 |
ໃນໄລຍະດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວໄດ້ເປີດຂຶ້ນໃນລະຫວ່າງວັນທີ 6-8 ມັງກອນ 2026 ນີ້, ກົມຕໍາຫຼວດຈະລາຈອນ ກົມໃຫຍ່ຕໍາຫຼວດກະຊວງ ປກສ ໄດ້ປະຕິບັດຕາມແຜນແມ່ບົດຂອງກະຊວງ ປກສ ທີ່ໄດ້ກໍານົດໄວ້ ໂດຍສະເພາະໄດ້ວາງກໍາລັງເຂົ້າປ້ອງກັນປະຈໍາຈຸດທີ່ພັກຂອງຜູ້ແທນ, ແຂກທີ່ມາຮ່ວມກອງປະຊຸມຢູ່ບັນດາໂຮງແຮມ 7 ໂຮງແຮມ ແລະ ຈຸດຫໍປະຊຸມແຫ່ງຊາດ ຊຶ່ງເປັນສະຖານທີ່ຈັດກອງປະຊຸມໃຫຍ່ດັ່ງກ່າວ, ກ່ອນເຂົ້າປ້ອງກັນຄະນະຮັບຜິດຊອບໄດ້ເຜີຍແຜ່ໃຫ້ກໍາລັງຕໍາຫຼວດຈະລາຈອນທີ່ປະຕິບັດໜ້າທີ່ຢູ່ແຕ່ລະຈຸດຮັບຮູ້-ເຂົ້າໃຈກ່ຽວກັບພາລະບົດບາດ, ສິດ, ໜ້າທີ່ຂອງຕົນ ເພື່ອອໍານວຍຄວາມສະດວກໃຫ້ການນໍາພັກ-ລັດ ແລະ ບັນດາແຂກທີ່ເຂົ້າຮ່ວມກອງປະຊຸມ.
 |
ນອກຈາກນັ້ນ, ຍັງໄດ້ບັນຈຸກໍາລັງເຂົ້າອໍານວຍຄວາມສະດວກໃຫ້ການນໍາທີ່ໄປວາງພວງ ມາລາຢູ່ອານຸສາວະລີນັກຮົບນິລະນາມ, ວາງກະຕ່າດອກໄມ້ທີ່ຫໍພິພິທະພັນ ໄກສອນ ພົມວິຫານ ແລະ ສະຖານທີ່ສໍາຄັນອື່ນໆ ທີ່ຄະນະຜູ້ແທນໄດ້ເຄື່ອນໄຫວໃຫ້ມີຄວາມສະດວກປອດໄພ ແລະ ເປັນລະບຽບຮຽບຮ້ອຍດີ. ໃນລະຍະ 2 ຫາ 3 ວັນທີ່ຜ່ານມາ, ສະພາບໂດຍລວມມີຄວາມສະຫງົບເປັນລະບຽບຮຽບຮ້ອຍດີ ແລະ ຮັບປະກັນໃຫ້ບັນດາຜູ້ແທນ, ແຂກທີ່ມາຮ່ວມກອງປະຊຸມມີຄວາມປອດໄພດີ. ຊຶ່ງໃນໄລຍະການດໍາເນີນກອງປະຊຸມໃຫຍ່ຄັ້ງນີ້, ພວກເຮົາຈະໄດ້ປະສານສົມທົບກັບ ກໍາລັງຕໍາຫຼວດຈະລາຈອນ ປກສ ນະຄອນຫຼວງວຽງຈັນ ໃນການຈັດວາງກໍາລັງອໍານວຍຄວາມສະດວກຢູ່ຕາມເສັ້ນທາງໃຫ້ມີຄວາມສະດວກທີ່ສຸດ ບໍ່ໃຫ້ເກີດເຫດການອຸບັດເຫດ ແລະ ບັນຫາການຈະລາຈອນຕິດຂັດ.
 |
ຮຽກຮ້ອງປະຊາຊົນຜູ້ໃຊ້ລົດ-ໃຊ້ຖະໜົນ ຈົ່ງໃຫ້ການຮ່ວມມືອໍານວຍຄວາມສະດວກໃນການໄປ-ມາຂອງຂະບວນການນໍາພັກ-ລັດ ກໍຄືຂະບວນຜູ້ແທນທີ່ເຂົ້າຮ່ວມກອງປະຊຸມ ໂດຍສະເພາະ ໃຫ້ປະຕິບັດຕາມຄໍາສັ່ງຂອງເຈົ້າໜ້າທີ່ຕໍາຫຼວດຈະລາຈອນປະຕິບັດໜ້າທີ່ລະບາຍການສັນຈອນຢູ່ຕາມເສັ້ນທາງສາຍຫຼັກ ແລະ ປະຕິບັດກົດລະບຽບຈະລາຈອນ ເພື່ອເຮັດໃຫ້ການດໍາເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກດໍາເນີນໄປດ້ວຍຜົນສໍາເລັດຢ່າງຈົບງາມ.
ຄໍາເຫັນ