 |
ພິທີດັ່ງກ່າວຈັດຂຶ້ນໃນວັນທີ 26 ສິງຫາ 2026 ທີ່ແຂວງອັດຕະປື ໂດຍການເຂົ້າຮ່ວມຂອງ ທ່ານນາງ ມີນາພອນ ໄຊສົມພູ ຮອງເລຂາພັກແຂວງອັດຕະປື, ທ່ານນາງ ບັນທະໄລ ແກ້ວມະນີວົງ ຄະນະປະຈຳພັກແຂວງ, ປະທານແນວລາວສ້າງຊາດແຂວງ,ມີຄະນະນໍາຂອງແຂວງ, ສະມາຊິກພັກ, ພະນັກງານ-ລັດຖະກອນອ້ອມຂ້າງແຂວງ ເຂົ້າຮ່ວມ.
ທ່ານ ນາງ ມີນາພອນ ໄຊສົມພູ ໄດ້ຍົກໃຫ້ເຫັນເຖິງປະຫວັດຄວາມເປັນມາ, ມູນເຊື້ອແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງແນວລາວສ້າງຊາດ, ພ້ອມທັງເນັ້ນໜັກເຖິງບົດບາດສຳຄັນຂອງແນວລາວສ້າງຊາດ ໃນການເປັນຄັນທຸງເຕົ້າໂຮມຄວາມສາມັກຄີປອງດອງ ຂອງປະຊາຊົນລາວບັນດາເຜົ່າ ຊັ້ນຄົນຕ່າງໆ ພາຍໃຕ້ການນຳພາຂອງພັກ ເຊິ່ງເປັນປັດໃຈຕັດສິນທຸກໄຊຊະນະຂອງການປະຕິວັດລາວ ໃນແຕ່ລະໄລຍະ.
ທ່ານນາງ ບັນທະໄລ ແກ້ວມະນີວົງ ຄະນະປະຈໍາພັກແຂວງ ປະທານແນວລາວສ້າງຊາດແຂວງອັດຕະປື ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານ ແລະ ຜົນງານອັນພົ້ນເດັ່ນຂອງແນວລາວສ້າງຊາດແຂວງ ໃນໄລຍະຜ່ານມາ ເຊິ່ງໄດ້ປະກອບສ່ວນຢ່າງຕັ້ງໜ້າເຂົ້າໃນການສຶກສາອົບຮົມການເມືອງແນວຄິດ, ສ້າງຄວາມສາມັກຄີປອງດອງພາຍໃນແຂວງ, ຊຸກຍູ້ປະຊາຊົນເຂົ້າຮ່ວມຂະບວນການພັດທະນາເສດຖະກິດ-ສັງຄົມ ແລະ ປັບປຸງຊີວິດການເປັນຢູ່ໃຫ້ດີຂຶ້ນຢ່າງບໍ່ຢຸດຢັ້ງ.
 |
ໃນພິທີ, ຍັງໄດ້ປະດັບຫຼຽນກາລະນຶກ 50 ປີ ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃຫ້ແກ່ພະນັກງານແນວລາວສ້າງຊາດ ຜູ້ທີ່ມີຜົນງານພົ້ນເດັ່ນ ໃນການອຸທິດຕົນປົກປັກຮັກສາ ແລະ ສ້າງສາພັດທະນາປະເທດຊາດ ໃນໄລຍະຜ່ານມາ. ສຳລັບ ແນວລາວສ້າງຊາດແຂວງ ມີຜູ້ທີ່ໄດ້ຮັບການປະດັບຫຼຽນ ຈຳນວນທັງໝົດ 27 ທ່ານ, ໃນນັ້ນມີຍິງ 11 ທ່ານ ແລະ ເປັນພະນັກງານບຳນານ ຈໍານວນ 15 ທ່ານ, ໂດຍໃຫ້ກຽດມອບ ແລະ ປະດັບຫຼຽນກາລະນຶກ 50 ປີ ຂອງທ່ານ ນາງ ມີນາພອນ ໄຊຊົມພູ.
ຂ່າວ: ວີເດັ່ນ
ຄໍາເຫັນ