 |
ໃນພິທີ, ແມ່ນໄດ້ຮັບຟັງການຜ່ານບົດລາຍງານໂດຍຫຍໍ້ກ່ຽວກັບການຈັດຕັ້ງນໍາພາ ແລະການປະຕິບັດຫຼັກສູດສ້າງຄູໃນໄລຍະຜ່ານມາ ແລະຈໍາສົກຮຽນ 2025-2026ຊຶ່ງລາຍງານໂດຍທ່ານ ລັດສະໝີ ພະໄຊສີ ຜູ້ອໍານວຍການ ວຄສ.ໃນສົກຮຽນ 2025-2026ນີ້, ວິທະຍາໄລພວກເຮົາ ມີຄູ-ອາຈານ ພະນັກງານທັງໝົດ 134 ທ່ານຍິງ 70 ທ່ານ, ກວມເອົາທັງຄູສອນໃນໂຮງຮຽນອະນຸບານ, ປະຖົມ ແລະມັດທະຍົມສາທິດ, ມີຈໍານວນນັກຮຽນ-ນັກສຶກສາທັງໝົດ 1,130 ຄົນຍິງ 675 ຄົນຮຽນ.ໃນນີ້, ພາກປົກກະຕິມີ 552 ຄົນຍິງ 362 ຄົນ, ພະນັກງານຄູປະຈໍາການມາຮຽນຍົກລະດັບວຸດທິຄູໃນໄລພັກປີຮຽນ 578 ຄົນຍິງ 313 ຄົນ.ໃນນີ້, ມີນັກຮຽນສາຍສາມັນທີ່ຮຽນໃນໂຮງຮຽນສາທິດທັງໝົດ770 ຄົນຍິງ 373 ຄົນ.
ໃນໂອກາດນີ້, ທ່ານເຈົ້າແຂວງສະຫວັນນະເຂດ ໄດ້ໃຫ້ກຽດໂອ້ລົມ ແລະໃຫ້ທິດຊີ້ນໍາຕໍ່ວຽກງານການສຶກສາຂອງ ວຄສ ໂດຍທ່ານ ໄດ້ເນັ້ນໜັກໃນຫຼາຍບັນຫາສໍາຄັນເປັນຕົ້ນ: ການຍົກລະດັບຄຸນນະພາບການຮຽນ-ການສອນໃຫ້ທັນສະໄໝ ແລະສອດຄ່ອງກັບຄວາມຕ້ອງການຂອງສັງຄົມ;ການພັດທະນາຄູ-ອາຈານໃຫ້ມີຄວາມຮູ້ ແລະທັກສະທີ່ທັນສະໄໝ ເພື່ອສາມາດສອນໃຫ້ນັກຮຽນຮັກການຮຽນຮູ້ ແລະມີທັກສະຊີວິດ, ການລະດົມພາກສ່ວນຕ່າງໆ ລວມທັງພໍ່ແມ່, ຊຸມຊົນ ແລະອົງການທ້ອງຖິ່ນ ເຂົ້າຮ່ວມສົ່ງເສີມ ແລະລະດົມໃຫ້ເດັກນ້ອຍເຂົ້າໂຮງຮຽນ ໃຫ້ທັນເວລາ ແລະຢ່າງຄົບຖ້ວນ;ການສ້າງເງື່ອນໄຂ ແລະ ບັນຍາກາດການຮຽນທີ່ດຶງດູດໃຫ້ເດັກນ້ອຍຮັກໂຮງຮຽນ ແລະມີຄວາມສຸກໃນການຮຽນ.ນອກນັ້ນ, ທ່ານເຈົ້າແຂວງ ຍັງໄດ້ເນັ້ນໃຫ້ບັນດາຫົວໜ້າຫ້ອງການ, ຜູ້ບໍລິຫານໂຮງຮຽນ ແລະຄູ-ອາຈານ ຮ່ວມມືຢ່າງໃກ້ຊິດກັບພາກສ່ວນທ້ອງຖິ່ນ ເພື່ອລະດົມໃຫ້ນັກຮຽນເຂົ້າໂຮງຮຽນຄົບຈໍານວນ ໂດຍສະເພາະໃນພື້ນທີ່ຊົນນະບົດ ແລະເຂດຫ່າງໄກສອກຫຼີກ, ເພື່ອໃຫ້ເດັກທຸກຄົນໄດ້ມີໂອກາດຮຽນຮູ້ຢ່າງເທົ່າເຖິງ ແລະສ້າງອະນາຄົດທີ່ດີໃຫ້ຕົນເອງ.
 |
ຈາກນັ້ນ, ທ່ານ ບຸນໂຈມ ອຸບົນປະເສີດ ພ້ອມດ້ວຍຄະນະ ກໍໄດ້ມອບອຸປະກອນສະໜັບສະໜູນການຈັດການຮຽນ-ການສອນ ລວມມູນຄ່າ 50 ລ້ານກວ່າກີບ ແລະແນກອຸດສາຫະກຳ ແລະການຄ້າແຂວງ ໄດ້ມອບປຶ້ມ300 ຫົວ, ເຄື່ອງກິລາອີກຈຳນວນໜຶ່ງ, ພະແນກແຮງງານ ແລະສະຫວັດດີການແຂວງ ມອບເຂົ້າສານຈຳນວນ1ໂຕນ.
ໂອກາດດັ່ງກ່າວ, ຄະນະນໍາຂັ້ນແຂວງ ຍັງໄດ້ໄປຢ້ຽມຊົມເບິ່ງສະຖານທີ່ຕ່າງໆພາຍໃນວິທະຍາໄລເຊັ່ນ: ຫໍພັກນັກສຶກສາ, ອາຄານຮຽນ ແລະຫ້ອງຮຽນອີກດ້ວຍ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ