 |
ທ່ານ ມອກສະຫວັນ ຈິດຕະວົງ ເຈົ້າຂອງແຫຼ່ງທ່ອງທ່ຽວທໍາມະຊາດອ່າງຫຼວງໄດ້ເວົ້າວ່າ: ອ່າງຫຼວງເປັນແຫຼ່ງທ່ອງທ່ຽວທາງທໍາມະຊາດ ຕັ້ງຢູ່ບ້ານນາມ່ວງ ຫ່າງຈາກຕົວເມືອງວັງວຽງ ປະມານ 13 ກິ ໂລແມັດ ເປັນແຫຼ່ງທ່ອງທ່ຽວທີ່ຕິດພັນກັບການປົກປັກຮັກສິ່ງແວດລ້ອມຂອງສະຖານທີ່ທ່ອງທ່ຽວ, ອ່າງຫຼວງມີທີວທັດທໍາມະຊາດທີ່ສວຍງາມອ້ອມຮອບໄປດ້ວຍພູຜາປ່າໄມ້, ມີອ່າງນໍ້າທີ່ໃສເຢັນ ເຮັດໃຫ້ນັກທ່ອງທ່ຽວເພີດເພີນ ແລະ ຮູ້ສຶກຜ່ອນຄາຍເມື່ອໄດ້ເຂົ້າມາທ່ຽວຊົມ ຊຶ່ງກິດຈະກຳຍອດນິຍົມຂອງນັກທ່ອງທ່ຽວ ແມ່ນການໂດດນໍ້າຂີ່ສະລິງ, ຢ່າງປ່າຊົມທໍາມະຊາດທີ່ສວຍງາມ, ຊົມການສະແດງສິລະປະພື້ນບ້ານ, ການນັ່ງຕູມກິນອາຫານທີ່ແຊບ ແລະ ກິດຈະກໍາອື່ນໆ. ນອກຈາກນີ້, ສະຖານທີ່ທ່ອງທ່ຽວອ່າງຫຼວງຍັງເປັນສະຖານທີ່ ທີ່ປະຊາຊົນມີສ່ວນຮ່ວມໃນການສ້າງກິດຈະກຳ ໂດຍສະເພາະແມ່ນການຂາຍອາຫານພື້ນບ້ານ, ເຄື່ອງທີ່ລະນຶກຊຶ່ງໄດ້ສ້າງສີສັນ ແລະ ດຶງດູດຄວາມສົນໃຈຈາກນັກທ່ອງທ່ຽວທັງພາຍໃນ ແລະ ຕ່າງປະ ເທດຢ່າງຫຼວງຫຼາຍ. ໃນແຕ່ລະວັນມີນັກທ່ອງທ່ຽວທັງພາຍໃນ ແລະ ຕ່າງປະເທດມາທ່ຽວຊົມປະມານ 200-300 ຄົນຕໍ່ວັນ.
 |
ທ່ານ ມອກສະຫວັນ ຈິດຕະວົງ ໃຫ້ຮູ້ອີກວ່າ: ຕົນເອງໄດ້ມາພັດທະນາອ່າງຫຼວງໃນປີ 2014 ໂດຍສະເພະແມ່ນຂະຫຍາຍສິ່ງປຸກສ້າງຮ້ານອາຫານໃໝ່, ປັບປຸງສະຖານທີ່ທ່ຽວຊົມຖ້ຳ ແລະ ການຍ່າງປ່າຕາມຈຸດຕ່າງໆ ແລະ ກິດຈະກຳອື່ນໆໃຫ້ມີຄວາມຫຼາກຫຼາຍ, ສວຍງາມຂຶ້ນ ແລະ ຮັບປະກັນໄດ້ຄວາມປອດໄພຂອງນັກທ່ອງທ່ຽວ. ໃນຂະນະດຽວກັນ, ກໍໄດ້ເອົາໃຈໃສ່ໃນການປົກປັກຮັກສາສິ່ງແວດລ້ອມໄປຄຽງຄູ່ກັບການພັດທະນາ ໂດຍສິ່ງດັ່ງກ່າວເປັນປັດໄຈເຮັດໃຫ້ສະຖານທີ່ທ່ອງທ່ຽວອ່າງຫຼວງໄດ້ຮັບລາງວັນ ການພັດທະນາທ່ອງທ່ຽວດີເດັ່ນ ແລະ ຍືນຍົງຂອງ ສປປ ລາວ.
 |
ທິດທາງແຜນການໃນຕໍ່ໜ້າ ຈະສືບຕໍ່ພັດທະນາແຫຼ່ງທ່ອງທ່ຽວທໍາມະຊາດອ່າງຫຼວງໃຫ້ໄປຕາມທິດສີຂຽວ ແລະ ຍືນຍົງ ແລະ ເປັນມິດກັບສິ່ງແວດລ້ອມ ຕິດພັນກັບການພັດທະນາຕາມແລວເສດຖະກິດຂອງແຂວງ ແລະ ສາມາດຮອງຮັບການເຊື່ອມໂຍງ, ເຊື່ອມຈອດການທ່ອງທ່ຽວກັບພາກພື້ນ, ສາກົນ, ການບໍລິການທາງຜ່ານ ແລະ ອື່ນໆໃຫ້ໄປຕາມວິໄສທັດ. ດັ່ງຄໍາຂວັນທີ່ວ່າ: ເມືອງແຫ່ງສາຍນໍ້າໄຫຼ-ສົດໃສປ່າໄມ້ສີຂຽວ, ທ່ອງທ່ຽວປອດໄພ ແລະ ຊາວເມືອງມີນໍ້າໃຈປະເສີດ.
ຄໍາເຫັນ