 |
ທ່ານ ດາວວັນ ສີລີວົງ ຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງ ນະຄອນຫຼວງພະບາງ ຕາງໜ້າກຸ່ມອະດີດນັກຮຽນໄດ້ໃຫ້ສຳພາດວ່າ: ການຈັດກິດຈະກຳຄັ້ງນີ້, ໄດ້ມີການປຶກສາຫາລືຮ່ວມກັບໝູ່ຄະນະ ໂດຍເຫັນໄດ້ຄວາມສຳຄັນໃນການຮັກສາຄວາມສະອາດໃນຕົວເມືອງຫຼວງພະບາງ ຈຶ່ງໄດ້ຈັດກິດຈະ ກຳອະນາໄມຕົວເມືອງ ໂດຍການເກັບມ້ຽນຂີ້ເຫຍື້ອໃຫ້ມີຄວາມສະອາດຈົບງາມ. ຊຶ່ງຜ່ານມາໄດ້ມີກຸ່ມອາສາສະໝັກ ພ້ອມກັນຈັດຂະບວນການເປັນປະຈຳເດືອນ ສຳລັບຄັ້ງນີ້ ຖືເປັນການຈັດຂະບວນການເພື່ອປຸກລະດົມໃຫ້ທົ່ວສັງຄົມຫັນມາໃສ່ໃຈຮັກສາຄວາມສະອາດ ດ້ວຍການມີສ່ວນຮ່ວມເກັບມ້ຽນຂີ້ເຫຍື້ອ ບໍ່ຖິ້ມຂີ້ເຫຍື້ອຊະຊາຍ. ພ້ອມນີ້, ຮຽກຮ້ອງມາຍັງທຸກພາກສ່ວນໃນທົ່ວສັງຄົມ ຈົ່ງພ້ອມກັນປະກອບສ່ວນຮັກສາຄວາມສະອາດໃນຕົວເມືອງຫຼວງພະບາງ ເພື່ອເຮັດໃຫ້ຕົວເມືອງ ກາຍເປັນສະຖານທີ່ທ່ອງທ່ຽວທີ່ໜ້າປະທັບໃຈສຳລັບນັກທ່ອງທ່ຽວທັງພາຍໃນ ແລະ ຕ່າງປະເທດ ທັງເປັນການດຶງດູດເອົານັກທ່ອງທ່ຽວໃຫ້ເຂົ້າມາທ່ອງທ່ຽວຫຼວງພະບາງນັບມື້ນັບຫຼາຍຂຶ້ນ.
 |
ການຈັດກິດຈະກໍາຄັ້ງນີ້, ໄດ້ເລີ່ມເກັບຂີ້ເຫຍື້ອຈາກໜ້າໂຮງແຮມເມືອງຫຼວງ ໄປຕາມເສັ້ນທາງແຄມນໍ້າຄານ ທັງໄດ້ມີການປ່ອຍປາລົງສູ່ແມ່ນ້ຳຂອງເຂດປາກນ້ຳຄານ ຊຶ່ງເຕັມໄປດ້ວຍບັນຍາກາດເບີກບານມ່ວນຊື່ນ. ຂ່າວ: ອາພຸດເດດ ບຸບຜາ; ພາບ: ທະນູສິນ ອິດທິພົນ
ຄໍາເຫັນ