ໃນ ວັນທີ 22 ເມສານີ້, ຄະນະຮັບຜິດຊອບຂັ້ນແຂວງ ແລະ ຂັ້ນເມືອງຊານໄຊ ສົມທົບກັບບໍລິສັດຜູ້ພັດທະນາອະນຸລັກປ່າແຫ່ງນີ້ໂດຍພາຍໃຕ້ການນຳພາ ຂອງ ທ່ານ ພົທ ວັນທອງ ກອງມະນີ ເຈົ້າແຂວງອັດຕະປື ໄດ້ລົງເຄື່ອນໄຫວສຳຫຼວດຕົວຈິງ ເພື່ອສຶກສາຄວາມເປັນໄປໄດ້ໃນການພັດທະນາໃຫ້ເປັນແຫຼ່ງທ່ອງທ່ຽວ, ປັດຈຸບັນ ດົງສະຫງວນແຫຼ່ງທ່ອງທ່ຽວແຫ່ງນີ້ແມ່ນໄດ້ຖືກພັດທະນາ ແລະ ອະນຸລັກໃຫ້ເປັນເເຫຼ່ງທ່ອງທ່ຽວທາງທຳມະຊາດ ແລະ ປະຫວັດສາດໂດຍແມ່ນບໍລິສັດຄູນຊັບຈະເລີນກໍ່ສ້າງສ້ອມແປງຂົວທາງ ແລະ ຊົນລະປະທານຈຳກັດຜູ້ດຽວໄດ້ເລີ່ມລົງມືໃນການສໍາຫຼວດ ແລະ ບຸກເບີກເສັ້ນທາງເຂົ້າສູ່ສະຖານທີ່ພັດທະນາແຫຼ່ງທ່ອງທ່ຽວດັ່ງກ່າວໄດ້ໂດຍພື້ນຖານ ເພື່ອສ້າງເງື່ອນໄຂໃນການເຄື່ອນໄຫວສໍາຫຼວດໃນຄັ້ງນີ້ ໃຫ້ສະດວກສະບາຍ ແລະ ໄດ້ລິເລີມພັດທະນາອະນຸລັກແຫຼ່ງທ່ອງທ່ຽວປິ່ນອ້ອມສຳເລັດໂດຍພື້ນຖານອີກຈຳນວນໜຶ່ງ.
ທ່ານ ພິມສາ ຄຳມະນິວົງ ຮອງນາຍບ້ານດາກຮຽດໃຫ້ຮູ້ວ່າ: ຖ້ຳອະນຸລັກແຫ່ງນີ້ແມ່ນຢູ່ໃນເຂດດົງຫງວນພູແດງ, ຫ່າງຈາກເສັ້ນທາງໂຮຈີມີນ 1.1 ກິໂລເເມັດ ມີຊື່ເອີ້ນດັ້ງເດີມແມ່ນຖໍ້າຫ້ວຍໂປພູແດງ, ຢູ່ຈຸດດຽວກັນກັບຊາກລົດຕັງສະໄໝສົງຄາມ.
ສຳລັບການລົງເຄື່ອນໄຫວສຳຫຼວດຖ້ຳອະນຸລັກແມ່ນເຫັນໄດ້ເປັນສະຖານທີ່ທ່ອງທ່ຽວທີ່ສວຍງາມ ແລະ ອັດສະຈັນໃຈ, ເປັນສະຖານທີ່ທ່ອງທ່ຽວທີ່ມີການສ້າງທໍາມະຊາດທີ່ສວຍງາມ ແລະ ມີບັນຍາກາດສະຫງົບເໝາະສົມສໍາລັບການພັກຜ່ອນ ແລະ ສໍາຜັດກັບຄວາມງາມຂອງທໍາມະຊາດ, ພາຍໃນຖໍ້າມີຫີນງອກ ແລະ ຫີນປູນທີ່ເປັ່ງປະກາຍ, ສ້າງຄວາມຮູ້ສຶກທີ່ໜ້າຕື່ນເຕັ້ນ. ນອກຈາກນີ້, ຍັງມີການທ່ອງທ່ຽວຖໍ້າ ແລະ ການສຶກສາທໍາມະຊາດ.
ທ່ານ ເຈົ້າແຂວງອັດຕະປື ໄດ້ໃຫ້ການຊີ້ນຳໃນຫຼາຍຢ່າງທີ່ໜ້າສົນໃຈ ເພື່ອໃຫ້ພາກລັດ ແລະ ບໍລິສັດຜູ້ພັດທະນາຢູ່ໃນເຂດດັ່ງກ່າວ ໃຫ້ນັກທ່ອງທ່ຽວໄດ້ເດີນທາງຍ່າງປ່າໃຫ້ມີຄວາມປອດໄພ ແລະ ສະດວກແກ່ຜູ້ເດີນທາງ ເຊັ່ນ: ເສັ້ນທາງຍ່າງປ່າສຶກສາທໍາມະຊາດ, ຈັດຕັ້ງກິດຈະກໍາການອະນຸລັກທໍາມະຊາດເຊັ່ນ: ການປູກຕົ້ນໄມ້, ທໍາຄວາມສະອາດປ່າໄມ້ ແລະ ອື່ນໆ, ສະໜອງຂໍ້ມູນການທ່ອງທ່ຽວ: ສ້າງຈຸດຂໍ້ມູນຂ່າວສານເພື່ອສຶກສາກ່ຽວກັບຊີວະນາໆພັນ ແລະ ສິ່ງທີ່ນັກທ່ອງທ່ຽວຈະພົບເຫັນໃນການທ່ຽວຊົມ, ສ້າງຕັ້ງຮ້ານຂາຍອາຫານ ແລະ ເຄື່ອງທີ່ລະນຶກ: ສະໜັບສະໜູນທຸລະກິດທ້ອງຖິ່ນໂດຍການຕັ້ງບູດຂາຍອາຫານ ແລະ ເຄື່ອງທີ່ລະນຶກທີ່ຕິດພັນກັບວັດທະນະທຳທ້ອງຖິ່ນ, ຈັດການເດີນທາງສຶກສາທໍາມະຊາດ, ເຮັດວຽກກັບນັກຄົ້ນຄວ້າ ຫຼື ຜູ້ຊ່ຽວຊານໃນການຈັດການເດີນທາງ ເພື່ອໃຫ້ນັກທ່ອງທ່ຽວໄດ້ຮຽນຮູ້ກ່ຽວກັບພືດ ແລະ ສັດໃນພື້ນທີ່... ນັກທ່ອງທ່ຽວ, ຜູ້ໃຫ້ບໍລິການ, ນັກສຳຫຼວດ, ນັກພັດທະນາ ແລະ ນັກຮຽນຮູ້ ຕ້ອງຄຳນຶງເຖິງການຮ່ວມມື ຮ່ວມໃຈກັນຕໍ່ກັບການສະໜັບສະໜຸນຄວາມພະຍາຍາມ ໃນການອະນຸລັກ, ການສົ່ງເສີມການທ່ອງທ່ຽວທີ່ເປັນມິດຕໍ່ສິ່ງແວດລ້ອມໃຫ້ຍືນຍົງສືບຕໍ່ເມືອໜ້າ ແລະ ປະກອບສ່ວນເຂົ້າໃນການອະນຸລັກທໍາມະຊາດໃນໄລຍະຍາວ
(ຂ່າວ: ໄພບູນ)
ຄໍາເຫັນ