ຫົວເຫວີຍ ຮ່ວມກັບ ຊາຍນ່າ ໂມບາຍ ຢຸນນານ ສປ ຈີນພັດທະນາລະບົບອິນເຕີເນັດ 5G+ ແລະ ສາຍສົ່ງ ເພື່ອອໍານວຍຄວາມສະດວກ ໃຫ້ແກ່ປະຊາຊົນ ບ້ານຊິນຈາຍແລະ ນຳໃຊ້ລະບົບດັ່ງກ່າວເຂົ້າໃນການເຮັດກິດຈະກຳຕ່າງໆຂອງບ້ານໄດ້ຢ່າງສະດວກ ແລະ ວ່ອງໄວ.
ບ້ານ ຊິນຈາຍ ຕັ້ງຢູ່ເທິງເນີນພູເຂົາເກົາລິກົງເມືອງເປົາຊານມົນທົນຢຸນນານ ສປ ຈີນ,ສູງຈາກລະດັບນ້ຳທະເລປະມານ 1.000 ແມັດ, ໃນການຕິດຕໍ່ສື່ສານແລະ ນຳໃຊ້ລະບົບອິນເຕີເນັດ ທີ່ມີຄວາມໄວເພື່ອເຮັດກິດຈະກໍາຕ່າງໆ ຂອງບ້ານເປັນຕົ້ນ, ການຖ່າຍທອດສົດກະສິກໍາກາເຟ, ການໂພດວິດີໂອສັ້ນ ແລະ ອື່ນໆເພື່ອໂຄສະນາສິນຄ້າ ແລະ ສ້າງຖານລູກຄ້າ ໃຫ້ກວ້າງອອກໃນຂອບເຂດທົ່ວປະເທດຊຶ່ງບ້ານດັ່ງກ່າວ,ເປັນແຫຼ່ງກຳເນີດຂອງກາເຟເມັດນ້ອຍເປົາຊານແລະ ໄດ້ຮັບການຍ້ອງຍໍໃຫ້ເປັນ “ໜຶ່ງບ້ານ, ໜຶ່ງຜະລິດຕະພັນ” ຈາກກະຊວງກະສິກຳຂອງຈີນ, ພາຍຫຼັງໄດ້ຮັບການຊ່ວຍເຫຼືອດ້ານການຕິດຕໍ່ສື່ສານຈາກບໍລິສັດຫົວເຫວີຍ ຈຳກັດ ແລະ ຊາຍນ່າ ໂມບາຍ ຢຸນນານໄດ້ ເຮັດໃຫ້ເຂດປູກກາເຟຂອງໝູ່ບ້ານມີເນື້ອທີ່ 906 ເຮັກຕາ, ກວມເອົາ 95% ຂອງເນື້ອທີ່ປູກຝັງທັງໝົດ, ສຳລັບຜົນຜະລິດປະຈໍາປີໄດ້ 4.000 ກວ່າໂຕນ, ມູນຄ່າ 120 ລ້ານຢວນ ແລະ ສາມາດສ້າງລາຍຮັບຫຼາຍກວ່າ 70 ລ້ານຢວນ(ສະກຸນເງິນຈີນ)
ທ່ານຫວັງເຈ່ຍເຫວີຍຄະນະບ້ານຊິນຈ່າຍລາຍງານໃຫ້ຮູ້ໃນວັນທີ 20 ຜ່ານມາ ວ່າ: ພາຍໃນບ້ານນອກຈາກໄດ້ ພັດທະນາລະບົບອິນຕະເນັດ 5G+ ແລະ ສາຍສົ່ງ ອຳນວຍຄວາມສະດວກໃຫ້ແກ່ປະຊາຊົນແລ້ວ ຍັງໄດ້ສ້າງນິຄົມກາເຟພິເສດ 4 ແຫ່ງ, ວິສາຫະກິດກາເຟ 10 ແຫ່ງ ຊຶ່ງສາມາດດຶງດູດນັກທ່ອງທ່ຽວຫຼາຍກວ່າ 100.000 ຄົນຕໍ່ປີ,ບ້ານໄດ້ຮັບການຈັດອັນດັບເປັນສະຖານທີ່ທ່ອງທ່ຽວ 3A ແລະ ບ້ານທ່ອງທ່ຽວທີ່ມີຊື່ສຽງປະຈຳມົນທົນຢຸນນານ ແລະ ກາຍເປັນສະຖານທີ່ທ່ອງທ່ຽວ ທີ່ມີຄວາມນິຍົມດ້ານວັດທະນະທຳ ແລະ ການທ່ອງທ່ຽວດ້ານສຸຂະພາບ.ເຕັກໂນໂລຊີ 5G+ ໄດ້ຊຸກຍູ້ອຸດສາຫະກໍາກາເຟ ຂອງເມືອງເປົາຊານ ຊຶ່ງ ຊາຍນ່າ ໂມບາຍ ຢຸນນານສາຂາປາວຊານໄດ້ຕິດຕັ້ງ ແລະ ເພີ່ມປະສິດຕິພາບເຄືອຂ່າຍເພື່ອເຮັດໃຫ້ການບໍລິການດີຂຶ້ນນັບຕັ້ງແຕ່ການກໍ່ສ້າງເຄືອຂ່າຍໄຮ້ສາຍ (Wi-Fi) ເລີ່ມຂຶ້ນໃນປີ 2013, ສາຂາເມືອງເປົາຊານໄດ້ລົງທຶນປະມານ 22 ລ້ານຢວນໃນການກໍ່ສ້າງສະຖານນີແລະ ສ້າງສະຖານີຂະໜາດໃຫຍ່ 55 ສະຖານີ ໃນເຂດພູເຂົາເກົາລິກົງ. ຫຼັງຈາກການກໍ່ສ້າງພື້ນຖານໂຄງລ່າງ 5G ໄດ້ເລີ່ມຕົ້ນໃນປີ 2021, ສາຂາເປົາຊານໄດ້ເຮັດວຽກຢ່າງຈິງຈັງເພື່ອນໍາໃຊ້ເຄືອຂ່າຍ 5G ໃນເຂດເຂົາເກົາລິກົງ ເພື່ອຕອບສະໜອງຄວາມຕ້ອງການພັດທະນາພື້ນຖານໂຄງລ່າງໃໝ່ ຊຶ່ງບໍລິສັດໄດ້ວາງແຜນທີ່ຈະກວມເອົາ 98% ຂອງພື້ນທີ່ ທີ່ມີ 30 ຄົວເຮືອນ ຫຼື ຫຼາຍກວ່ານັ້ນໃນທ້າຍປີ 2023.
ບ້ານຊິນຈ່າຍໄດ້ສ້າງຮູບແບບການພັດທະນາກາເຟ ທີ່ມີຄຸນນະພາບສູງແບບເຊື່ອມໂຍງເຂົ້າກັນໃນທົ່ວລະບົບຕ່ອງໂສ້ມູນຄ່າອຸດສາຫະກຳ, ນັບແຕ່ການເລືອກເຟັ້ນ ແລະ ການເຕີບໂຕຈົນເຖິງການຂຸດຄົ້ນ ແລະ ປຸງແຕ່ງ, ໄດ້ຊຸກຍູ້ຂະແໜງການກາເຟຂອງຕົນດີຂຶ້ນ. ນອກຈາກນີ້, ຍັງໄດ້ຄວບຄຸມຄຸນນະພາບຢ່າງເຂັ້ມງວດ ເຮັດໃຫ້ເມັດກາເຟໄດ້ຮັບການຍອມຮັບຈາກຕະຫຼາດລາຄາຂອງເມັດກາເຟສີຂຽວໄດ້ເພີ່ມຂຶ້ນຈາກ 15 ຢວນຕໍ່ກິໂລເປັນ 60 ຢວນຕໍ່ກິໂລ ແລະ ກາຍເປັນອຸດສາຫະກຳກາເຟເມັດນ້ອຍເປົາຊານເຮັດໜ້າທີ່ເປັນເສົາຫຼັກໃນການຟື້ນຟູຊົນນະບົດ. ພ້ອມນີ້, ອຳນາດການປົກຄອງພາຍໃນບ້ານ ກໍໄດ້ຊຸກຍູ້ໃຫ້ປະຊາຊົນລົງທຶນໃນທີ່ດິນແລະ ຫັນບ່ອນຢູ່ອາໄສ ສາທາລະນະ ແລະ ທີ່ຢູ່ອາໄສຊົນນະບົດຂອງທ້ອງຖິ່ນ ໃຫ້ກາຍເປັນສູນວັດທະນະທຳກາເຟເປັນຕົ້ນ, ການປຸງແຕ່ງກາເຟ, ການສະແດງວັດທະນະທໍາກາເຟ, ການທ່ອງທ່ຽວທີ່ກ່ຽວຂ້ອງກັບກາເຟແລະ ການຂາຍຜະລິດຕະພັນກາເຟ, ຈັດງານເທດສະການທ່ອງທ່ຽວ ວັດທະນະທຳກາເຟ ແລະ ການແຂ່ງຂັນຜະລິດກາເຟ, ທັງເປັນເວທີປາໄສຂອງຊ່ຽວຊານກາເຟສາກົນ ເພື່ອຊຸກຍູ້ການທ່ອງທ່ຽວທ້ອງຖິ່ນຕື່ມອີກ.
(ຂ່າວ-ພາບ:ສຳນານ)
ຄໍາເຫັນ