ້ອງກ້າວຂ້າມພູຜາປ່າດົງ, ເພື່ອຮ່ວມກັນກ້າວໄປສູ່ໄລຍະ 65 ປີຕໍ່ໜ້າທີ່ງົດງາມກວ່າເກົ່າ, ແລະ ສືບຕໍ່ປະກອບສ່ວນອັນໃໝ່ທີ່ໃຫຍ່ຫຼວງກວ່າເກົ່າເຂົ້າໃນພາລະກິດອັນສູງສົ່ງແຫ່ງສັນຕິພາບ ແລະ ການພັດທະນາຂອງມວນມະນຸດ.
ຄໍາເຫັນ