ໃນໄລຍະ50 ປີຜ່ານມາ, ພັກປະຊາຊົນປະຕິວັດລາວໄດ້ເຕົ້າໂຮມນໍາພາປະຊາຊົນລາວ ບາກບັ່ນສູ້ຊົນ ແລະກ້າວໄປໜ້າຢ່າງໜັກແໜ້ນ ເຊິ່ງໄດ້ຮັບຜົນສໍາເລັດໜ້າຊົມຊື່ນ ໃນພາລະກິດການປ່ຽນແປງໃຫມ່, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນຢ່າງຕໍ່ເນື່ອງ, ຖານະບົດບາດໃນເວທີສາກົນແລະພາກພື້ນໄດ້ຮັບການຍົກສູງຂຶ້ນຢ່າງຈະແຈ້ງ. ໃນຖານະເປັນສະຫາຍ ແລະອ້າຍນ້ອງ, ຝ່າຍຈີນຮູ້ສຶກປິຕິຊົມຊື່ນເປັນຢ່າງຍິ່ງ ຕໍ່ຜົນສໍາເລັດ ດັ່ງກ່າວ, ພວກຂ້າພະເຈົ້າເຊື່ອໝັ້ນວ່າ ຝ່າຍລາວຈະເດີນຕາມເສັ້ນທາງສັງຄົມນິຍົມທີ່ສອດຄ່ອງກັບສະພາບຕົວຈິງຂອງປະເທດຕົນເອງຢ່າງແນ່ນອນ, ຕ້ອນຮັບການດຳເນີນກອງປະຊຸມໃຫຍ່ ຄັ້ງທີ XIIຂອງພັກຢ່າງມີໄຊ ແລະສ້າງພາບພົດໃໝ່ໃຫ້ແກ່ພາລະກິດສ້າງສາພັດທະນາ ຂອງພັກ ແລະປະເທດຊາດ.
ສະຫາຍ ເລຂາທິການໃຫຍ່ ໄດ້ສໍາເລັດການຢ້ຽມຢາມປະເທດຈີນຢ່າງຈົບງາມ ໃນເດືອນກັນຍາຜ່ານມາ, ຂ້າພະເຈົ້າ ແລະສະຫາຍໄດ້ບັນລຸຄວາມເຫັນທີ່ເປັນເອກະພາບກັນໃນດ້ານຍຸດທະສາດອັນໃໝ່ ກ່ຽວກັບການລົງເລິກສ້າງຄູ່ຮ່ວມຊາຕາກໍາຈີນ-ລາວ. ຝ່າຍຈີນຖືປະເທດລາວເປັນບູລິມະສິດໃນວຽກງານຕ່າງປະເທດກັບບັນດາປະເທດອ້ອມຂ້າງ, ຍິນດີ ຮ່ວມກັບຝ່າຍລາວ, ຖືໂອກາດການສ້າງຕັ້ງສາຍພົວພັນທາງການທູດຈີນ-ລາວຄົບຮອບ 65 ປີ ໃນປີຫນ້າ, ເສີມສ້າງມິດຕະພາບອັນເປັນມູນເຊື້ອ, ເພີ່ມທະວີຄວາມສາມັກຄີ ແລະການປະສານສົມທົບກັນ, ຊຸກຍູ້ການຮ່ວມມືຍຸດທະສາດຮອບດ້ານລະຫວ່າງຈີນ ແລະລາວ ໃນຍຸກສະໄໝໃໝ່ໃຫ້ກ້າວເຂົ້າສູ່ລວງເລິກ ແລະເປັນຮູບປະທໍາຢ່າງບໍ່ຢຸດຢັ້ງ, ນໍາເອົາຄວາມຜາສຸກຫຼາຍກວ່າເກົ່າໃຫ້ແກ່ປະຊາຊົນສອງຊາດ, ປະກອບສ່ວນອັນໃຫຍ່ຫຼວງກວ່າເກົ່າເຂົ້າໃນການສ້າງສັນຕິພາບ ແລະການພັດທະນາຂອງພາກພື້ນ ແລະ ໂລກ.
ຂໍອວຍພອນໃຫ້ປະເທດລາວຈົ່ງຈະເລີນຮຸ່ງເຮືອງ ແລະປະຊາຊົນຈົ່ງຢູ່ເຢັນເປັນສຸກ.
ຂໍອວຍພອນໃຫ້ການສ້າງຄູ່ຮ່ວມຊາຕາກໍາຈີນ-ລາວໄດ້ຮັບຄວາມຄືບໜ້າໃໝ່ຢ່າງບໍ່ຢຸດຢັ້ງ.
ຄໍາເຫັນ