ບຸນກຸດຈີນ ຫຼື ປີໃໝ່ຂອງຈີນ ເປັນຊ່ວງວັນພັກທີ່ຍາວທີ່ສຸດ ເພື່ອສົ່ງເສີມການເດີນທາງ ແລະ ກະຕຸ້ນການບໍລິໂພກພາຍໃນປະເທດຈີນ

 ໄດ້ເຫັນການເຄື່ອນໄຫວຂອງປະຊາກອນຢ່າງໜາແໜ້ນແລະ ຄຽງຄູ່ກັບການເຕີບໂຕຂອງການບໍລິໂພກຢ່າງແຂງແຮງ ເຊັ່ນວ່າ, ການທ່ອງທ່ຽວ, ລາຍຮັບຈາກຫ້ອງສາຍຮູບເງົາ (box office) ແລະ ພາກສ່ວນການຄ້າຫຍ່ອຍຕ່າງໆ.
ໂດຍຮູບກຣາຟຟິກທີ່ສະແດງໃຫ້ເຫັນໄດ້ຢ່າງສັດເຈນ ແລະ ຄົບຖ້ວນຂອງການເພີ່ມຂຶ້ນໃນຊ່ວງວັນພັກ ໂດຍໄດ້ເນັ້ນໃຫ້ເຫັນສະຖິຕິສູງສຸດເປັນປະຫວັດສາດໃໝ່ຂອງການເດີນທາງພາຍໃນປະເທດ, ການເຕີບໂຕຂອງການເດີນທາງຂ້າມຊາຍແດນ ແລະ ລາຍຮັບຈາກຫ້ອງສາຍຮູບເງົາທີ່ເພີ່ມສູງຢ່າງໂດດເດັ່ນ.
ອີງຕາມຂໍ້ມູນຈາກ ກຸ່ມບໍລິສັດລົດໄຟແຫ່ງຊາດຈີນ, ໃນຊ່ວງວັນພັກບຸນກຸດຈີນ (15–23 ກຸມພາ) ລະບົບລົດໄຟໄດ້ໃຫ້ບໍລິການຜູ້ໂດຍສານປະມານ 121 ລ້ານເທື່ອຄົນ, ສະເລ່ຍ 13,41 ລ້ານເທື່ອຄົນຕໍ່ວັນ, ເພີ່ມຂຶ້ນ 11,5 ເປີເຊັນ ເມື່ອທຽບກັບປີກ່ອນ. ໂດຍສະເພາະ, ວັນທີ 23 ກຸມພາ ມີຜູ້ໂດຍສານສູງສຸດເຖິງ 18,73 ລ້ານເທື່ອຄົນ, ສ້າງສະຖິຕິໃໝ່ສໍາລັບການເດີນທາງຕໍ່ມື້ໃນຊ່ວງດັ່ງກ່າວ. ເພື່ອຮອງຮັບປະລິມານຜູ້ໂດຍສານທີ່ສູງ ຊຶ່ງປະກອບມີການເດີນທາງກັບບ້ານ, ການກັບຄືນຂອງແຮງງານຈາກຖິ່ນອື່ນ ແລະ ການທ່ອງທ່ຽວ, ລົດໄຟໄດ້ດໍາເນີນຂົນສົ່ງຂະບວນລົດໄຟຜູ້ໂດຍສານສະເລ່ຍ 12.380 ຂະບວນຕໍ່ວັນ. ພ້ອມນີ້, ຍັງໄດ້ປັບປຸງບໍລິການ ເຊັ່ນວ່າ, ການປັບປຸງກົນລະຍຸດຂອງການຂາຍປີ້, ການຫຼຸດລາຄາຄ່າໂດຍສານ ແລະ ການເພີ່ມຂະບວນລົດໄຟພິເສດສໍາລັບແຮງງານຈາກແຂວງໜຶ່ງສູ່ແຂວງໜຶ່ງ.
ໃນດ້ານການຂົນສົ່ງສິນຄ້າ, ລະບົບລົດໄຟແຫ່ງຊາດໄດ້ຂົນສົ່ງສິນຄ້າທັງໝົດ 85,38 ລ້ານໂຕນໃນຊ່ວງວັນພັກ. ຊ່ອງທາງໂລຈິສຕິກສາກົນສໍາຄັນ ເຊັ່ນ ຂະບວນລົດໄຟຈີນ ເອີຣົບ ແລະ ຊ່ອງທາງການຄ້າບົກ ທະເລສາກົນໃໝ່ ຍັງໄດ້ປະຕິບັດງານຢ່າງມັ່ນຄົງ, ຮັບປະກັນການຂົນສົ່ງສິນຄ້າຈໍາເປັນ ແລະ ການໄຫຼວຽນຂອງຫ່ວງໂຊ່ຕອບສະໜອງຂອງສາກົນຢ່າງຄຶກຄື້ນ.
ສ່ວນທາງດ້ານການບໍລິໂພກໃນຊ່ວງວັນພັກ ອີງຕາມຂໍ້ມູນຈາກ ກະຊວງການຄ້າຂອງຈີນ, ໃນ 4 ວັນທໍາອິດຂອງຊ່ວງວັນພັກ, ຍອດຂາຍສະເລ່ຍຕໍ່ວັນຂອງວິສາຫະກິດຄ້າປີກ ແລະ ຮ້ານອາຫານທົ່ວປະເທດ ເພີ່ມຂຶ້ນ 8,6% ເມື່ອທຽບກັບໃສ່ໄລຍະດຽວກັນຂອງປີກ່ອນ, ໂດຍມີການຈັດກິດຈະກໍາສົ່ງເສີມການຂາຍຢ່າງຕໍ່ເນື່ອງ ເພື່ອກະຕຸ້ນການຕະຫຼາດພາຍໃນ.
ນະໂຍບາຍສົ່ງເສີມການແລກປ່ຽນສິນຄ້າບໍລິໂພກ (trade-in) ໄດ້ສະແດງຜົນຢ່າງຊັດເຈນ. ດັ່ງຂໍ້ມູນຊີ້ໃຫ້ເຫັນວ່າ ຮອດວັນທີ 19 ກຸມພາ, ໂຄງການ trade-in ທົ່ວປະເທດ ໄດ້ຊ່ວຍເຫຼືອປະຊາຊົນ 28,88 ລ້ານເທື່ອຄົນ ແລະ ກະຕຸ້ນຍອດຂາຍລວມມູນຄ່າ 198,02 ຕື້ຢວນ (ປະມານ 27,5 ຕື້ໂດລາສະຫະລັດ). ໃນນັ້ນ, ໂຄງການແລກປ່ຽນລົດຍົນເພິ່ມຂຶ້ນເຖິງ 612.000 ຄັນ, ເຮັດໃຫ້ຍອດຂາຍລົດໃໝ່ມູນຄ່າ 100,53 ຕື້ຢວນ (ປະມານ 13,96 ຕື້ໂດລາ), ໂດຍສະເພາະລົດທີ່ນຳໃຊ້ພະລັງງານສະອາດ ຫຼື ສິນຄ້າສີຂຽວ ແລະ ສິນຄ້າອັດສະລິຍະ ເປັນທີ່ນິຍົມເປັນພິເສດ.
ພ້ອມນັ້ນ, ທາງດ້ານການບໍລິການກໍ່ມີຄວາມຄຶກຄື້ນ. ເຊິ່ງຂໍ້ມູນຈາກ ອົງການບໍລິຫານຮູບເງົາຈີນ ລະບຸວ່າ ລາຍຮັບຈາກຫ້ອງສາຍຮູບເງົາໃນຊ່ວງວັນພັກບັນລຸເຖິງ 5,75 ຕື້ຢວນ (ປະມານ 828,65 ລ້ານໂດລາ), ໃນຂະນະທີ່ຈໍານວນຜູ້ເຂົ້າຊົມທັງໝົດໂດຍສະເລ່ຍສູງເຖິງ 120 ລ້ານເທື່ອຄົນ.
ໃນນັ້ນ, ຮູບເງົາ “Pegasus 3” ຜົນງານລ່າສຸດໃນຊຸດຮູບເງົາແຂ່ງລົດແນວຕະຫຼົກ ກໍາກັບໂດຍ Han Han ແລະ ນໍາສະແດງໂດຍ Shen Teng ໄດ້ກາຍເປັນຮູບເງົາທີ່ສ້າງລາຍຮັບສູງສຸດໃນລະດູການນີ້.
ນອກຈາກນັ້ນ, ຕະຫຼາດດ້ານການທ່ອງທ່ຽວ ໂດຍສະເພາະການເດີນທາງເຂົ້າປະເທດ ໄດ້ສະແດງແນວໂນ້ມຟື້ນໂຕຢ່າງວວາ. ຂໍ້ມູນຈາກແພລດຟອມການທ່ອງທ່ຽວຫຼັກ ສະແດງໃຫ້ເຫັນວ່າ ການຈອງຖ້ຽວບິນໄປຍັງປະເທດຈີນໃນຊ່ວງບຸນກຸດຈີນ ແມ່ນໄດ້ເພີ່ມຂຶ້ນຫຼາຍກວ່າ 400 ເປີເຊັນ ເມື່ອທຽບກັບປີກ່ອນ, ສະທ້ອນໃຫ້ເຫັນສະເໜ່ຂອງປະເທດຈີນຕໍ່ນັກທ່ອງທ່ຽວຕ່າງຊາດ.