ຄາດວ່າຈະເຕີບໂຕໃນລະດັບປານກາງໃນອັດຕາ3.9% ໃນປີ2025 ແລະ4.0% ໃນປີ2026 ທ່າມກາງສິ່ງທ້າທາຍທາງດ້ານເສດຖະກິດມະຫາພາກ.
ທ່ານນາງແຊນນີແຄັມເບວຫົວໜ້າຫ້ອງການADB ປະຈໍາສປປລາວໄດ້ໃຫ້ຮູ້ວ່າ: ເປັນສິ່ງສໍາຄັນທີ່ສຸດທີ່ຈະເສີມສ້າງພື້ນຖານເສດຖະກິດມະຫາພາກ ທີ່ຢຶດໝັ້ນເສດຖະກິດແລະຮັບປະກັນຄວາມຍືດຍຸ່ນໃນໄລຍະຍາວ, ເນື່ອງຈາກຄວາມບໍ່ແນ່ນອນໃນສະພາບການຂອງໂລກໃນປັດຈຸບັນ. ການສຸມໃສ່ປັບປຸງການຄຸ້ມຄອງງົບປະມານ, ການພັດທະນາຊັບພະຍາກອນມະນຸດແລະພະລັງງານທົດແທນຈະຊ່ວຍເສີມຂະຫຍາຍຄວາມອາດສາມາດຂອງປະເທດເພື່ອຕ້ານທານກັບຜົນກະທົບຈາກພາຍນອກ,ຮັບປະກັນການເຕີບໂຕຂອງເສດຖະກິດແບບຍືນຍົງແລະຍົກສູງການລວມຕົວຂອງສັງຄົມ.
ນະໂຍບາຍເງິນຕາທີ່ເຂັ້ມງວດຂຶ້ນຄາດວ່າຈະຊ່ວຍຮັກສາສະຖຽນລະພາບຂອງອັດຕາແລກປ່ຽນແລະຊ່ວຍຫຼຸດຜ່ອນອັດຕາເງິນເຟີ້. ຈຸດຢືນດ້ານນະໂຍບາຍເງິນຕາທີ່ເຂັ້ມງວດໄດ້ຊ່ວຍຮັກສາສະຖຽນລະພາບຂອງຄ່າເງິນກີບແລະອັດຕາເງິນເຟີ້ໃນໄຕມາດທີ4ຂອງປີ2024. ຄ່າເງິນກີບໂດຍລວມໄດ້ອ່ອນຄ່າລົງ5.4%ເມື່ອທຽບໃສ່ໂດລາແລະແຂງຄ່າຂຶ້ນ1.2%ເມື່ອທຽບກັບເງິນບາດຂອງໄທ. ອັດຕາເງິນເຟີ້ສະເລ່ຍຢູ່ທີ່23.3%ແຕ່ລາຄາອາຫານ, ເຄື່ອງດື່ມປະເພດເຫຼົ້າ, ຮ້ານອາຫານແລະໂຮງແຮມຍັງຢູ່ໃນລະດັບສູງສົ່ງຜົນໃຫ້ລາຄາສິນຄ້າອຸປະໂພກບໍລິໂພກສູງຂຶ້ນ. ຄາດການວ່າອັດຕາເງິນເຟີ້ສະເລ່ຍຈະຫຼຸດລົງຢູ່ໃນລະດັບ13.5%ໃນປີ2025ແລະ10.4%ໃນປີ2026. ແນວໃດກໍຕາມ, ໜີ້ສິນທີ່ເປັນເງິນຕາຕ່າງປະເທດຈະຍັງສືບຕໍ່ກົດດັນອັດຕາແລກປ່ຽນແລະກົດດັນອັດຕາເງິນເຟີ້. ການປັບຂຶ້ນລາຄາໄຟຟ້າຊຶ່ງມີຜົນບັງຄັບໃຊ້ໃນເດືອນມີນາປີ2025ຈະເຮັດໃຫ້ເງິນເຟີ້ສູງຂຶ້ນໃນໄລຍະສັ້ນຫາໄລຍະກາງ.
ການລົງທຶນດ້ານພະລັງງານທົດແທນແລະບໍ່ແຮ່ຄາດວ່າຈະຊ່ວຍໃຫ້ຂະແໜງອຸດສາຫະກໍາເຕີບໂຕໃນໄລຍະສອງປີຕໍ່ໜ້າ. ຄາດວ່າມູນຄ່າການສົ່ງອອກໄຟຟ້າ, ແຮ່ທາດແລະຜະລິດຕະພັນກະສິກໍາຈະເພີ່ມຂຶ້ນແລະການນໍາເຂົ້າໜ້າຈະຟື້ນໂຕດ້ວຍຄ່າຂອງເງິນກີບຄົງທີ່. ແນວໃດກໍຕາມ, ຂະແໜງກະສິກໍາຍັງຈະປະເຊີນກັບສິ່ງທ້າທາຍຈາກການປ່ຽນແປງຂອງສະພາບດິນຟ້າອາກາດແລະຄາດວ່າຈະຍັງຄົງເຕີບໂຕໃນລະດັບປານກາງ. ການຂາດແຄນແຮງງານແລະລາຄາສິນຄ້າກະສິກໍາທີ່ຫຼຸດລົງຈະເຮັດໃຫ້ການລົງທຶນເຂົ້າໃນຂະແໜງດັ່ງກ່າວຫຼຸດລົງ.
ນະໂຍບາຍທາງດ້ານການເງິນຈະຍັງຄົງເຂັ້ມງວດເນື່ອງຈາກຍັງມີພາລະໜີ້ສິນສາທາລະນະ. ງົບປະມານປີ2025 ຕັ້ງເປົ້າໃຫ້ການຂາດດຸນຢູ່ໃນລະດັບ1% ຂອງ GDPໂດຍລາຍຮັບເພີ່ມຂຶ້ນ36% ເປັນ68.1 ພັນຕື້ກີບແລະລາຍຈ່າຍເພີ່ມຂຶ້ນ19.1%ເປັນ71.8ພັນຕື້ກີບທຽບໃສ່ກັບປີຜ່ານມາ. ການປະຕິຮູບອາກອນແລະຍົກລະດັບວຽກງານຄຸ້ມຄອງອາກອນຫຼາຍຂຶ້ນຈະຊຸກຍູ້ໃຫ້ການເກັບລາຍຮັບເພີ່ມຂຶ້ນ. ແຕ່ແນວໃດກໍຕາມ, ໜີ້ສິນສາທາລະນະທີ່ຍັງສູງຈະຍັງເປັນສິ່ງທ້າທາຍຕໍ່ຄວາມຍືນຍົງດ້ານການເງິນແລະຈໍາກັດລາຍຈ່າຍງົບປະມານຂອງລັດຖະບານ.
ຄວາມສ່ຽງຈາກພາຍນອກທີ່ສໍາຄັນຕໍ່ການຄາດຄະເນການເຕີບໂຕຂອງສປປລາວທີ່ເກີດມາຈາກການຂຶ້ນອັດຕາພາສີຂອງສະຫະລັດອາເມຣິກາ ຊຶ່ງຄາດວ່າຈະສົ່ງຜົນກະທົບໂດຍກົງຕໍ່ເສດຖະກິດຂອງລາວ, ພ້ອມທັງສົ່ງຜົນກະທົບຢ່າງຮຸນແຮງຕໍ່ເສດຖະກິດຂອງປະເທດເພື່ອນບ້ານທີ່ເປັນຄູ່ຄ້າສໍາຄັນຂອງລາວ. ຜົນກະທົບທັງໝົດຍັງຢູ່ພາຍໃຕ້ຄວາມບໍ່ແນ່ນອນ, ຂອບເຂດ ແລະ ການສົ່ງຕໍ່ຜົນກະທົບເຫຼົ່ານີ້ແມ່ນບໍ່ສາມາດກໍານົດມູນຄ່າໄດ້, ເພາະວ່າມັນຈະຂຶ້ນກັບໄລຍະເວລາຂອງອັດຕາພາສີແລະຄວາມສາມາດໃນການເຈລະຈາຂອງບັນດາປະເທດທີ່ໄດ້ຮັບຜົນກະທົບ.
ຄວາມເຂັ້ມງວດດ້ານນະໂຍບາຍເງິນຕາແລະການເງິນຈະສົ່ງຜົນທົບຕໍ່ລາຍຈ່າຍຂອງຂະແໜງສາທາລະນະສຸກແລະສຶກສາຊຶ່ງຈະມີຜົນກະທົບຕໍ່ການພັດທະນາຊັບພະຍາກອນມະນຸດແລະຜະລິດຕະພາບໂດຍລວມ. ເນື່ອງຈາກຄວາມຕ້ອງການໃນການຊໍາລະໜີ້ສິນທີ່ເພີ່ມຂຶ້ນລາຍຈ່າຍທີ່ສໍາຄັນຕໍ່ກັບວຽກງານສາທາລະນະສຸກແລະສຶກສາແມ່ນຫຼຸດລົງຢ່າງຫຼວງຫຼາຍ. ບົດລາຍງານໄດ້ເນັ້ນໃຫ້ເຫັນເຖິງຄວາມຈໍາເປັນຂອງການປະຕິຮູບການຄຸ້ມຄອງການເງິນພາກລັດຢ່າງຮອບດ້ານເພື່ອແກ້ໄຂສິ່ງທ້າທາຍໃນຂະແໜງສຶກສາແລະສາທາລະນະສຸກ.
(ຂ່າວ-ພາບ: ສຸກສະຫວັນ)
ຄໍາເຫັນ