 |
ງານມະຫາກຳກິລາແຫ່ງຊາດຄັ້ງທີ 12 ຈະໄດ້ຈັດຂຶ້ນຢ່າງເປັນທາງການໃນລະຫວ່າງ ວັນທີ 15-25 ພະຈິກ 2025 ທີ່ນະຄອນຫຼວງວຽງຈັນເປັນເຈົ້າພາບ, ຊຶ່ງຈະມີການແຂ່ງຂັນ 33 ປະເພດກິລາ ແລະ 2 ປະເພດກິລາສາທິດແຂ່ງຂັນທັງໝົດ 435 ລາຍການ. ສຳລັບແຂວງບໍລິຄຳໄຊ ຄາດວ່າຈະສົ່ງກິລາເຂົ້າຮ່ວມແຂ່ງຂັນທັງໝົດ 16 ປະເພດກິລາຄື: ກິລາແລ່ນ-ລານ, ບານເຕະ, ໝາກເສິກ, ເປຕັງ, ກະຕໍ້, ໜ້າເກັກ, ເທຄວັນໂດ, ລັກບີ້, ຊ່ວງເຮືອ, ມວຍລາວ, ມວຍສາກົນ, ມວຍວູຊູ, ດຶງເຊືອກ, ດອກປີກໄກ່, ບານສົ່ງຊາຍຫາດ ແລະ ກິລາໝາກຂ່າງ ລວມທັງໝົດທີ່ແຂວງສົ່ງເຂົ້າແຂ່ງຂັນ 203 ລາຍການ ແລະ ຈະມີຜູ້ເຂົ້າຮ່ວມ435 ຄົນ. ທຽບໃສ່ຄັ້ງທີ 11 ຜ່ານມາ ມີ 25 ປະເພດກິລາແຂວງສົ່ງເຂົ້າແຂ່ງຂັນ 10 ປະເພດ ມີຈຳນວນຄົນ 234 ຄົນ. ຜົນການແຂ່ງຂັນຍາດໄດ້ 6 ຫຼຽນຄຳ, 2 ຫຼຽນເງິນ ແລະ 12 ຫຼຽນທອງ ລວມ 20 ຫຼຽນຈັດຢູ່ອັນດັບ 13 ໃນຈຳນວນ 20 ພາກສ່ວນ.
ສຳລັບໃນຄັ້ງນີ້, ແຂວງບໍລິຄໍາໄຊຄາດຄະເນໃຫ້ໄດ້ 11 ຫຼຽນຄຳ, 16 ຫຼຽນເງິນ ແລະ 12ຫຼຽນທອງ. ສ່ວນງານມະຫາກຳກິລາຄົນພິການແຫ່ງຊາດຄັ້ງທີ 4 ຈະແຂ່ງຂັນກັນໃນລະຫວ່າງວັນທີ 13-19 ທັນວາ2025 ແຂ່ງຂັນທັງໝົດ 10 ປະເພດກິລາ. ແຂວງບໍລິຄຳໄຊ ສົ່ງເຂົ້າ 4 ປະເພດຄື: ກິລາແລ່ນ-ລານ, ກິລາໂກນບານ, ກິລາລອຍນ້ຳ ແລະ ກິລາຍົກນ້ຳໜັກ, ຄາດຄະເນມີຜູ້ເຂົ້າຮ່ວມ 90 ຄົນ. ຄັ້ງທີ 3 ຜ່ານມາສາມາດຍາດໄດ້ 6 ຫຼຽນຄຳ 2 ຫຼຽນເງິນ 1 ຫຼຽນທອງ ລວມ 9 ຫຼຽນ, ຈັດຢູ່ໃນອັນດັບ 8 ຈາກ 18 ພາກສ່ວນເຂົ້າຮ່ວມແຂ່ງຂັນ ແລະ ຄາດຄະເນໃນຄັ້ງນີ້, ແມ່ນໃຫ້ໄດ້ຄືຄັ້ງທີ 3 ຜ່ານມາ. ພ້ອມນີ້ຜູ້ແທນກອງປະຊຸມຍັງໄດ້ປຶກສາຫາລືໃນດ້ານຕ່າງໆ ເປັນຕົ້ນ: ແມ່ນທາງດ້ານງົບປະມານ, ການຄັດເລືອກເອົານັກກິລາແຕ່ລະປະເພດ ພ້ອມຄູຝຶກເພື່ອເຂົ້າສູນຝຶກຊ້ອມທົດສອບ ແລະ ດ້ານອຶ່ນໆ ທັງນີ້ ກໍເພື່ອໃຫ້ນັກກິລາມີຄວາມພ້ອມຮັບປະກັນເຂົ້າຮ່ວມໃຫ້ໄດ້ຕາມແຜນການ ແລະ ຍາດໄດ້ຫຼຽນຕາມເປົ້າໝາຍທີ່ວາງໄວ້.
(ຂ່າວ-ພາບ: ຄຳຟອງ)
ຄໍາເຫັນ