 |
ການແຂ່ງຂັນໃນຄັ້ງນີ້ ມີການຊີງໄຊກັນທັງໝົດ 6 ລາຍການ ໃນ 4 ຮຸ່ນອາຍຸ ໂດຍແບ່ງການແຂ່ງຂັນອອກເປັນ 2 ມື້ ໃນເສັ້ນທາງທີ່ແຕກຕ່າງກັນ ເພື່ອທົດສອບຄວາມສາມາດ ແລະ ສະມັດຖະພາບຂອງນັກກິລາຢ່າງຮອບດ້ານ ໂດຍມື້ທຳອິດ (27 ມິຖຸນາ) ແຂ່ງຂັນຢູ່ເສັ້ນທາງບໍລິເວນບຶງທາດຫຼວງ ນະຄອນຫຼວງວຽງຈັນ ປະກອບມີ 2 ລາຍການຄື: ປະເພດດ່ຽວຊາຍ ໄລຍະໄກ ຮຸ່ນເຍົາວະຊົນ (ໄລຍະທາງ 14 ກິໂລແມັດ, ນັກກິລາ 13 ຄົນ) ແລະ ດ່ຽວຊາຍ ໄລຍະໄກ ຮຸ່ນທົ່ວໄປ (ໄລຍະທາງ 20 ກິໂລແມັດ, ນັກກິລາ 24 ຄົນ). ສ່ວນມື້ທີສອງ (28 ມິຖຸນາ) ເລີ່ມຕົ້ນທີ່ຮ້ານກາເຟສີນຸກ ຈຸດທາງດ່ວນ ລາວ-ຈີນ (ນະຄອນຫຼວງວຽງຈັນ-ວັງວຽງ) ແຂ່ງຂັນ 4 ລາຍການຄື: ຈັບເວລາ ດ່ຽວຊາຍ ເຍົາວະ ຊົນ, ຈັບເວລາ ດ່ຽວຊາຍ ຮຸ່ນທົ່ວໄປ, ດ່ຽວຍິງ ໄລຍະໄກ ຮຸ່ນທົ່ວໄປ ແລະ ດ່ຽວຊາຍ ຮຸ່ນອາຍຸ 40 ປີຂຶ້ນໄປ.
ຜົນການແຂ່ງຂັນໃນແຕ່ລະປະເພດມີດັ່ງລຸ່ມນີ້: ປະເພດດ່ຽວຊາຍ ໄລຍະໄກ ຮຸ່ນທົ່ວໄປ (20 ກິໂລແມັດ) ທີ 1: ທ້າວ ອານັນໄຊ ວິລາກົງ, ທີ 2 ທ້າວ ເຈໂຣມ ແລະ ທີ 3 ທ້າວ ວໍລະວັດ ພາໂພ; ປະເພດດ່ຽວຊາຍ ໄລຍະໄກ ຮຸ່ນເຍົາວະຊົນ (14 ກິໂລແມັດ) ທີ 1 ທ້າວ ພູຄູນ ຈັນສີດາ (ບືນເຂົ້າເສັ້ນໄຊຊະນະກັນພຽງສ້ຽວວິນາທີ) ທີ 2 ທ້າວ ບຸນປະເສີດ ຈັນທະຜາລີ ແລະ ທີ 3 ທ້າວ ທະນະວິນ ສີຈັນທາ; ປະເພດຈັບເວລາ ດ່ຽວຊາຍ ຮຸ່ນທົ່ວໄປ ທີ 1 ທ້າວ ຖາວອນ ພົນອາສາ, ທີ 2 ທ້າວ ເທບປະສິດ ພົງສຸວັນ ແລະ ທີ 3 ທ້າວ ກອງມະນີ ໄຊຍະລາດ; ປະເພດຈັບເວລາ ດ່ຽວຊາຍ ຮຸ່ນເຍົາວະຊົນ ທີ 1 ທ້າວ ບຸນປະເສີດ ຈັນທະຜາລີ, ທີ 2 ທ້າວ ພູຄູນ ຈັນສີດາ ແລະ ທີ 3 ທ້າວ ພູສະຫວັດ ມະຫາທິລາດ; ປະເພດດ່ຽວຍິງ ໄລຍະໄກ ຮຸ່ນທົ່ວໄປ ທີ 1 ທ້າວ ທອງຄູນ ໄທປັນຍາວົງ,ທີ 2 ທ້າວ ໂບຕັນ ວິໄຊ ແລະ ທີ 3 ທ້າວ ພູໂຂງ ແພງປາສັກ; ປະເພດດ່ຽວຊາຍ ຮຸ່ນອາວຸໂສ (ອາຍຸ 40 ປີຂຶ້ນໄປ) ທີ 1 ທ້າວ ລຳເງິນ ວັນນະສຸກ, ທີ 2 ທ້າວ ພຸດທະສອນ ອິນທະມິດ ແລະ ທີ 3 ທ້າວ ອາທິດ ສົ້ມອົ້ມ.
 |
ໃນໂອກາດນີ້, ທ່ານ ຫົງຄຳ ສຸວັນນະວົງ ປະທານສະຫະພັນລົດຖີບແຫ່ງຊາດລາວ ໄດ້ໃຫ້ສຳພາດວ່າ: “ການຈັດການແຂ່ງຂັນຄັ້ງນີ້ ແມ່ນມີຈຸດປະສົງເພື່ອຍົກລະດັບ ແລະ ພັດທະນາກິລາລົດຖີບຂອງລາວໃຫ້ກ້າວໜ້າ, ມີຄຸນນະພາບທຽບເທົ່າກັບລະດັບພາກພື້ນ ແລະ ສາກົນ. ທີ່ສຳຄັນແມ່ນເພື່ອສົ່ງເສີມ ແລະ ສ້າງນັກກິລາຮຸ່ນເຍົາວະຊົນ ເພື່ອສືບທອດປ່ຽນແທນໃນອະນາຄົດ ຄຽງຄູ່ກັບການສ້າງຄວາມເຂັ້ມແຂງໃຫ້ແກ່ທີມຊາດລາວ ແລະ ສົ່ງເສີມການອອກກຳລັງກາຍເພື່ອສຸຂະພາບ ກໍຄືຄວາມສາມັກຄີຮັກແພງ.”
ຂ່າວ-ພາບ: ສົງການ
ຄໍາເຫັນ