ສະຫາຍ ອາລຸນໄຊ ສູນນະລາດ ເລຂາຄະນະບໍລິຫານງານພັກແຂວງຈຳປາສັກ ໄດ້ປະກອບຄຳເຫັນຕໍ່ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກໃນວັນທີ 6 ມັງກອນຜ່ານມາວ່າ: ຕາງໜ້າໃຫ້ອົງຄະນະພັກແຂວງຈຳປາສັກຂຶ້ນມີຄຳເຫັນແລກປ່ຽນໃນຫົວຂໍ້: “ຫັນລົງກໍ່ສ້າງຮາກຖານການເມືອງ ຕິດພັນກັບການ ພັດທະ ນາຊົນນະບົດຮອບດ້ານ ແລະ ແກ້ໄຂຄວາມທຸກຍາກຢູ່ແຂວງຈໍາປາສັກ”, ໂດຍປະຕິບັດຕາມມະຕິເລກທີ 056 ຂອງຄະນະເລຂາທິການສູນກາງພັກ, ຄໍາສັ່ງເລກທີ 097 ຂອງກົມການເມືອງສູນກາງພັກ ແລະ ມະຕິ 076 ຂອງກົມການເມືອງສູນກາງພັກ, ຄະນະປະຈຳພັກແຂວງຈຳປາສັກໄດ້ອອກເປັນບົດແນະນຳ ເລກທີ 03 ຂອງຄະນະປະຈຳພັກແຂວງກ່ຽວກັບວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງ. ຕະຫຼອດໄລຍະຜ່ານມາ, ຄະນະພັກ-ຄະນະກຳມະການປົກຄອງແຂວງ ໄດ້ຖືເປັນວຽກຍຸດທະສາດທີ່ສໍາຄັນຕໍ່ການນຳພາ-ຊີ້ນໍາວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນ ນະບົດ ແລະ ແກ້ໄຂຄວາມທຸກຍາກຕາມ 4 ເນື້ອໃນ 4 ຄາດໝາຍ ສະແດງອອກຄື: ວຽກງານການເມືອງແນວຄິດ. ຄະນະພັກແຂວງໄດ້ຖືເອົາວຽກງານການເມືອງ-ແນວຄິດເປັນກົກ, ເປັນວຽກສໍາຄັນໃນການກໍ່ສ້າງພັກ ກໍຄືວຽກງານກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກຢ່າງແຂງແຮງ ໂດຍຖືເອົາວຽກງານສຶກສາອົບຮົມການເມືອງ-ແນວຄິດ ແລະ ນໍາພາຈັດຕັ້ງເຜີຍແຜ່, ເຊື່ອມຊຶມບັນດາມະຕິ, ຄຳສັ່ງຕ່າງໆ ຂອງສູນກາງພັກ, ຂອງອົງຄະນະພັກແຂວງໃຫ້ບັນດາເປົ້າໝາຍຕ່າງໆຢ່າງເລິກເຊິ່ງ, ວຽກງານການປັບປຸງການຈັດຕັ້ງໃນລະບົບການເມືອງ ສຸມໃສ່ປັບປຸງການຈັດຕັ້ງໃນລະບົບການເມືອງຢູ່ຂັ້ນຮາກຖານ, ສາມາດປະຕິບັດບົດບາດເປັນແກນນໍາໃນລະບົບການເມືອງ ໄປຄຽງຄູ່ກັບການປັບປຸງພາລະບົດບາດ, ສັບຊ້ອນ, ຈັດວາງ ຄະນະພັກຂັ້ນຕ່າງໆໃຫ້ສອດຄ່ອງກັບສະພາບຄວາມເປັນຈິງ ສາມາດນໍາພາຈັດຕັ້ງປະຕິບັດໜ້າທີ່ການ ເມືອງທັງມີຜົນສໍາເລັດໃນແຕ່ລະໄລຍະ ເຮັດໃຫ້ຮາກຖານໜັກແໜ້ນ, ການຈັດຕັ້ງພັກມີຄວາມເຕີບໃຫຍ່ເຂັ້ມແຂງ ແລະ ສ້າງໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຮາກຖານມີຄວາມສະຫງົບໜັກແໜ້ນ, ສະພາບການພັດທະນາຢູ່ຮາກຖານມີຖ່ວງທ່າກ້າວໜ້າ ແລະ ຂະຫຍາຍຕົວຢ່າງໝັ້ນທ່ຽງ, ການພັດທະນາເສດຖະກິດ-ສັງຄົມສຸມໃສ່ແກ້ໄຂຄວາມທຸກຍາກຂອງປະຊາຊົນດ້ວຍຫຼາຍຮູບ-ຫຼາຍວິທີການ ອັນສໍາຄັນໄດ້ສ້າງ ແລະ ປັບປຸງກຳລັງການຜະລິດ ແລະ ການພົວພັນການຜະລິດໃຫ້ເຂັ້ມແຂງ ຕາມທິດເສດຖະກິດເອກະລາດ ແລະ ເປັນເຈົ້າຕົນເອງ (ສອຈ). ປັດຈຸບັນທົ່ວແຂວງມີກຸ່ມການຜະລິດທັງໝົດ 16 ກຸ່ມ, 89 ບ້ານ, ມີສະມາຊິກ 2,926 ຄອບຄົວ, ສະຫະກອນການຜະລິດ 14 ສະຫະກອນ, ສະມາຊິກ 2,045 ຄົນ ສາມາດຜະລິດເປັນສິນຄ້າກຸ້ມຕົນເອງ 188 ຜະລິດຕະພັນ, ເປັນສິນຄ້າໂອດັອບ 150 ຜະລິດຕະພັນ, ສ້າງເປັນຍີ່ຫໍ້ສິນຄ້າຂອງຕົນເອງ 40 ຜະລິດຕະພັນ ແລະ ສົ່ງອອກ 18 ຜະລິດຕະພັນ. ທົ່ວແຂວງມີກອງທຶນພັດທະນາບ້ານ 681 ກອງທຶນ, ມີສະມາຊິກ 7 ແສນກວ່າຄົນ, ມີທຶນ 90,2 ຕື້ກີບ ເພີ່ມຂຶ້ນ 8,88%; ກອງທຶນສະຫະກອນສິນເຊື່ອເງິນຝາກປະຢັດ (ສສງ) ມີ 8 ແຫ່ງ, ກໍ່ສ້າງ ແລະ ປັບປຸງພື້ນຖານໂຄງລ່າງ ໂດຍສະເພາະການກໍ່ສ້າງເສັ້ນທາງເພື່ອເຊື່ອມຕໍ່ລະຫວ່າງແຂວງ ກັບເມືອງ, ເມືອງຫາບ້ານ ແລະ ຫາເຂດຈຸດສຸມພັດທະນາ, ພິເສດໄດ້ສຸມໃສ່ແກ້ໄຂບ້ານທີ່ບໍ່ທັນພົ້ນທຸກຕາມມາດຖານ ດຳລັດ 348/ນຍ ທີ່ຍັງຄ້າງ 6 ບ້ານ ໄດ້ມີທາງທຽວໄດ້ 2 ລະດູ ສຳເລັດ 100% ສິ່ງທີ່ໂດດເດັ່ນ ແລະ ໜ້າຊື່ນຊົມທີ່ສຸດແມ່ນປະຊາຊົນບັນດາເຜົ່າມີຄວາມຕື່ນຕົວ ແລະ ສະຫຼະທຶນຮອນຢ່າງຫຼວງຫຼາຍ ທັງປະກອບສ່ວນເຫື່ອແຮງເຂົ້າໃນການກໍ່ສ້າງເສັ້ນທາງ ແລະ ຂົວ (ເສັ້ນທາງ 366,97 ກິໂລແມັດ, ຂົວ 295 ແມັດ) ມູນຄ່າທັງໝົດ 79,32 ຕື້ກີບ, ເດັ່ນກວ່າໝູ່ແມ່ນການກໍ່ສ້າງທາງເບຕົງລະຫວ່າງບ້ານຕໍ່ບ້ານ ມີຄວາມຍາວ 78,67 ກິໂລແມັດ ມູນຄ່າ 60,67 ຕື້ກວ່າກີບ ແລະ ຂົວເບຕົງ ຍາວ195 ແມັດ ມູນຄ່າ 9,01 ຕື້ກີບ, ວຽກງານປ້ອງກັນ ຊາດ-ປ້ອງກັນຄວາມສະຫງົບ, ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ, ໃນນັ້ນໄດ້ຫັນເອົາກໍາລັງລົງກໍ່ສ້າງຮາກຖານການເມືອງຕາມສາຍຕັ້ງທັງໝົດ 1,001 ສະຫາຍ, ນໍາພາປັບປຸງກຳລັງກອງຫຼອນ, ປກສບ້ານ, ສ້າງ ແລະ ປັບປຸງທ່າສະໜາມສົງຄາມ 3 ຂັ້ນ. ສາມາດສ້າງໄດ້ບ້ານປ້ອມໝັ້ນ 301 ບ້ານ, ກຸ່ມບ້ານສູ້ຮົບຕິດລຽນ 125 ກຸ່ມບ້ານ, ບ້ານປ້ອງກັນຊາດເຂັ້ມແຂງ 587 ບ້ານ ກວມເອົາ 91.43%, ບ້ານປ້ອງກັນຄວາມສະຫງົບດີ 623 ບ້ານ ກວມ 93.92% ພົ້ນເດັ່ນສາມາດຮັກສາບ້ານປ້ອງກັນຄວາມສະຫງົບ 3 ປີຊ້ອນ 550 ບ້ານ, ກວມ 85.66% ເຮັດໃຫ້ທົ່ວສັງຄົມ ແລະ ປະຊາຊົນບັນດາເຜົ່າຕື່ນຕົວປະກອບພັນທະເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ລວມມູນຄ່າ 23.94 ຕື້ກວ່າກີບ, ໄດ້ຈັດຕັ້ງການອົບຮົມຫັດແອບຊ້ອມຮົບຂັ້ນຍຸດທະວິທີໃຫ້ເປົ້າໝາຍຕ່າງໆຢ່າງເປັນຂະບວນຕໍ່ເນື່ອງ, ພ້ອມກັນນັ້ນ, ຄະນະພັກແຕ່ລະຂັ້ນໄດ້ສຸມໃສ່ນໍາພາສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນສັງຄົມດ້ວຍມາດຕະການຕ່າງໆ ຢ່າງເອົາໃຈໃສ່.
ສະຫາຍ ອາລຸນໄຊ ສູນນະລາດ ກ່າວຕື່ມວ່າ: ເພື່ອຫັນວຽກງານກໍ່ສ້າງຮາກຖານການເມືອງຕິດພັນກັບການພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກນັ້ນ, ຄະນະພັກ, ຄະນະກຳມະການປົກຄອງ ແລະ ປະຊາຊົນຊາວແຂວງຈຳປາສັກ ຈະໄດ້ສຸມໃສ່ເພີ່ມທະວີວຽກງານການເມືອງແນວຄິດດ້ວຍການປັບປຸງວຽກງານໂຄສະນາເຜີຍແຜ່ສຶກສາອົບຮົມເພື່ອແນໃສ່ສ້າງສະຕິຊາດ, ສະຕິກົດໝາຍ, ສະຕິການຈັດຕັ້ງ, ສະຕິພັນທະຄວາມຮັບຜິດຊອບໃນສັງຄົມ ແລະ ສະຕິເປັນເຈົ້າດ້ວຍຫຼາຍຮູບການ, ວິທີການທີ່ສອດຄ່ອງກັບບັນຫາ ແລະ ເປົ້າໝາຍ, ບູລະນະລະບອບປະຊາທິປະໄຕປະຊາຊົນແຕ່ຮາກຖານ, ນໍາພາສ້າງ ແລະ ປັບປຸງຕາແສງ, ອົງການ ປົກຄອງບ້ານ ໂດຍສຸມໃສ່ສ້າງຄວາມເຂັ້ມແຂງໃຫ້ບຸກຄະລາກອນ ແລະ ກົງຈັກຕ່າງໆ ຂອງຕາແສງ ແລະ 5 ໜ່ວຍງານຂັ້ນບ້ານໃຫ້ມີຄວາມສາມາດໃນການຄຸ້ມຄອງລັດ, ຄຸ້ມຄອງດ້ວຍກົດໝາຍ ເພື່ອເຮັດໃຫ້ສັງຄົມມີປະຊາ ທິປະໄຕ ຍຸຕິທຳແຕ່ຮາກຖານຂຶ້ນມາ, ສືບຕໍ່ກໍ່ສ້າງ ແລະ ປັບປຸງພື້ນຖານໂຄງລ່າງຮັບໃຊ້ການຜະລິດ ແລະ ການ ດໍາລົງຊີວິດຂອງປະຊາຊົນບັນດາເຜົ່າ 1 ຕິດພັນກັບການສົ່ງເສີມການຜະລິດເປັນສິນຄ້າ, ການປຸງແຕ່ງ ແລະ ການບໍລິການຕາມທ່າແຮງຂອງທ້ອງຖິ່ນ ຕາມທິດສ້າງເສດຖະກິດເອກະລາດເປັນເຈົ້າຕົນເອງ, ອະນຸລັກຮັກສາວັດທະນະທໍາຮີດຄອງປະເພນີອັນດີງາມຂອງທ້ອງຖິ່ນ ໄປຄຽງຄູ່ກັບການຊຸກຍູ້ການທ່ອງທ່ຽວທຳມະຊາດ, ປະຫວັດ ສາດ, ວັດທະນະທໍາຢ່າງເອົາໃຈໃສ່, ຍົກສູງຄຸນນະພາບການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ເຂັ້ມແຂງດ້ວຍການສ້າງທ່າສະໜາມສາມຂັ້ນ, ສ້າງບ້ານປ້ອມໝັ້ນ, ບ້ານປ້ອງກັນຊາດເຂັ້ມແຂງ, ບ້ານປ້ອງກັນຄວາມສະຫງົບດີ, ບ້ານປອດຢາເສບຕິດ ແລະ ສະກັດກັ້ນໜໍ່ແໜງຄວາມບໍ່ສະຫງົບຢ່າງເອົາໃຈໃສ່.
ຄໍາເຫັນ