JIPDEC ເປີດເຜີຍວ່າ: ການສຳຫຼວດໃນເດືອນມັງກອນຜ່ານມາ ຊຶ່ງມີບໍລິສັດທີ່ຕອບແບບສອບຖາມ 1,107 ແຫ່ງ ພົບວ່າມີບໍລິສັດ 507 ແຫ່ງ ທີ່ລາຍງານວ່າຖືກໂຈມຕີໂດຍ ransomware ຊຶ່ງແຮກເກີໃຊ້ເພື່ອບລັອກການເຂົ້າເຖິງຂໍ້ມູນ ແລະ ຮຽກຮ້ອງຄ່າໄຖ່ເພື່ອແລກປ່ຽນກັບການກູ້ຂໍ້ມູນຄືນ.
ບົດລາຍງານຊີ້ໃຫ້ເຫັນວ່າ: ໃນບັນດາບໍລິສັດທີ່ຈ່າຍຄ່າໄຖ່, ມີພຽງແຕ່ 83 ບໍລິສັດເທົ່ານັ້ນທີ່ສາມາດກູ້ຄືນລະບົບ ແລະ ຂໍ້ມູນຂອງເຂົາເຈົ້າໄດ້, ໃນຂະນະທີ່ 139 ບໍລິສັດບໍ່ສາມາດກູ້ຄືນໄດ້. ໃນທາງກັບກັນ, ມີ 141 ບໍລິສັດລາຍງານວ່າເຖິງວ່າຈະຖືກໂຈມຕີໂດຍ ransomware, ແຕ່ພວກເຂົາສາມາດກູ້ຄືນລະບົບ ແລະ ຂໍ້ມູນກັບມາໄດ້ ໂດຍບໍ່ຕ້ອງໄດ້ຈ່າຍຄ່າໄຖ່.
ຜູ້ຊ່ຽວຊານແນະນຳວ່າບໍ່ໃຫ້ຈ່າຍຄ່າໄຖ່, ເພາະວ່າມັນຈະເປັນການສະໜັບສະໜູນທຶນໃຫ້ແກ່ອົງການອາຊະຍາກຳ.ໂດຍ JIPDEC ໄດ້ເນັ້ນໜັກວ່າ: ຜົນການສຳຫຼວດຄັ້ງນີ້ຢືນຢັນຄວາມເປັນຈິງທີ່ວ່າ "ການຈ່າຍຄ່າໄຖ່ບໍ່ໄດ້ຮັບປະກັນວ່າຂໍ້ມູນຈະຖືກສົ່ງຄືນສະເໝີໄປ".
ກ່ຽວກັບການສູນເສຍທາງດ້ານການເງິນ, ບົດລາຍງານເປີດເຜີຍວ່າ: ປະມານເຄິ່ງໜຶ່ງຂອງບໍລິສັດທີ່ຕອບແບບສອບຖາມທີ່ເຄີຍປະສົບກັບເຫດການດັ່ງກ່າວລະບຸວ່າ, ໄດ້ຮັບຄວາມເສຍຫາຍ ຊຶ່ງລວມທັງຄ່າໄຖ່ ແລະ ຄ່າໃຊ້ຈ່າຍໃນການກູ້ຄືນລະບົບ ຕັ້ງແຕ່ 1 ລ້ານເຢນ (6,300 ໂດລາ) ຫາ ເກືອບ 50 ລ້ານເຢນ. ໃນຂະນະທີ່ 16% ລາຍງານຄວາມເສຍຫາຍໜ້ອຍທີ່ສຸດ ແລະ 4.3% ໄດ້ຮັບຄວາມເສຍຫາຍສູງເຖິງ 1 ຕື້ເຢນ ຫຼື ຫຼາຍກວ່ານັ້ນ.
ນອກຈາກນັ້ນ, ການສຳຫຼວດຍັງສະແດງໃຫ້ເຫັນວ່າ: ເວລາໃນການກູ້ຄືນລະບົບສ່ວນໃຫຍ່ໃຊ້ເວລາຕັ້ງແຕ່ 1 ອາທິດ ຫາ 1 ເດືອນ, ອີງຕາມບົດລາຍງານຈາກ 176 ບໍລິສັດທີ່ໄດ້ຮັບຜົນກະທົບ. ຢ່າງໃດກໍຕາມ, ບາງບໍລິສັດລາຍງານວ່າພວກເຂົາຍັງບໍ່ສາມາດກູ້ຄືນຂໍ້ມູນໄດ້ເຖິງແມ່ນວ່າຈະຜ່ານໄປຫຼາຍກວ່າ 3 ເດືອນແລ້ວກໍຕາມ.
ທ່ານ ຢູກິມິ ໂຊຕະ ຈາກບໍລິສັດ Proofpoint ຊຶ່ງເປັນບໍລິສັດຄວາມປອດໄພທາງໄຊເບີທີ່ຕັ້ງຢູ່ໃນສະຫະລັດ ອາເມຣິກາ ສາຂາຍີ່ປຸ່ນ, ແນະນຳໃຫ້ອັບເດດຊັອຟແວຄວາມປອດໄພເປັນປະຈຳ, ໂດຍກ່າວວ່າ: ການສຳຮອງຂໍ້ມູນເປັນປະຈຳແມ່ນມີຄວາມສຳຄັນຫຼາຍເພື່ອຫຼຸດຜ່ອນຄວາມເສຍຫາຍໃຫ້ເຫຼືອໜ້ອຍທີ່ສຸດ.
ຄໍາເຫັນ