ຈາກ​ການ​ນຳ​ຂັ້ນ​ສູງ​​ຂອງ​ແຂວງກ້າວ​ສູ່​​ຜະ​ລິດກະ​ສິ​ກຳປອດສານພິດ ຫຼັງ​ບຳ​ນານ

ເສັ້ນທາງການເຮັດກະສິກຳຂອງທ່ານ ນາງ ແພງ ກັນຍາພີມ ເລີ່ມຕົ້ນຂຶ້ນໃນທ້າຍປີ 2020 ໂດຍເລີ່ມຈາກການເຊົ່າດິນ 2 ເຮັກຕາ ຢູ່ເມືອງວຽງໄຊ ເພື່ອປູກມອນລ້ຽງມ້ອນ, ແຕ່ເນື່ອງຈາກສະພາບດິນຟ້າອາກາດຢູ່ບໍລິເວນດັ່ງກ່າວບໍ່ເອື້ອອຳນວຍ ຈຶ່ງຫັນມາທົດລອງປູກໝາກມັງກອນ 60 ຕົ້ນ ຢູ່ສວນບ້ານກໍ່ ເມືອງຊຳເໜືອ ແທນ. ພາຍຫຼັງປູກໄດ້ປີກວ່າສາມາດເກັບຜົນຜະລິດຊຸດທຳອິດ ໄດ້ຫຼາຍກວ່າ 300 ກິໂລ ແລະ ຈຳໜ່າຍໄດ້ໃນລາຄາ 30,000-35,000 ກີບຕໍ່ກິໂລ. ຈາກຜົນສຳເລັດດັ່ງກ່າວ ຈຶ່ງໄດ້ຂະຫຍາຍພື້ນທີ່ປູກເພີ່ມຕື່ມຢູ່ທີ່ດິນສຳປະທານເມືອງວຽງໄຊ ຈົນເຮັດໃຫ້ສວນ ຂະຫຍາຍໃຫຍ່ຂຶ້ນເລື້ອຍໆ.

ປັດຈຸບັນ, ສວນມີຕົ້ນໝາກມັງກອນຫຼາຍກວ່າ 700 ຕົ້ນ ແບ່ງເປັນ 2 ສາຍພັນ ຄື: ພັນເນື້ອຂາວ ແລະ ພັນເນື້ອແດງ. ນອກຈາກໝາກມັງກອນແລ້ວ, ຍັງໄດ້ປູກໝາກໄມ້ ແລະ ພືດຜັກຕາມລະດູການອີກຫຼາຍຊະນິດ ເປັນຕົ້ນ ໝາກສີດາ, ອາໂວກາໂດ, ໝາກກ້ຽງ, ໝາກພຸກຫວານ, ໝາກເຂົ້າ, ໝາກລຳມຸດ, ໝາກມາດ, ໝາກນອດ, ໜໍ່ໄມ້ຫົກຫວານ, ໝາກຄໍ້ ແລະ ໝາກນັດ ພ້ອມທັງລ້ຽງປາ ແລະ ປູກພືດຜັກສວນຄົວ, ເຮັດໃຫ້ສວນແຫ່ງນີ້ກາຍເປັນແຫຼ່ງຜະລິດອາຫານທີ່ຫຼາກຫຼາຍ.

ທ່ານ ນາງ ແພງ ກັນຍາພິມ ກ່າວວ່າ: ຈຸດເດັ່ນສຳຄັນຂອງສວນແມ່ນເນັ້ນການປູກແບບປອດສານພິດ ປູກຕາມທຳມະຊາດ 100%, ໂດຍນຳໃຊ້ຝຸ່ນທຳມະຊາດທີ່ຫາໄດ້ຕາມທ້ອງຖິ່ນ ເປັນຕົ້ນແມ່ນ ຝຸ່ນຄອກ, ແກບ ແລະ ຫຍ້າທຳມະຊາດ ເອົາມາເຜົາໂຮມກັນ ແລ້ວນຳມາເຮັດເປັນຝຸ່ນບົ່ມເພື່ອບຳລຸງດິນ ຊຶ່ງການໃຊ້ຝຸ່ນທຳມະຊາດ ເຮັດໃຫ້ຕົ້ນໄມ້ເຕີບໃຫຍ່ແຂງແຮງດີ, ຜົນຜະລິດມີຄຸນນະພາບ, ລົດຊາດແຊບ ແລະ ທີ່ສຳຄັນແມ່ນມີຄວາມປອດໄພຕໍ່ຜູ້ບໍລິໂພກ. ສ່ວນເຕັກນິກການປູກ ແລະ ບົວລະບັດຮັກສາຕົ້ນໄມ້ນັ້ນ ບໍ່ໄດ້ຢຸດການຮຽນຮູ້ພຽງແຕ່ຈາກປະສົບການສ່ວນຕົວເທົ່ານັ້ນ, ແຕ່ຍັງໄດ້ຄົ້ນຄວ້າ ແລະ ສຶກສາເພີ່ມເຕີມຈາກສື່ອອນລາຍ ໂດຍສະເພາະທາງ ຢູທູບ (YouTube ) ແລ້ວນຳມາປັບໃຊ້ຕົວຈິງກັບສວນຂອງຕົນ ຈົນປະສົບຜົນສຳເລັດ. ໃນແຕ່ລະປີ, ຕົ້ນໝາກມັງກອນຢູ່ສວນສາມາດເກັບຜົນຜະລິດໄດ້ເຖິງ 4 ຊຸດ ໂດຍເລີ່ມອອກໝາກໃນລະຫວ່າງເດືອນມິຖຸນາ ຫາ ເດືອນຕຸລາ ຂອງທຸກໆປີ.ສ່ວນບ່ອນຈໍາໜ່າຍແມ່ນຂາຍຢູ່ໜ້າເຮືອນຂ້າງຕະຫຼາດເມືອງຊຳເໜືອ ແລະ ສົ່ງໃຫ້ລູກຄ້າຕາມການສັ່ງຈອງ.

ທ່ານ ນາງ ແພງ ກັນຍາພີມ ໃຫ້ຮູ້ຕື່ມວ່າ: ຄວາມສຳເລັດຂອງສວນບໍ່ພຽງແຕ່ເປັນການສ້າງລາຍຮັບເສີມເຂົ້າ ຄອບຄົວ ແລະ ສ້າງຄວາມສຸກ-ສຸຂະພາບທີ່ດີ ໃນໄວພັກຜ່ອນບຳນານເທົ່ານັ້ນ, ແຕ່ຍັງເປັນແບບຢ່າງອັນດີເລີດໃຫ້ແກ່ພະນັກງານບຳນານ ກໍຄືປະຊາຊົນບັນດາເຜົ່າ ໃນການນຳໃຊ້ເວລາຫວ່າງ ແລະ ທ່າແຮງຂອງທີ່ດິນໃຫ້ເກີດປະໂຫຍດສູງສຸດ. ພ້ອມນັ້ນ, ໃນອະນາຄົດໃກ້ນີ້ ຈະເປີດໃຫ້ມວນຊົນໄດ້ເຂົ້າທ່ຽວຊົມ ແລະ ທັດສະນະສຶກສາ ເພື່ອແບ່ງປັນປະສົບການໃຫ້ຊາວກະສິກອນຜູ້ສົນໃຈໄດ້ເຂົ້າໄປສຶກສາຮຽນຮູ້ແລ້ວນຳໄປຕໍ່ຍອດໃນອະນາຄົດຕື່ມອີກ.

ການຫັນຈາກຄະນະບໍລິຫານພັກແຂວງມາສູ່ອາຊີບກະສິກຳສະແດງໃຫ້ເຫັນວ່າ ການບຳນານບໍ່ແມ່ນຈຸດສີ້ນສຸດຂອງຊີວິດການເຮັດວຽກ, ແຕ່ສາມາດເປັນຈຸດເລີ່ມຕົ້ນຂອງໂອກາດໃໝ່ ດ້ວຍຄວາມດຸໝັ່ນ, ການຮຽນຮູ້ ແລະ ຄວາມຮັກໃນອາຊີບກະສິກຳ, ຊີວິດໃນໄວບຳນານກໍສາມາດສ້າງທັງລາຍຮັບ, ສຸຂະພາບ, ຄວາມສຸກ ແລະ ຄຸນຄ່າໃຫ້ແກ່ຄອບຄົວ ແລະ ສັງຄົມ.

ໂດຍ: ໄອແກ້ວ