ໃນໂອກາດມີຄໍາເຫັນໂອ້ລົມຕໍ່ກອງປະຊຸມຄົບຄະນະບໍລິຫານງານພັກແຂວງເປີດກວ້າງຄັ້ງທີ9ສະໄໝທີX ໃນວັນທີ15ທັນວານີ້ສະຫາຍເຫຼັກໄຫຼສີວິໄລກໍາມະການສູນກາງພັກເລຂາພັກແຂວງເຈົ້າແຂວງເຊກອງໄດ້ເນັ້ນໃຫ້ຄະນະພັກ-ຄະນະນໍາທຸກຂັ້ນຂອງແຂວງເອົາໃຈໃສ່ປັບປຸງແບບແຜນນໍາພາ-ວິທີເຮັດວຽກ, ກໍ່ສ້າງ, ປັບປຸງພັກໃຫ້ມີຄຸນນະພາບແລະກໍ່ສ້າງພະນັກງານໃຫ້ມີຄວາມຮູ້ຄວາມສາມາດ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີນໍ້າໃຈເສຍສະຫຼະເອື້ອເຟື້ອເຜື່ອແຜ່ແລະເຮັດສໍາເລັດໜ້າທີ່ທີ່ໄດ້ຮັບມອບໝາຍ.
ພ້ອມນີ້, ກໍສືບຕໍ່ສຶກສາອົບຮົມການເມືອງ-ນໍາພາແນວຄິດ, ສ້າງຄວາມຮັບຮູ້ເຂົ້າໃຈໃຫ້ສະມາຊິກພັກ-ພະນັກງານກໍຄືປະຊາຊົນບັນດາເຜົ່າເພື່ອສ້າງການຫັນປ່ຽນດ້ານແນວຄິດຈິນຕະນາການ; ປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບຕິດພັນກັບການພັດທະນາເສດຖະກິດ-ສັງຄົມ, ຍູ້ແຮງຂະບວນການຜະລິດສະບຽງອາຫານ-ການຜະລິດເປັນສິນຄ້າແລະຊຸກຍູ້ສົ່ງເສີມການນໍາໃຊ້ສິນຄ້າພາຍໃນເພື່ອຫຼຸດຜ່ອນການນໍາເຂົ້າ; ສືບຕໍ່ຈັດສັນພູມລໍາເນົາ, ຈັດສັນອາຊີບໝັ້ນທ່ຽງຍືນຍົງໃຫ້ປະຊາຊົນ; ເພີ່ມທະວີຄຸ້ມຄອງການເກັບລາຍຮັບ-ລາຍຈ່າຍງົບປະມານ, ປະຕິບັດມາດຕະການປະຢັດ, ຕ້ານການຟຸມເຟືອຍ; ປັບປຸງກົນໄກ, ສ້າງສິ່ງຈູງໃຈ-ສິ່ງອໍານວຍຄວາມສະດວກ, ຍາດແຍ່ງການຊ່ວຍເຫຼືອ, ດຶງດູດການລົງທຶນພາກເອກະຊົນພາຍໃນແລະຕ່າງປະເທດໃຫ້ຫຼາຍຂຶ້ນ; ເອົາໃຈໃສ່ຕິດຕາມ, ກວດກາແລະຊຸກຍູ້ການຈັດຕັ້ງປະຕິບັດໂຄງການລົງທຶນທີ່ອະນຸມັດແລ້ວໃຫ້ເຄື່ອນໄຫວເປັນປົກກະຕິແລະຄຸ້ມຄອງການລົງທຶນຂອງລັດ, ທຶນຊ່ວຍເຫຼືອ-ທຶນກູ້ຢືມແລະການລົງທຶນຂອງເອກະຊົນໃຫ້ມີຄຸນນະພາບ; ພັດທະນາການສຶກສາ, ຍົກສູງຄຸນນະພາບການຮຽນ-ການສອນ, ຂະຫຍາຍຕາໜ່າງສາທາລະນະສຸກ, ຫັນການບໍລິການປິ່ນປົວສຸຂະພາບລົງສູ່ຮາກຖານ, ເພີ່ມທະວີການປະຕິບັດຄໍາຂວັນ5ດີ1ພໍໃຈແລະສືບຕໍ່ຫັນພະນັກງານຫຼັກແຫຼ່ງລົງກໍ່ສ້າງຮາກຖານການເມືອງ, ພັດທະນາຊົນນະບົດ-ລຶບລ້າງຄວາມທຸກຍາກແລະວຽກງານ3ສ້າງເພື່ອນໍາພາປັບປຸງລະບົບການເມືອງຢູ່ຮາກຖານແລະກະກຽມດໍາເນີນກອງປະຊຸມໃຫຍ່3ຂັ້ນຂອງພັກ.
ສະຫາຍເຫຼັກໄຫຼສີວິໄລຍັງຊີ້ນໍາໃຫ້ຄະນະພັກ-ຄະນະນໍາທຸກຂັ້ນສຸມໃສ່ແກ້ໄຂຈຸດອ່ອນ-ຂໍ້ຄົງຄ້າງໃນໄລຍະຜ່ານມາແລະນໍາເອົາຜົນສໍາເລັດກອງປະຊຸມຄົບຄະນະບໍລິຫານງານພັກແຂວງເປີດກວ້າງຄັ້ງທີ9ສະໄໝທີX ໄປຜັນຂະຫຍາຍເປັນແຜນງານ, ໂຄງການລະອຽດແທດຕົວຈິງໃນແຕ່ລະຂົງເຂດວຽກງານພ້ອມທັງປຸກລະດົມທຸກພາກສ່ວນທົ່ວສັງຄົມເຂົ້າຮ່ວມໃນການຈັດຕັ້ງປະຕິບັດ. ທັງນີ້ກໍເພື່ອເຮັດໃຫ້ການຜັນຂະຫຍາຍມະຕິກອງປະຊຸມໃຫຍ່ຄັ້ງທີXI ຂອງພັກ, ມະຕິX ຂອງອົງຄະນະພັກແຂວງກໍຄືແຜນພັດທະນາເສດຖະກິດ-ສັງຄົມຂອງແຂວງໃນປີ2024ປະກົດຜົນເປັນຈິງ.
(ຂ່າວ-ພາບ: ສັນຍາ)
ຄໍາເຫັນ