ການທົດລອງໃນໄລຍະເລີ່ມຕົ້ນ (pre-clinical) ພົບວ່າ: ການກິນອາຫານທີ່ມີໄຂມັນອີ່ມຕົວສູງພຽງແຕ່ສອງມື້ໄດ້ຫຼຸດລະດັບ interleukin 22 (IL-22) ຊຶ່ງເປັນທາດໂປຣຕີນປ້ອງກັນທີ່ສໍາຄັນທີ່ຊ່ວຍຮັກສາສຸຂະພາບຂອງລໍາໄສ້ ແລະ ຄວບຄຸມການອັກເສບລົງຢ່າງຫຼວງຫຼາຍ. ໂດຍໜູທົດລອງທີ່ມີສຸຂະພາບດີສະແດງສັນຍານອາການອັກເສບລະດັບຈຸນລະພາກ ແລະ ການເຮັດວຽກຂອງລໍາໄສ້ຜິດປົກກະຕິ.
ທ່ານ ຊິຣິລ ເຊຍເລດ ຜູ້ຂຽນຜົນການສຶກສາລະດັບອາວຸໂສ ກ່າວວ່າ: ອາຫານທຸກໆຄາບທີ່ພວກເຮົາກິນມີຜົນກະທົບຕໍ່ສຸຂະພາບລຳໄສ້. ຍິ່ງກິນອາຫານທີ່ມີໄຂມັນອີ່ມຕົວສູງຫຼາຍເທົ່າໃດ, ຍິ່ງສະສົມການອັກເສບຫຼາຍຂຶ້ນເທົ່ານັ້ນ, ເຮັດໃຫ້ລະບົບພູມຕ້ານທານຂອງລໍາໄສ້ອ່ອນແອ ແລະ ເພີ່ມຄວາມສ່ຽງຂອງການອັກເສບຊໍາເຮື້ອ.
ທັງນີ້, ອາການອັກເສບຊໍາເຮື້ອເຊັ່ນ: ພະຍາດເຊລີແອດ (celiac), ອັກເສບກະເພາະລໍາໄສ້ ແລະ ໂຣກຂໍ້ອັກເສບສົ່ງຜົນກະທົບຕໍ່ຊາວອົສຕຣາລີປະມານໜຶ່ງໃນສາມ.
ຜົນການສຶກສານີ້ຊີ້ໃຫ້ເຫັນວ່າ: ການກິນອາຫານທີ່ມີໄຂມັນສູງບໍ່ພຽງແຕ່ກະຕຸ້ນການອັກເສບ, ແຕ່ຍັງລະງັບຄວາມສາມາດຂອງຮ່າງກາຍໃນການຕໍ່ສູ້ກັບການອັກເສບໂດຍການຫຼຸດ interleukin 22, ໂດຍທ່ານ ເລີ ສຽງ ຜູ້ຂຽນການສຶກສາອີກຄົນກ່າວວ່າ: ຄວາມສາມາດໃນການປ້ອງກັນລໍາໄສ້ຈະຫຼຸດລົງໃນເວລາພຽງ 2 ມື້, ໂດຍບໍ່ມີສັນຍານອາການພາຍນອກໃດໆ.
ຢ່າງໃດກໍຕາມ, ນັກຄົ້ນຄວ້າຍັງພົບວ່າໄຂມັນທີ່ບໍ່ອີ່ມຕົວເຊັ່ນ: ໄຂມັນໃນໝາກຖົ່ວ, ແກ່ນພືດ ແລະ ອາໂວກາໂດ ຊ່ວຍເພີ່ມ interleukin 22 ແລະ ເພີ່ມພູມຕ້ານທານຂອງລໍາໄສ້. ລວມເຖິງສາມາດຟື້ນຟູການເຮັດວຽກຂອງລໍາໄສ້ໃນໜູທົດລອງດ້ວຍການເສີມ interleukin 22 ຊຶ່ງຊີ້ໃຫ້ເຫັນທ່າແຮງໃນການຟື້ນຟູສຸຂະພາບຂອງລໍາໄສ້ໃນມະນຸດ.
ນັກຄົ້ນຄວ້າຫວັງວ່າຜົນຂອງການສຶກສານີ້ຈະມີອິດທິພົນຕໍ່ການກຳນົດຄໍາແນະນໍາກ່ຽວກັບການກິນອາຫານ. ເພື່ອສະໜັບສະໜູນສຸຂະພາບຂອງລໍາໄສ້ທີ່ດີຕາມທໍາມະຊາດໂດຍຜ່ານໂພຊະນາການ. ໂດຍສະເພາະແມ່ນການສົ່ງເສີມໄຂມັນບໍ່ອີ່ມຕົວ ແລະ ຫຼຸດຜ່ອນການບໍລິໂພກໄຂມັນອີ່ມຕົວ.
ຜົນການສຶກສານີ້ໄດ້ຖືກຂຽນຮ່ວມກັນໂດຍ ສະຖາບັນ Walter ແລະ Eliza Hall ມະຫາວິທະຍາໄລ Monash, ສະຖາບັນ Baker ແລະ ມະຫາວິທະຍາໄລ Melbourne ແລະ ພິມເຜີຍແຜ່ໃນວາລະສານຂອງ Immunity ໃນວັນທີ 19 ພຶດສະພາ ຜ່ານມາ.
ຄໍາເຫັນ