ໃນວັນທີ1ທັນວານີ້ ຢູ່ທີ່ຫ້ອງວ່າການແຂວງຊຽງຂວາງ, ໄດ້ມີບັນດາບໍລິສັດຂອງຈີນ ນຳໂດຍທ່ານ ຫຼີວ ຫວີ ຫວູ(Liu Weiwu) ປະທານບໍລິສັດເວຍຕະເອເລັກໂທຣນິກຈຳກັດ ພ້ອມດ້ວຍບັນດາບໍລິສັດອື່ນໆ ໄດ້ເຂົ້າອວຍພອນການນຳແຂວງຊຽງຂວາງ ເນື່ອງໃນວັນຊາດທີ2ທັນວາ ຄົບຮອບ50ປີ(2ທັນວາ1975-2ທັນວາ2025) ແລະວັນເກີດປະທານ ໄກສອນ ພົມວິຫານ ຄົບຮອບ105ປີ(13ທັນວາ1920-13ທັນວາ2025),ຊຶ່ງທ່ານໄດ້ກ່າວສະແດງ ຄວາມຂອບໃຈມາຍັງການນຳ ກໍຄືປະຊາຊົນບັນດາເຜົ່າຊາວຊຽງຂວາງ ທີ່ໄດ້ເບິ່ງແຍງ ດູແລ ຮ່ວມມື ແລະ ໃຫ້ຄຳແນະນຳນັກທຸລະກິດ ຊາວຄ້າຂາຍ ທີ່ເປັນຄົນຈີນ ມາດຳລົງຊີວິດຢູ່ແຂວງຊຽງຂວາງ ອວນພອນໃຫ້ການນຳ ແລະ ປະຊາຊົນບັນດາເຜົ່າ ຊາວຊຽງຂວາງ ຈົ່ງມີແຕ່ຄວາມຜາສຸກ ມີພາລາໄມສົມບູນ ປະສົບຜົນສຳເລັດໃນການພັດທະນາ ເສດຖະກິດ-ສັງຄົມຂອງຄອບຄົວ ກໍຄືຂອງແຂວງ ມີຄວາມຈະເລີນກ້າວໜ້າຍິ່ງໆຂຶ້ນ.
ໂອກາດນີ້, ທ່ານ ບຸນຈັນ ສີວົງພັນ ກຳມະການສູນກາງພັກ ເລຂາພັກແຂວງ ໄດ້ກ່າວສະແດງຄວາມຂອບໃຈຕໍ່ຄຳອວຍພອນ, ຂອບໃຈຕໍ່ການ ປະກອບສ່ວນພັດທະນາ ຊ່ວຍເຫຼືອແຂວງຊຽງຂວາງຕະຫຼອດມາ, ຊຸກຍູ້ ສົ່ງເສີມ ເປັນຂົວຕໍ່ ໃນການພົວພັນ ຮ່ວມມື ກັບບັນດາແຂວງຂອງ ສປ ຈີນ ອວຍພອນໃຫ້ການພົວພັນ ຮ່ວມມື ຄູ່ຮ່ວມຊາຕາກຳ ລາວ-ຈີນ ຈີນ-ລາວ ຈົ່ງໝັ້ນຄົງທະນົງແກ່ນຂຶ້ນເລື້ອຍໆ.
(ຂ່າວ: ບຸນມີ ແສງທຸມມີ)
ຄໍາເຫັນ