ເຈົ້າແຂວງຄໍາມ່ວນ ຊີ້ນໍາຂະແໜງການກ່ຽວຂ້ອງເລັ່ງບູລະນະປັບປຸງສະຖານທີ່ທ່ອງທ່ຽວ

ໃນໂອກາດເຄື່ອນໄຫວຕິດຕາມກວດກາຜົນສໍາເລັດ ໂຄງການກໍ່ສ້າງສາລາໂຮງທໍາທີ່ວັດພະທາດສີໂຄດຕະບອງ ເມືອງທ່າແຂກ ແຂວງຄຳມ່ວນໃນທ້າຍອາທິດຜ່ານມາ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ໄດ້ໃຫ້ທິດຊີ້ນໍາຕໍ່ອົງການປົກຄອງເມືອງທ່າແຂກ ແລະ ຂະແໜງການທີ່ກ່ຽວຂ້ອງຂັ້ນແຂວງ ຈົ່ງໄດ້ຄົ້ນຄວ້າປືກສາຫາລື ແລະ ວາງແຜນວຽກຮ່ວມກັນໃນການບູລະນະປະຕິສັງຂອນ ແລະ ຈັດສັນຄວາມເປັນລະບຽບຮຽບຮ້ອຍ ຮັກສາໄດ້ຄວາມສະອາດຈົບງາມ ໂດຍສະເພາະແມ່ນການປັບແຕ່ງທັດສະນີຍະພາບຢູ່ພາຍໃນບໍລິເວນຈຸດທີ່ຕັ້ງພະທາດສີໂຄດຕະບອງ ແລະ ການຕິດຕັ້ງລະບົບໄຟຟ້າຕ່າງໆ ຊຶ່ງທ່ານໄດ້ມອບຄວາມຮັບຜິດ ຊອບໃຫ້ຄະນະນໍາເມືອງທ່າແຂກ ແລະ ຂະແໜງການທີ່ກ່ຽວຂ້ອງແຕ່ລະພາກສ່ວນ ຈົ່ງໄດ້ປະສານສົມທົບກັບຂະແໜງການສາຍຕັ້ງຂອງຕົນ ໃນການວາງແຜນຢ່າງລະອຽດຖີ່ຖ້ວນໃນແຕ່ລະໜ້າວຽກ ເພື່ອຄວາມເປັນເອກະພາບກັນ ກ່ອນທີ່ຈະດໍາເນີນການຈັດຕັ້ງປະຕິບັດຫຼີກລ່ຽງບັນຫາຜົນກະທົບໃນແຕ່ລະດ້ານ. 
ທັງນີ້ເພື່ອແນໃສ່ອະນຸລັກປົກປັກຮັກສາປູສະນີຍະສະຖານ ວັດຖຸບູຮານອັນເກົ່າແກ່ທີ່ເປັນມໍລະດົກທາງດ້ານວັດທະນະທໍາ ເປັນມິ່ງບ້ານຂວັນເມືອງຂອງປວງຊົນລາວຊາວພຸດ ທີ່ສໍາຄັນຍັງເປັນແຫຼ່ງທ່ອງທ່ຽວທາງດ້ານວັດທະນະທໍາທີ່ມີຊື່ສຽງ ຂອງແຂວງຄໍາມ່ວນ ທັງເປັນການສ້າງຄວາມພ້ອມເພື່ອຕ້ອນຮັບນັກທ່ອງທ່ຽວ ໃນປີທ່ອງທ່ຽວລາວ 2024 ອີກດ້ວຍ.   
ຂ່າວ-ພາບ: ມະນີວັນ