ເຈົ້າແຂວງໄຊຍະບູລີ ຊຸກຍູ້ການເກັບກູ້ພືດລະດູປີ ແລະ ການເກັບຊື້-ສົ່ງອອກຢູ່ເມືອງປາກລາຍ

ໃນວັນທີ 19 ຕຸລານີ້, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມຄະນະ ໄດ້ລົງຕິດຕາມຊຸກຍູ້ຂະບວນການເກັບກູ້ພືດລະດູປີ ແລະ ການເກັບຊື້-ສົ່ງອອກສິນຄ້າກະສິກໍາຢູ່ເມືອງປາກລາຍ, ໃຫ້ການຕ້ອນຮັບໂດຍ ທ່ານ ກອງສີ ວົງສີ ເຈົ້າເມືອງປາກລາຍ ພ້ອມດ້ວຍການນໍາ ແລະ ສະມາຄົມເກັບຊື້ສິນຄ້າກະສິກໍາຂອງເມືອງໃຫ້ການຕ້ອນຮັບຢ່າງອົບອຸ່ນ.
ທ່ານ ກອງສີ ວົງສີ ໄດ້ລາຍງານກ່ຽວກັບຂະບວນການເກັບກູ້ພືດລະດູປີຂອງປະຊາຊົນ ຊຶ່ງລະດູປີ 2023 ນີ້ ທົ່ວເມືອງປາກລາຍມີເນື້ອທີ່ປູກພືດເປັນສິນຄ້າເປັນຕົ້ນແມ່ນ ມັນຕົ້ນເນື້ອທີ່ 32.122,30 ຮຕ,                  ໝາກເດືອຍ ເນື້ືອທີ່ 262,51 ຮຕ, ປັດຈຸບັນພວມບົວລະບັດຮັກສາ ແລະ ສາລີແຂງ ເນື້ອທີ່ 2.435,37 ຮຕ ເກັບກູ້ສຳເລັດ 70% ແລະ ເນື້ອທີ່ ຢາງພາລາ 796,74 ຮຕ, ສໍາລັບການເກັບຊື້ຜົນຜະລິດກະສິກໍາ ມັນຕົ້ນລາຄາປັດຈຸບັນ  1.450 ກີບ/ກິໂລ, ມັນຕົ້ນຝານແຫ້ງ 4.420 ກີບ, ສາລີຝັກ 2.400 ກີບ/ກິໂລ, ໝາກຖົ່ວດິນຝັກ 10.000 ກີບ/ກິໂລ  ແລະ ຢາງພາລາ 11.000 ກີບ/ກິໂລ, ສ່ວນສາລີ ຮອດປັດຈຸບັນແມ່ນບໍ່ສາມາດສົ່ງອອກຂາຍໄປ ຣາຊະອານາຈັກໄທໄດ້ເທື່ອ, ສາລີດັ່ງກ່າວແມ່ນຜູ້ປະກອບການພາຍໃນເມືອງໄດ້ເກັບຊື້, ສີ-ອົບແຫ້ງ ແລະ ເກັບມ້ຽນໄວ້ສາງເພື່ອລໍຖ້າສົ່ງອອກໄປ ຣາຊະອານາຈັກໄທໃນລະຫວ່າງເດືອນມັງກອນ-ກຸມພາ 2024,  ພ້ອມດຽວກັນທ່ານເຈົ້າເມືອງຍັງໄດ້ລາຍງານກ່ຽວກັບການດໍາເນີນກອງປະຊຸມໃຫຍ່ 3 ຂັ້ນຂອງພັກ, ປັດຈຸບັນເມືອງປາກລາຍແມ່ນໄດ້ແບ່ງທີມງານຂອງເມືອງເປັນ 8 ທີມງານປະກອບມີພະນັກງານຫຼັກແຫຼ່ງຂອງເມືອງຈໍານວນ 279 ສະຫາຍ ຍິງ 35 ສະຫາຍ ເພື່ອສືບຕໍ່ລົງກໍ່ສ້າງຮາກຖານການເມືອງ ດໍາເນີນກອງປະຊຸມໜ່ວຍພັກ ແລະ ກອງປະຊຸມໃຫຍ່ຂອງບ້ານ ຊຶ່ງເລີ່ມແຕ່ວັນທີ 16 ຕຸລາ 2023 ຄາດຄະເນຮອດວັນທີ 30 ທັນວາ 2023 ຈະໃຫ້ສຳເລັດ.
ໂອກາດດັ່ງກ່າວ ທ່ານເຈົ້າແຂວງໄຊຍະບູລີ ກໍໄດ້ເນັ້ນໜັກໃຫ້ການນໍາຂອງເມືອງ ສືບຕໍ່ຊຸກຍູ້ປະຊາຊົນໃນການເກັບກູ້ ພືດລະດູປີໃຫ້ທ່ວງທັນລະດູການເປັນຕົ້ນແມ່ນສາລີ, ສໍາລັບຜູ້ປະກອບການແມ່ນໃຫ້ສືບຕໍ່ເກັບຊື້ສາລີຈາກປະຊາຊົນ ແລະ ບໍ່ກົດດັນລາຄາຈາກປະຊາຊົນ ພ້ອມທັງເລັ່ງສີ, ອົບແຫ້ງ ແລະ ເກັບມ້ຽນໄວ້ໃຫ້ດີ ເພື່ອລໍຖ້າສົ່ງອອກ, ຈາກນັ້ນທີມງານຂອງທ່ານເຈົ້າແຂວງກໍໄດ້ລົງຢ້ຽມຢາມບັນດາໂຮງງານ ສີ ແລະ ອົບສາລີ ແລະ ໂຮງງານແປ້ງມັນຕົ້ນ ອີກດ້ວຍ. 
(ຂ່າວ-ພາບ: ອຸ່ນເຮືອນ ໂພທິລັກ)