 |
ກິດຈະກຳ “ເດືອນຄວາມປອດໄພໃນການຜະລິດ” ປະຈໍາປີນີ້, ບໍລິສັດ ອາຊີໂປຕາສ ສາຂາ ສປປ ລາວ ຈະຈັດຕັ້ງກິດຈະກຳພິເສດຫຼາຍລາຍການ ເຊັ່ນ: ການກວດກາຄົ້ນຫາຈຸດສ່ຽງດ້ານຄວາມປອດໄພແບບຄອບຄຸມທຸກດ້ານ, ການຝຶກອົບຮົມຮັບມືສຸກເສີນແບບສະຖານະການຈິງ ແລະ ການແຂ່ງຂັນຄວາມຮູ້-ທັກສະດ້ານຄວາມປອດໄພ. ຜ່ານກິດຈະກຳດັ່ງກ່າວ ຈະຊ່ວຍເສີມສ້າງ ແລະ ກຳນົດຄວາມຮັບຜິດຊອບດ້ານການບໍລິຫານຄວາມປອດໄພໃຫ້ຊັດເຈນໃນທຸກລະດັບ ພ້ອມທັງຜັນຂະຫຍາຍມາດຕະການປ້ອງກັນ ແລະ ຄວບຄຸມຄວາມສ່ຽງໃຫ້ມີປະສິດທິຜົນ.
ໃນພິທີເປີດງານ ໄດ້ມີການສາຍວີດີໂອການສຶກສາເຕືອນໄພດ້ານຄວາມປອດໄພໃນການຜະລິດ ໂດຍນຳເອົາກໍລະນີອຸບັດເຫດຈິງມາເປັນບົດຮຽນ ເພື່ອກະຕຸ້ນໃຫ້ພະນັກງານ ແລະ ຄະນະບໍລິຫານທຸກຄົນຄໍານຶງເຖິງຫຼັກການວ່າ “ຄວາມສ່ຽງແຝງຄືອຸບັດເຫດທີ່ອາດເກີດຂຶ້ນໄດ້” ແລະ ເສີມສ້າງຈິດສຳນຶກໃນການປ້ອງກັນຄວາມສ່ຽງ. ນອກຈາກນັ້ນ, ຕາງໜ້າຈາກບໍລິສັດ ແລະ ບັນດາໜ່ວຍງານກໍ່ສ້າງໄດ້ຂຶ້ນກ່າວຖະແຫຼງຈຸດຢືນຕາມລຳດັບ ໂດຍໃຫ້ຄຳໝັ້ນສັນຍາວ່າ ຈະປະຕິບັດຕາມແຜນງານ ແລະ ຂໍ້ກຳນົດດ້ານຄວາມປອດໄພຂອງບໍລິສັດຢ່າງເຄັ່ງຄັດ, ທຸ່ມເທປົກປ້ອງຊີວິດ ແລະ ສຸຂະພາບຂອງພະນັກງານ ພ້ອມທັງສົ່ງເສີມໃຫ້ວິສາຫະກິດພັດທະນາຢ່າງໝັ້ນຄົງ ແລະ ຍືນຍົງ.
 |
ທ່ານ ຢູ ກົວເຫວິນ ໄດ້ສະເໜີ 4 ຂໍ້ກຳນົດທີ່ຊັດເຈນຕໍ່ວຽກງານຄວາມປອດໄພໃນການຜະລິດຂອງບໍລິສັດ ດັ່ງນີ້:
1. ຢຶດໝັ້ນໃນເຈດຈຳນົງເດີມດ້ານຄວາມປອດໄພ, ສ້າງດ່ານປ້ອງກັນທາງດ້ານແນວຄິດໃຫ້ແຂງແກ່ນ, ຕມີສະຕິລະວັງຕົວຢູ່ສະເໝີ ແລະ ຈັດຕັ້ງປະຕິບັດຢ່າງຕໍ່ເນື່ອງບໍ່ລະເລີຍ.
2. ກຳນົດ ແລະ ເພີ່ມທະວີຄວາມຮັບຜິດຊອບຂອງພະນັກງານໃນແຕ່ລະຕຳແໜ່ງໃຫ້ຊັດເຈນ, ສ້າງເຄືອຂ່າຍການຄວບຄຸມ ແລະ ບໍລິຫານຄວາມປອດໄພໃຫ້ຮັດກຸມ ແລະ ຄອບຄຸມທຸກດ້ານ.
3. ຜັນຂະຫຍາຍການກວດກາ ແລະ ແກ້ໄຂຄວາມສ່ຽງແຝງຢ່າງເລິກເຊິ່ງ ແລະ ຕໍ່ເນື່ອງ, ອຸດຊ່ອງວ່າງດ້ານຄວາມປອດໄພຈາກຕົ້ນຕໍ, ປ້ອງກັນ ແລະ ຫຼຸດຜ່ອນຄວາມສ່ຽງທຸກປະເພດ.
4. ເສີມສ້າງການພັດທະນາທີມງານຮັບມືສຸກເສີນ ແລະ ການຝຶກອົບຮົມທັກສະຢ່າງເຂັ້ມງວດ, ຍົກລະດັບຄວາມສາມາດໃນການຮັບມື ແລະ ແກ້ໄຂສະຖານະການສຸກເສີນຢ່າງຮອບດ້ານ, ເພື່ອສ້າງແນວປ້ອງກັນຄວາມປອດໄພໃນການຜະລິດໃຫ້ໝັ້ນຄົງ.
ບໍລິສັດອາຊີໂປຕາສ ສາກົນ ຈະຖືເອົາກິດຈະກຳເດືອນຄວາມປອດໄພໃນການຜະລິດຄັ້ງນີ້ເປັນໂອກາດ, ສືບຕໍ່ຈັດກິດຈະກຳປະຊາສຳພັນ ແລະ ອົບຮົມດ້ານຄວາມປອດໄພ ລວມເຖິງການຝຶກຊ້ອມຮັບມືເຫດສຸກເສີນແບບພາກປະຕິບັດ ທີ່ມີຮູບແບບໃໝ່ ແລະເຂັ້ມງວດ. ຜ່ານການວາງແຜນຢ່າງເປັນລະບົບ ແລະ ການດຳເນີນຢ່າງຕໍ່ເນື່ອງ, ຈະນຳເອົາຜົນສຳເລັດຂອງກິດຈະກຳເດືອນຄວາມປອດໄພໃນການຜະລິດ ມາພັດທະນາໃຫ້ເປັນກົນໄກການບໍລິຫານຄວາມປອດໄພໃນໄລຍະຍາວ, ສ້າງຮາກຖານຄວາມປອດໄພທີ່ໝັ້ນຄົງ ເພື່ອຮັບປະກັນ ແລະ ສົ່ງເສີມການພັດທະນາຂອງວິສາຫະກິດໃຫ້ເຕີບໂຕຢ່າງມີຄຸນນະພາບ, ໝັ້ນຄົງ ແລະ ຍືນຍົງ.
ຂ່າວ: ມະນີວັນ
ຄໍາເຫັນ