 |
ກອງປະຊຸມ ໂດຍການເປັນປະທານຂອງທ່ານ ຄຳລາວັນ ຈັນທະລາວັນ ປະທານອົງການກາແດງແຫ່ງຊາດລາວ, ບັນດາທ່ານຮອງປະທານຄະນະກຳມະການປົກຄອງ 17 ແຂວງ ແລະ ນະຄອນຫຼວງ ພ້ອມດ້ວຍບັນດາແຂກຖືກເຊີນ.
ທ່ານ ຄໍາລາວັນ ຈັນທະລາວັນ ໄດ້ກ່າວເປີດ ຊຶ່ງມີບາງຕອນວ່າ: ຂ້າພະເຈົ້າຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງ ທີ່ໄດ້ເຂົ້າຮ່ວມ ແລະ ເປັນປະທານກອງປະຊຸມ ພ້ອມທັງໄດ້ຕ້ອນຮັບບັນດາທ່ານແຂກທີ່ມີກຽດ ທີ່ເຂົ້າຮ່ວມກອງປະຊຸມສະຫຼຸບການຈັດຕັ້ງປະຕິບັດວຽກງານກາແດງ ປະຈຳປີ 2025 ແລະ ວາງທິດທາງແຜນການ ປີ 2026; ກອງປະຊຸມໃນມື້ນີ້ ຖືວ່າເປັນກອງປະຊຸມທີ່ມີຄວາມໝາຍຄວາມສຳຄັນ ຊຶ່ງໄດ້ມີຜູ້ແທນຈາກອົງການກາແດງແຂວງໃນທົ່ວປະເທດ, ພະນັກງານ-ລັດຖະກອນຂອງອົງການກາແດງແຫ່ງຊາດລາວທັງໝົດ ເຂົ້າຮ່ວມຢ່າງພ້ອມພຽງ, ນອກນີ້ ກໍຍັງມີຕ່າງໜ້າຈາກຄະນະກຳມະການປົກຄອງແຂວງ ແລະ ຂະແໜງການທີ່ກ່ຽວຂ້ອງ ຂອງສູນກາງກໍໄດ້ເຂົ້າຮ່ວມ.
ການເຂົ້າຮ່ວມຂອງບັນດາທ່ານ ຖືວ່າມີຄວາມສຳຄັນຫຼາຍຕໍ່ກອງປະຊຸມ ເພາະເປັນການສົ່ງເສີມ ແລະ ຊຸກຍູ້ວຽກງານຊ່ວຍເຫຼືອມະນຸດສະທຳໃນ ສປປ ລາວ ຂອງພວກເຮົາ, ທັງເປັນການສ້າງກຳລັງໃຈໃຫ້ແກ່ພະນັກງານ-ລັດຖະກອນ ໃນການປະຕິບັດໜ້າທີ່ຂອງຕົນໃນວຽກງານກາແດງ, ໃນໂອກາດທີ່ມີຄວາມໝາຍສຳຄັນ ຂໍສະແດງຄວາມຂອບໃຈເປັນຢ່າງສູງຕໍ່ບັນດາທ່ານທີ່ໄດ້ສະຫຼະເວລາອັນມີຄ່າເຂົ້າຮ່ວມກອງປະຊຸມໃນຄັ້ງນີ້; ສະນັ້ນ, ກອງປະຊຸມພວກເຮົາຈະໄດ້ພ້ອມກັນທົບທວນຕີລາຄາຄືນການເຄື່ອນໄຫວວຽກງານກາແດງໃນທົ່ວປະເທດ ປະຈຳປີ 2025 ແລະ ວາງທິດທາງແຜນການ ປີ 2026 ຊຶ່ງຈະຍົກໃຫ້ເຫັນບາງຫົວຂໍ້ທີ່ສໍາຄັນມາແລກປ່ຽນບົດຮຽນນໍາກັນ ແລະ ຮັບຟັງການສົນທະນາແລກປ່ຽນຄຳຄິດຄຳເຫັນ ຈາກບັນດາທ່ານທີ່ເຂົ້າຮ່ວມກອງປະຊຸມ, ພ້ອມນັ້ນ ພວກເຮົາຈະໄດ້ພ້ອມກັນຄົ້ນຄວ້າ, ສັງເກດຕີລາຄາສະພາບການຈັດຕັ້ງປະຕິບັດວຽກງານກາແດງ ໃນໄລຍະ 1 ປີຜ່ານມາໃຫ້ເລິກເຊິ່ງ ເພື່ອຊອກໃຫ້ເຫັນຜົນງານດ້ານດີທີ່ຕັ້ງໜ້າ ແລະ ຂໍ້ຄົງຄ້າງ, ສາເຫດ ແລະ ວິທີການແກ້ໄຂ ບົນພື້ນຖານຄວາມເປັນເອກະພາບທາງດ້ານທັດສະນະ, ແນວຄິດ ແລະ ຮັບຮອງເອົາທິດທາງແຜນການໃນການຈັດຕັ້ງປະຕິບັດປີ 2026; ນອກຈາກນີ້, ພວກເຮົາຈະໄດ້ຄົ້ນຄວ້າ ແລະ ຮັບຟັງບົດຮຽນໃນການຊ່ວຍເຫຼືອຜູ້ປະສົບໄພນ້ຳຖ້ວມ ຢູ່ບາງແຂວງ, ບົດຮຽນໃນການສົ່ງເສີມສຸຂະພາບຊຸມຊົນ, ການຄຸ້ມຄອງອາສາສະໝັກໃນວຽກງານກູ້ໄພສຸກເສີນ, ບົດຮຽນການປຸກລະດົມຂົນຂວາຍບໍລິຈາກເລືອດ, ບົດຮຽນການຂົນຂວາຍແຫຼ່ງທຶນ ເພື່ອຊ່ວຍພັດທະນາອົງການກາແດງແຫ່ງຊາດລາວ ໃຫ້ກາຍເປັນອົງການທີ່ເຂັ້ມແຂງ ສາມາດປະຕິບັດວຽກງານຊ່ວຍເຫຼືອມະນຸດສະທຳ ທີ່ມີການເຂົ້າຮ່ວມຂອງສັງຄົມ ດ້ວຍຄວາມສະໝັກໃຈຢ່າງກວ້າງຂວາງ ແລະ ມີປະສິດທິຜົນ.
(ຂ່າວ: ແສງຈັນ)
ຄໍາເຫັນ