ໄດ້ມີຄໍາເຫັນຕໍ່ບົດລາຍງານຂອງລັດຖະບານກ່ຽວກັບວຽກງານສາມສ້າງ ຕາມມະຕິສະພາແຫ່ງຊາດ ສະບັບເລກທີ 02/ສພຊ,ລົງວັນທີ 28 ມັງກອນ 2016 ວ່າດ້ວຍການຈັດຕັ້ງປະຕິບັດວຽກງານສາມສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ.
ທ່ານ ສີເຮັງ ຫອມສົມບັດ ສສຊ ປະຈໍາເຂດເລືອກຕັ້ງທີ 14 ແຂວງສາລະວັນ ໄດ້ກ່າວວ່າ: ວຽກງານສາມສ້າງຜ່ານການປະເມີນການຈັດຕັ້ງປະຕິບັດວຽກງານດັ່ງກ່າວໃນ 578 ບ້ານ ສາມາດປະເມີນໄດ້ 309 ບ້ານໄດ້ນາມມະຍົດເປັນບ້ານພັດທະນາ; ມີບາງດ້ານທີ່ຍັງເປັນບັນຫາເປັນຕົ້ນເລື່ອງເສັ້ນທາງ ປັດຈຸບັນແມ່ນລະດົມປະຊາຊົນລົງມືເຮັດເອງໃນຫຼາຍບ່ອນໂດຍໂຄງການເອົາຊີເມັນແລກເສັ້ນທາງ ແລະໄດ້ເສັ້ນທາງຄອນກຣີດໃນເທດສະບານ ມີຫຼາຍບ້ານ ຊຶ່ງອັນນີ້ແມ່ນເຮັດໄດ້ດີຫຼາຍ ແລະ ໄດ້ສືບຕໍ່ປະຕິບັດຢ່າງຕໍ່ເນື່ອງ; ອີກອັນໜຶ່ງພາຍຫຼັງທີ່ໄດ້ຈັດຕັ້ງປະຕິວຽກງານດັ່ງກ່າວ ເຫັນວ່າມີບັນຫາກ່ຽວກັບເຂດແດນເຂດເຊື່ອມຕໍ່ ຊຶ່ງເປັນເຂດເຊື່ອມຕໍ່ລະຫວ່າງແຂວງກັບແຂວງ ບໍ່ແມ່ນເຂດເຊື່ອມຕໍ່ລະຫວ່າງປະເທດ ຂໍໃຫ້ຄະນະປະຈໍາສະແຫ່ງຊາດ ກໍຄືລັດຖະບານໄດ້ພິຈາລະນາໃຫ້ຄອບຄົວໃນການຕົກລົງບັນຫາດັ່ງກ່າວ.
ທ່ານ ນາງ ເກສອນ ແສງຍະວົງ ສສຊ ປະຈໍາເຂດເລືອກຕັ້ງທີ 3 ແຂວງຫຼວງນໍ້າທາ ກ່າວວ່າ:ບົນພື້ນຖານແມ່ນເຫັນດີເປັນເອກະພາບຕໍ່ກັບການລາຍງານການຈັດຕັ້ງປະຕິບັດວຽກງານສາມສ້າງ ແຕ່ຍັງບໍ່ທັນໄດ້ຍົກໃຫ້ເຫັນວ່າສ້າງໄດ້ຕົວແບບຂອງແຂວງ ການສ້າງແຂວງເປັນຫົວໜ່ວຍຍຸດທະສາດ ກໍຍັງບໍ່ທັນໄດ້ຈັກແຂວງ; ການສ້າງເມືອງເປັນຫົວໜ່ວຍເຂັ້ມແຂງ ແລະ ການສ້າງບ້ານເປັນຫົວໜ່ວຍພັດທະນາ ກໍບໍ່ທັນມີ ທີ່ຈະໃຫ້ເປັນຕົວແບບພາຍໃນປະເທດ. ມາເບິ່ງໃນທິດທາງແຜນການໃນໄລຍະ 5 ປີ (2016-2030) ຈະສ້າງແຂວງໃຫ້ເປັນຫົວໜ່ວຍຍຸດທະສາດໃຫ້ໄດ້ 6 ແຂວງ; ສ້າງເມືອງເປັນຫົວໜ່ວຍເຂັ້ມແຂງ ໃຫ້ໄດ້ 48ເມືອງ ແລະ ບ້ານເປັນຫົວໜ່ວຍພັດທະນາໃຫ້ໄດ້ 2,800 ບ້ານຖ້າວ່າເຮັດໄດ້ຕາມແຜນດັ່ງກ່າວ ກໍເຫັນດີເປັນເອກະພາບ ແຕ່ວ່າຖ້າສົມທຽບໃສ່ໂຕເລກຜົນງານ ແລະ ການຈັດຕັ້ງປະຕິບັດໃນໄລຍະຜ່ານມາ ສະເໜີຂໍໃຫ້ພິຈາລະນາຄືນໃໝ່ ກ່ຽວກັບຄາດໝາຍໂຕເລກ ອາດຈະສູງເກີນໄປ;ຕໍ່ກັບເນື້ອໃນການຈັດຕັ້ງປະຕິບັດວຽກງານສາມສ້າງໃນໄລຍະຜ່ານມາແຂວງຫຼວງນໍ້າທາ ປະກອບມີ 5 ເມືອງ ສາມາດສ້າງເມືອງເປັນຫົວໜ່່ວຍເຂັ້ມແຂງຮອບດ້ານ ສາມາດສ້າງໄດ້ 2 ເມືອງ ຄື: ເມືອງຫຼວງນໍ້າທາ ແລະ ເມືອງສິງ; ການສ້າງບ້ານເປັນຫົວໜ່ວຍພັດທະນາ ຍັງຫຼາຍບ້ານບໍ່ທັນສາມາດຈັດຕັ້ງປະຕິບັດສໍາເລັດ. ປັດຈຸບັນ ແມ່ນມີກົດໝາຍວ່າດ້ວຍການປົກຄອງທ້ອງຖິ່ນ, ກົດໝາຍສະພາແຫ່ງຊາດ, ກົດໝາຍສະພາປະຊາຊົນ ໃນນັ້ນກົດໝາຍການປົກຄອງທ້ອງຖິ່ນກໍໄດ້ແບ່ງຂັ້ນຄຸ້ມຄອງອອກເປັນ ຂັ້ນສູນກາງ ແລະ ຂັ້ນທ້ອງຖິ່ນ ຊຶ່ງຂັ້ນທ້ອງຖິ່ນປະກອບມີ ແຂວງ, ເມືອງ ແລະ ບ້ານ; ສໍາລັບຂັ້ນບ້ານແມ່ນຍັງບໍ່ທັນໄດ້ກໍານົດຈະແຈ້ງ ຊຶ່ງນາຍບ້ານຍັງບໍ່ທັນແມ່ນພະນັກງານ ຍັງເປັນແບບຕາມການປ່ອນບັດເລືືອກຕັ້ງທີ່ຊາວບ້ານເຫັນດີ ຖ້າວ່າອີງຕາມກົດໝາຍການປົກຄອງທ້ອງຖິ່ນ ນາຍບ້ານຕ້ອງແມ່ນພະນັກງານ ການປະຕິບັດນະໂຍບາຍຕໍ່ນາຍບ້ານກໍຍັງຕໍ່າຫຼາຍແຕ່ລະບ້ານແມ່ນນໍາສະເໜີບັນຫາດັ່ງກ່າວນີ້;ໃຫ້ກໍານົດເປົ້າໝາຍຊັດເຈນວ່າ ນາຍບ້ານຕ້ອງມີມາດຕະຖານເປັນຄືແນວໃດ. ວຽກງານສາມສ້າງແມ່ນຕິດພັນກັບຫຼາຍວຽກ ຊຶ່ງຈະມີ 4 ວຽກ: ວຽກງານສາມສ້າງ, ວຽກງານກໍ່ສ້າງຮາກຖານການເມືອງ,ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ແລະ ວຽກງານຮັກຊາດພັດທະນາ ກົນໄກໃນການຈັດຕັ້ງປະຕິບັດໃນໄລຍະຜ່ານມາ ຂາດກົນໄກໃນການປະສານງານ ຂາດຄວາມເປັນເອກະພາບໃນການຈັດຕັ້ງປະຕິບັດ ເຮັດພໍໃຜພໍມັນ ສະນັ້ນ ໃນຕໍ່ໜ້າສະເໜີໃຫ້ຄົ້ນຄວ້າບັນດາວຽກງານດັ່ງກ່າວວ່າຈະເຮັດແນວໃດ ເພື່ອໃຫ້ມີຄວາມເອກະພາບ ມີຄວາມສະດວກໃນການຈັດຕັ້ງປະຕິບັດ.
ທ່ານ ສີຄໍາ ບຸນມີໄຊ ສສຊ ປະຈໍາເຂດເລືອກຕັ້ງທີ 8 ແຂວງຫົວພັນ ໄດ້ກ່າວວ່າ: ຜ່ານການຮັບຟັງການລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດວຽກງານສາມສ້າງ ເຫັນວ່າມີທ່າກ້າວ ສໍາລັບແຂວງຫົວພັນມີການຂະຫຍາຍບ້ານສາມສ້າງທັງໝົດ 72 ບ້ານ ຜ່ານການປະເມີນຕາມມາດຕະຖານນັ້ນບັນລຸໄດ້ 39 ບ້ານ; ສໍາລັບແຂວງ, ເມືອງ ຜ່ານການປະເມີນແມ່ນຍັງມີຫຼາຍບໍ່ສາມາດບັນລຸໄດ້; ຜ່ານການຕິດຕາມວຽກງານດັ່ງກ່າວ ປັດຈຸບັນລັດຖະບານມີແນວທາງນະໂຍບາຍກ່ຽວກັບວຽກງານສາມສ້າງ ໄດ້ແບ່ງສິດໃນການຄຸ້ມຄອງ ການບໍລິຫານວຽກງານຂອງລັດແມ່ນເຫັນວ່າດີຂຶ້ນ ແຕ່ຄຽງຄູ່ກັນນັ້ນ ຍັງມີອັນຫຍຸ້ງຍາກເຖິງວ່າຈະມີການແບ່ງໜ້າທີ່ກັນລະອຽດແລ້ວກໍຕາມ ແຕ່ຂອດການຈັດຕັ້ງປະຕິບັດຍັງມີຄວາມຫຍຸ້ງຍາກ ເປັນຕົ້ນ: ການແບ່ງທຶນໃນການພັດທະນາຍັງມີລັກສະນະຈ່ອງໄວ້; ການແບ່ງລາຍຮັບໃຫ້ບ້ານກໍຍັງມີຈໍາກັດ; ການມອບສິດໃຫ້ທ້ອງຖິ່ນກໍຍັງບໍ່ທັນເຕັມສ່ວນເທົ່າທີ່ຄວນ ວຽກງານສາມສ້າງແມ່ນວຽກງານມອບສິດໃຫ້ອໍານາດການປົກຄອງແຕ່ລະຂັ້ນ ໃນການຄຸ້ມຄອງການມອບສິດໃຫ້ແບບຂາດຕົວ ໃນຂັ້ນບ້ານ ຂັ້ນເມືອງ ເພື່ອເຮັດໃຫ້ວຽກການພັດທະນາມີທ່າກ້າວຍິ່ງໆຂຶ້ນ.
(ຂ່າວ: ຍຸພິນທອງ)
ຄໍາເຫັນ